شارانى مۇمكىندىگى شەكتەۋلى جانداردىڭ شىعارماشىلىق جۇمىستارى, ولار ەڭبەك ەتىپ جاتقان كاسىپورىنداردىڭ تاۋارلارىنىڭ كورمەسى اشتى.
شارادا ءسوز سويلەگەن وبلىس اكىمى بەردىبەك ساپارباەۆ ءوڭىردىڭ قوعامدىق ومىرىنە بەلسەندى اتسالىسىپ جۇرگەن مۇمكىندىگى شەكتەۋلى جانداردى اتاپ ءوتتى.
ء«ومىر- كۇرەس. وسى ومىرگە كەلدىڭ بە – ەشتەڭەگە مويىماي كۇرەسۋ كەرەك, ءومىر ءسۇرۋ كەرەك. ەگەر ادام الدىنا مىندەت قويىپ, العا ۇمتىلسا, ەڭبەكتەنسە, وندا ول مىندەتتى تۇردە ارمانىنىڭ ورىندالۋىنا قول جەتكىزەدى. ارينە, جاقىنداردىڭ, تۋىستاردىڭ, دوستاردىڭ قولداۋى قاجەت. اقتوبەلىك مۇمكىندىگى شەكتەۋلى جاندار قۇرالاي بازاربايقىزىنىڭ جۇمىسىنىڭ ارقاسىندا زور قولداۋعا يە. سونىڭ ناتيجەسىندە مۇگەدەكتىگى بار مىڭداعان ادام ومىردە ءوز ورنىن تاۋىپ, وتباسىن قۇردى, كوبىنىڭ ەندىگى نەمەرەلەرى بار. باستىسى – ولار تۇيىقتالىپ قالماي, جۇمىس ىستەپ جاتىر جانە قوعامعا پايدا اكەلۋدە. ءبىز, اقتوبەلىكتەر, ەلباسىنا ءبىزدى قولداپ, جەرلەسىمىزگە قازاقستانداعى ەڭ قۇرمەتتى اتاقتى بەرگەنى ءۇشىن العىس ايتامىز. بۇل ءبىزدىڭ پرەزيدەنت ساياساتىنىڭ الەۋمەتتىك سيپاتىن تاعى ءبىر دالەلدەيدى», دەدى بەردىبەك ساپارباەۆ.
ءوڭىر باسشىسى «قازاقستاننىڭ ەڭبەك ەرى» اتاعىن يەلەنگەن اقتوبە وبلىسىنىڭ مۇگەدەكتەرى قوعامدىق ۇيىمدارىنىڭ ءسوزسىز كوشباسشىسى قۇرالاي بايمەنوۆاعا ارنايى كوتەرگىشتەرمەن جابدىقتالعان ارنايى اۆتوكولىكتىڭ كىلتىن تابىس ەتتى.
ءوز كەزەگىندە, قۇرالاي بايمەنوۆا وزىنە بەرىلگەن اۆتوكولىكتى مۇگەدەك بالالاردىڭ «عاجاپ» قوعامدىق بىرلەستىگىنە تارتۋ ەتتى.
ء«بىز وبلىس اكىمىنىڭ باستاماسىمەن بۇگىندە وراسان زور اۋقىم العان جوبانى ىسكە قوستىق. بۇگىن سىزدەر مۇمكىندىگى شەكتەۋلى دەپ ەسەپتەيتىن جانداردىڭ بۇكىل الەۋەتىن كوردىڭىزدەر. ءبىزدىڭ ۇرانىمىز: ء«بىز بىرگەمىز!». بەردىبەك ماشبەك ۇلى, سىزگە مەنىڭ جۇلدىزىمدى جاققانىڭىز ءۇشىن العىس ايتامىن»,- دەدى ول.
بۇدان وزگە, «جاينا» مۇمكىندىگى شەكتەۋلى بالالارعا ارنالعان وڭالتۋ ورتالىعىنا, «قازاق ساڭىراۋلار قوعامى» فيليالىنا, قازاق سوقىرلار قوعامىنىڭ اقتوبە وقۋ-ءوندىرىس كاسىپورنىنا, ء اۋتيزمى بار بالالار اتا-انالارىنىڭ «راستيومكا» وبلىستىق قاۋىمداستىعىنا جالپى سوماسى 1 ملن تەڭگەنىڭ اقشالاي سەرتيفيكاتتارى تابىستالدى.
