بۇعان دەيىنگى زەرتتەۋلەردە 35 جاس شامالارىنداعى انالاردىڭ سابيلەرى 2,5 كەلىدەن تومەن بولعان جانە مەرزىمىنەن بۇرىن (37 اپتادان تومەن) دۇنيە ەسىگىن اشاتىن.
دارىگەر-عالىمدار 1987-2000 جىلدارى ارالىعىندا 35 جاستان اسىپ, دۇنيەگە سالاماتتى ءسابي اكەلگەن مىڭداعان ءفيننىڭ ومىرىنە قاراپ, جاس ۇلعايعان كەزدە دۇنيەگە ءسابي اكەلۋ قاۋىپتى دەگەن قالىپتاسىپ قالعان تۇسىنىكتىڭ جالعاندىعىنا كوز جەتكىزگەن.
دەموگرافيالىق زەرتتەۋلەر ينستيتۋتى ديرەكتورىنىڭ سوزىنە قاراعاندا, ومىرگە 7 ايلىق بالا اكەلۋ قىرىقتان اسقان انالاردا 25-29 جاستاعى انالارعا قاراعاندا ەكى ەسە جوعارى.
بىراق ماماندار ساۋ ءسابي اكەلۋ ەڭ الدىمەن انانىڭ كۇتىمىنە بايلانىستى ەكەنىنە باستى نازار اۋدارىپ وتىر. اۋىر كوتەرۋ, كوڭىلسىز ءجۇرۋ, سترەسس الۋ – ءبارى دە انامەن قوسا قۇرساقتاعى نارەستەگە دە اسەر ەتەدى. «ايەل ادام انا بولۋى ءۇشىن جاسىن ۋايىمداماۋ كەرەك. ودان دا مىنەزىن, ادەتىن ويلاسىن. انا بولۋ ەشقاشان كەش ەمەس» دەيدى لوندون ەكونوميكالىق مەكتەبىنىڭ زەرتتەۋشىسى اليسا گوزيس.
دايىنداعان ءبىلىم ارىقباي
