– ءباتي اپا بيىل ءجۇزدىڭ ۇشەۋىن جاساپ وتىر. شيراق, ساناسى تىڭ. بالا كۇنىندە ەستىگەن اڭگىمەلەرىنىڭ مايىن تامىزىپ ايتقاندا, قاريا جادىنىڭ مىقتىلىعىنا تاڭعالاسىڭ, – دەدى جول ۇستىندە وبلىستىق «جەتىسۋ» گازەتىنىڭ مەنشىكتى ءتىلشىسى قانات ءبىرجانسال.
...قايران ءبىزدىڭ شەشەلەر, اردى ويلاعان,
شىلىك شاۋىپ, شي ورىپ, باۋ بايلاعان.
جىگىتتەردەن ايىرىلىپ, قالماي قاراڭ,
قىرمان باسىپ, ەگىن ساپ, اربا ايداعان...
ءباتي اپا ءوزى جاتقا ايتاتىن مۇقاعالي اقىننىڭ وسى ولەڭىنىڭ كەيىپكەرى سياقتى. سوناۋ سوعىس جىلدارىندا ەلدەگى اۋىر ەڭبەكتىڭ سالماعىن يىعىمەن كوتەرگەن 103 جاستاعى قاريا قازىرگى تىرشىلىككە سالاۋات ايتادى.
– زۇلماتتى كوزىمىزبەن كوردىك قوي, ەندى ەلىمىزدىڭ باسىنا ونداي كۇن بەرمەسىن, – دەيدى اپا. ءسوزىنىڭ استارىنان كارى جۇرەككە سوعىستىڭ سىزى عانا ەمەس, ونىڭ الدىنداعى قۋعىن-سۇرگىننىڭ سويىلى باتقانى اڭعارىلادى. ويتكەنى ءباتي اپانىڭ قۇداي قوسقان قوساعى ەكىنشى دۇنيەجۇزىلىك سوعىستىڭ الدىندا «حالىق جاۋى» دەگەن جالامەن ۇستالىپ كەتىپتى. اقمولا ماڭىنداعى تۇتقىندار لاگەرىنە ايدالعان ەكەن. سول جاقتا قايتىس بولعانى جايلى تىلدەي قاعاز كەلگەن. كەيىن, 1956 جىلى عانا اقتالىپتى. ەرىنەن قالعان 4 ۇلدى قاناتتىعا قاقتىرماي, تۇمسىقتىعا شوقىتتىرماي وسىرگەن ءباتي اپا قازىر ۇلى مولدىراماننىڭ قولىندا. «اناسى بار ادامدار, ەشقاشان قارتايمايدى» دەگەندەي, مولدىرامان اقساقالدىڭ ءوزى جەتپىس بەس جاستى القىمدادى. قاريانىڭ باتاسىن الىپ تۇرىپ عاسىر جاساعان «ەگەمەن قازاقستان» گازەتىنەن ەكەنىمىزدى ايتتىق.
– ە, ءبىز «كازيت-جورنال» وقىپ وستىك قوي, قازىر دە شوبەرەلەرىمە وقىتىپ الامىن. سوعىس ۋاقىتىندا بريگادير گازەتتى قىرمان باسىنا اكەلىپ, داۋىستاپ وقىپ بەرەتىن. ءبىزدىڭ اسكەردىڭ جەڭىسى جايلى وقىپ, جىلاپ الاتىنبىز. جاقسى حاباردى كوپ جازىڭدار, اينالايىندار, – دەدى 103 جاستاعى ءباتي اپا.
قالماحانبەت مۇقامەتقالي,
«ەگەمەن قازاقستان»
الماتى وبلىسى