قوعامدىق قىزمەتتەردە, كاسىپكەرلىكتە جانە وزگە دە سالالاردا كەرەمەت جەتىستىكتەرگە جەتكەن اقتوبەلىك مۇگەدەك جاندار - گۇلمەيرام سراجاەۆا, زينايدا تەلەۋشەۆا, ۆيكتوريا كۆاشا, شاحان جولداسباەۆ, سونىمەن قاتار, شارانىڭ قۇرمەتتى قوناقتارى – قازاقستان مۇگەدەكتەر كەڭەسىنىڭ توراعاسى ءالي امانباەۆ, مەملەكەتتىك قايراتكەر ەلەۋسىن ساعىندىقوۆ, پروفەسسورلار سەرىك اقشولاقوۆ پەن جاقسىلىق دوسقاليەۆ, ەڭبەك, الەۋمەتتىك قورعاۋ جانە كوشى-قون كوميتەتى توراعاسىنىڭ ورىنباسارى دامەجان سادۋاقاسوۆا, باتىس قازاقستان وبلىسى اكىمىنىڭ كەڭەسشىسى جۇماجان قوججانوۆ جينالعاندار الدىندا وزدەرىنىڭ جىگەرلەندىرەتىن, رۋحتاندىرار سوزدەرىن ايتتى.
اقتوبە وبلىسىندا ۋاقىتىلى الەۋمەتتىك قولداۋ كورسەتىلىپ تۇراتىن 27 مىڭداي مۇگەدەك بار. بىلتىر 12 مىڭنان اسا مۇگەدەك جان تەحنيكالىق, گيگيەنالىق زاتتارمەن, پروتەزدى-ورتوپەديالىق بۇيىمدارمەن جانە شيپاجايلىق ەمدەرمەن قامتىلدى. مەملەكەت مۇمكىندىگى شەكتەۋلى تۇلعالاردى الەۋمەتتىك جاعىنان قولداۋ ءۇشىن بارلىعى 1,8 ملرد تەڭگەدەن استام قاراجات ءبولدى.
2018 جىلى ءىس جۇزىندە مۇمكىندىگى شەكتەۋلى بارلىق ازاماتتار قايىرىمدىلىق قولداۋمەن قامتىلدى. وسىلايشا, وبلىستا مەملەكەتتىك باعدارلامالار اياسىندا «باقىتتى بالا», «تۋعان جەرگە تاعزىم», «مەكتەپكە جول», «تۇلەك.kz», «اۋىل قامقورشىسى» جانە ت.ب. جوبالار جۇزەگە اسىرىلىپ, سونىڭ اياسىندا 508 مىڭنان اسا وبلىس تۇرعىنىنا شامامەن 6,5 ملرد تەڭگە كولەمىندە كومەك كورسەتىلدى.
ءوڭىر بيلىگىنىڭ مۇمكىندىگى شەكتەۋلى بالالاردى وڭالتۋعا ەرەكشە كوڭىل بولەتىنىن ايتا كەتۋ كەرەك. باقىتتى بالا جوباسى اياسىندا ەلىمىزدە تۇڭعىش «كۇنشۋاق» ساۋىقتىرۋ ينكليۋزيۆتى لاگەرى, 220 ورىندىق «نەكتار» كوررەكتسيالىق بالاباقشاسى, سونىمەن قاتار, بيزنەستىڭ الەۋمەتتىك جاۋاپكەرشىلىگى اياسىندا «اقتوبە مىس كومپانياسى» جشس قاراجاتى ەسەبىنەن تسەرەبرالدى-سال اۋرۋىمەن اۋىراتىن بالالاردى وڭالتۋ ورتالىعى, جۇيكە سۇيەك-بۇلشىقەت پاتولوگياسى مەن ءاۋتيزمى بار بالالارعا «ايالا» ورتالىعى اشىلدى.
