«تۇبىرتەكتى تالاپ ەت – جۇلدەنى ۇتىپ ال» اكتسياسى 21 مامىر 30 قاراشا ارالىعىندا ءوتتى. وسى كەزەڭدە بارلىق وبلىستار مەن استانا جانە الماتى قالالارىندا جۇلدەلەر تابىستالدى. ۇيىمداستىرۋشىلار اكتسيانىڭ التى ايى ىشىندە 30 مىڭ ازاماتتان شامامەن 2,3 ملن تۇبىرتەك العانىن ايتادى. تۇبىرتەكتەردىڭ باسىم بولىگى الماتى قالاسى مەن تۇركىستان وبلىسىنان جىبەرىلگەن. جيىن بارىسىندا ءسوز العان قارجى مينيسترلىگى مەملەكەتتىك كىرىستەر كوميتەتىنىڭ توراعاسىنىڭ ورىنباسارى ا.قىپشاقوۆ اكتسيا باستالعالى بەرى رەسپۋبليكا بويىنشا 300-گە جۋىق باعالى سىيلىق ويناتىلعانىن ايتتى.
«اتالعان اكتسيانى ءبىز وسىمەن ءتورتىنشى جىل وتكىزىپ وتىرمىز. وسى اكتسيا ازاماتتارعا ءبىر ۋاقىتتا كاسىپكەرلىك سۋبەكتىلەرىنىڭ سالىقتىق زاڭناماسىن ساقتاۋ بويىنشا قوعامدىق باقىلاۋعا بەلسەندى قاتىسۋىنا جانە باعالى جۇلدەلەر ۇتىپ الۋعا مۇمكىندىك بەرگەنىن اتاپ ءوتۋ قاجەت», دەدى ول.
بۇدان سوڭ, تۇبىرتەك ارقىلى جۇلدەلى بولعاندار تىكەلەي ەفيردە كەزدەيسوق ساندار گەنەراتورىنىڭ كومەگىمەن بەلگىلى بولدى. 360 تەڭگەنىڭ تۇبىرتەگىمەن الماتى وبلىسى, ىلە اۋدانى, بايسەركە اۋىلىنىڭ تۇرعىنى كاكەنوۆا ورىنبالا جەڭىل اۆتوكولىك ۇتىپ الدى. ول اكتسياعا بارلىعى 2516 تۇبىرتەك جىبەرگەن. استانا قالاسىنىڭ تۇرعىنى ىسقاقوۆا ۇلداي اكتسياعا بارلىعى 2425 تۇبىرتەك جىبەرىپ, 585 تەڭگەنىڭ تۇبىرتەگىمەن تەلەۆيزور ۇتىپ الدى. سونداي-اق الماتى قالاسىنىڭ تۇرعىنى وحانوۆا اينۇر 429 تەڭگەنىڭ تۇبىرتەگىمەن پلانشەت ۇتىپ الدى. ول بارلىعى 1196 تۇبىرتەك جىبەرگەن.
اكتسيا بارىسىندا 91 مىڭنان اسا تۇبىرتەك جىبەرگەن تۇركىستان وبلىسىنىڭ تۇرعىنى جانار قوزعامباەۆا «ەڭ بەلسەندى قاتىسۋشى» اتانىپ, پلانشەت ۇتىپ الدى. سونىمەن قاتار بكم قولدانۋ ءتارتىبىن قوعامدىق باقىلاۋ نەگىزىندە ازاماتتىق ۇستانىمىن كورسەتكەنى ءۇشىن الماتى قالاسىنىڭ تۇرعىنى شين انتونعا ۇيالى تەلەفون سىيعا بەرىلدى.
مارجان تىلەۋبەك,
«ەگەمەن قازاقستان»
