الىستاعى اعايىنمەن قاۋىشىپ, ارقا-جارقا بولعان تاعىلىمى مەن ءتالىمى ەرەك شارا اتىراۋدا ءوتتى, جايىق جاعاسىنا نوعاي حالقىنىڭ بەلگىلى ونەر شەبەرلەرى, اقىندار مەن سۋرەتشىلەرى ارنايى كەلدى.
اتىراۋ وبلىسىنداعى نوعاي حالقىنىڭ مادەني كۇندەرى اياسىندا وتكەن شارالار لەگى «كامباك» ءفيلمىنىڭ كورسەتىلىمىمەن باستالدى. رەسەي فەدەراتسياسىنىڭ قاراشاي-شەركەش رەسپۋبليكاسىن, ستاۆروپول ولكەسىن, داعىستان رەسپۋبليكاسى جانە استراحان وبلىسىن مەكەندەيتىن نوعايلاردىڭ قازىرگى ءومىر سالتى مەن مادەنيەتى تۋرالى تۇسىرىلگەن فيلم اسەرلى شىققان. ءفيلمنىڭ رەجيسسەرى يسلام ساتىروۆ نوعايلاردىڭ قازىرگى تىرشىلىگىن كورسەتۋ ارقىلى ۇلتتىق قۇندىلىقتاردى ناسيحاتتاۋدى ماقسات ەتكەنىن ايتادى.
نوعايدىڭ بەلگىلى سۋرەتشىلەرى الىبەك قويلاقاەۆ پەن ياكۋب ورازاقاەۆتاردىڭ تۋىندىلارى قويىلعان كورمەنى اتىراۋلىقتار قىزىعا تاماشالادى. نوعاي جانە قازاقستان عالىمدارى مەن قالامگەرلەرى دوڭگەلەك ۇستەل باسىنا جينالىپ, مادەنيەتتەر اراسىنداعى بايلانىس جايىندا اڭگىمە ءوربىتتى. ەكى كۇنگە سوزىلعان شارا اياسىندا قوناقتار سارايشىق قالاشىعىنىڭ ورنىنا بارىپ, مۋزەيلەردى ارالادى. ال مادەنيەت كۇنىنىڭ جابىلۋ سالتاناتىندا نوعاي-قازاق ونەرپازدارى ءبىر ساحنادا ونەر كورسەتتى.
– ەدىل-جايىقتى تەل ەمگەن, قازاقپەن اتالاس جۇرت نوعايلاردىڭ بۇگىنگى تاڭداعى ەڭ كورنەكتى ونەر وكىلدەرىنىڭ اتىراۋعا كەلۋى مادەنيەتتەر اراسىنداعى بايلانىستىڭ تامىرى تەرەڭدە ەكەنىن ايعاقتايدى. مەملەكەت باسشىسى «بولاشاققا باعدار: رۋحاني جاڭعىرۋ», « ۇلى دالانىڭ جەتى قىرى» ماقالالارىندا ۇلى دالانىڭ جاھاندىق تاريحتاعى ورنىنا تىڭ كوزقاراسپەن قاراۋ كەرەكتىگىن اتاپ كورسەتىپ, مىندەتتەر جۇكتەدى. بۇگىنگى شارانى دا وسى باعدارلامالاردى ىسكە اسىرۋدىڭ ءبىر كورىنىسى رەتىندە باعالاۋعا بولادى دەپ ەسەپتەيمىن, – دەدى وبلىس اكىمى نۇرلان نوعاەۆ. ال نوعايدىڭ تانىمال ءانشىسى ارسلانبەك سۇلتانبەكوۆ: «اتىراۋعا ءار كەلگەن سايىن رۋحتانىپ قايتامىن. بابالارىمىز باسقان توپىراقتىڭ كيەسى مەن قۇدىرەتى بولەك», – دەيدى.
باۋىرلاستاردىڭ بۇل باسقوسۋى ءالى ۇزاق ۋاقىت ايتا جۇرەتىندەي ايرىقشا اسەرگە بولەدى.
باقىتگۇل باباش,
«ەگەمەن قازاقستان»
اتىراۋ
