«ەلىمىزدىڭ شالعايىندا جاتسام دا, كوشتەن وزباي, سوڭىندا قالماي, قولىنا قالام ۇستاعان قالامگەرلەردىڭ بەل ورتاسىندا جۇرگەنىمە ءتاۋبا دەيمىن. كۇننىڭ ايازىنا قاراماي وسىندا جينالعان جىر سۇيەر قاۋىمعا دا ريزاشىلىعىمدى بىلدىرەمىن. مەن ءار بەس جىل سايىن مەرەي تويىما وراي وقىرمانىم الدىندا شىعارماشىلىق كەشىم ارقىلى ەسەپ بەرىپ وتىراتىن ەدىم. وندا ارينە مەرەيتوي بولعان سوڭ, ۋاقىتتىڭ بارلىعى مەنىڭ اتىما ايتىلعان ماداق ءسوز بەن شاپان جابۋ سەكىلدى سىي-سياپاتقا كەتىپ قالاتىن, كەشتىڭ سوڭىندا عانا ءوزىم ءبىردى-ەكىلى ولەڭ وقىپ قالاتىن ەدىم. بۇگىنگى كەشتە كەرىسىنشە, ءوزىم ولەڭ وقىعىم كەلدى» دەپ اعىنان جارىلدى اقىلبەك قوجا ۇلى.
كەشتە اقىن: «جالعانعا جالپاق جارىعىن تاراتقان, اللا!
تىلىمە ءتاتتى بالدى دا جالاتقان, اللا!
ق ۇلىڭا مىنا كوز سالشى, جاراتقان اللا!
اۋزىما جاقسى ءسوز سالشى, جاراتقان اللا!» دەپ باستاپ, كوسىلىپ ولەڭدەرىن وقىدى.
وبلىستىق مادەنيەت باسقارماسىنىڭ باسشىسى ەرلان قالماقوۆ كەش يەسىن وبلىس اكىمى اتىنان قۇتتىقتاپ, اقىلبەك شاياحمەتتىڭ قازاق ادەبيەتىنەن ءوز ورنىن العان قالامگەر ەكەنىن جانە ونىڭ ءوڭىردىڭ مادەني ومىرىنە قوسقان ۇلەسىن دە ەرەكشە اتاپ ءوتتى. الماتىدان ارنايى كەلگەن «حالىق قاھارمانى ساعادات نۇرماعامبەتوۆ» اتىنداعى قوردىڭ وكىلى, «قازاق» گازەتىنىڭ ءبولىم مەڭگەرۋشىسى قالي قامباروۆ قازاقستان جازۋشىلار وداعىنىڭ توراعاسى ۇلىقبەك ەسداۋلەتتىڭ قۇتتىقتاۋ حاتىن تابىستادى. سونىمەن قاتار مەملەكەت جانە قوعام قايراتكەرلەرى كەنجەبەك ۋكين, ىسقاق ەسىرگەپوۆ, اقىن, قاجى جولبارىس بايازيد جانە تاعى باسقالار اقىنعا ىزگى تىلەكتەرىن ءبىلدىردى, سىي-سياپات تا جاسادى. كەش اقىلبەك شاياحمەت سوزىنە جازىلعان اندەرمەن كومكەرىلدى.
ءنازيرا جارىمبەت,
«ەگەمەن قازاقستان»
قوستاناي
