«مەن ءۇشىن بۇل تۋرنيرگە شاقىرتۋ الۋ جانە الەمنىڭ ەڭ مىقتى گروسسمەيستەرلەرىمەن ءبىر كومپانيادا ويناۋ ۇلكەن مارتەبە. مۇمكىندىكتەرىمدى وتە جوعارى دەڭگەيدە پايدالانىپ, جاقسى ناتيجە كورسەتە الامىن دەپ ۇمىتتەنەمىن» دەدى دينارا سادۋاقاسوۆا.
حالىقارالىق تۋرنير 11-27 قاڭتار ارالىعىندا وتەدى. 2 اينالىمدىق تۋرنير جانە ءۇشىنشى نەگىزگى تۋرنيردەن تۇرادى. اينالمالى تۋرنيرلەرگە ويىنشىلار تەك شاقىرۋ بويىنشا تۇسەدى. ەگەر ا تۋرنيرىنە قازىرگى الەم چەمپيونى ماگنۋس كارلسەندى قوسا العاندا, ەرلەر ەليتاسى قاتىسسا, وندا ب تۋرنيرىنە 2500-دەن استام رەيتينگى بار بەلگىلى جانە كەلەشەگى بار شاحماتشىلار قاتىسادى.
«Tata Steel-گە الەمنىڭ ەڭ مىقتى گروسسمەيستەرلەرى مەن بولاشاعىنان زور ءۇمىت كۇتتىرەتىن جاس ويىنشىلار قاتىساتىندىقتان, بۇل – ۇلكەن جەتىستىك. ءتۋرنيردىڭ ورتاشا رەيتينگى – 2582, دەمەك, پلانكا وتە جوعارى. دەگەنمەن ءبىز دينارانىڭ كۇشىنە كۇمان كەلتىرمەيمىز» دەدى قازاقستان شاحمات فەدەراتسياسىنىڭ اتقارۋشى ديرەكتورى يرينا گريششەنكو.
قازاقستاندىق وينايتىن Tata Steel Challengers قۇرامى وتە مىقتى ويىنشىلاردان قۇرالعان. 14 ويىنشىنىڭ اراسىندا مىقتى گروسسمەيستەرلەر بار: انتون كوروبوۆ, ۆلاديسلاۆ كوۆالەۆ, ەرۆين ل ' امي, پارحام ماگسۋدلۋ, سونداي-اق جاس شاحمات ۆۋندەركيندتەرى رامەشبابۋ پراگگناناندحا, ۆينسەنت كايمەر جانە ت.ب.
اقمارال اعزامقىزى,
«ەگەمەن قازاقستان»
