قىزدار ۋنيۆەرسيتەتىنىڭ 75 جىلدىعى قارساڭىنداعى تاعىلىمدى ءىس الماتى قالالىق اكىمدىگى مەن وقۋ ورنىنىڭ باستاماسىمەن ۇيىمداستىرىلدى. جيىنعا بەلگىلى ازاماتتار مەن عالىمدار, ن. وڭداسىنوۆتىڭ تۋىستارى جانە ءبىلىم ورداسىنىڭ ۇجىمى قاتىستى. شارانى ۋنيۆەرسيتەت رەكتورى گاۋحار الدامبەرگەنوۆا اشىپ, قازاقتىڭ ءبىرتۋار ازاماتىنىڭ قايراتكەرلىك ىستەرىنە توقتالدى.
– تاريحتى تۇلعالار جاسايدى. قازاق تاريحىندا بولمىسى بيىك, ءبىتىمى ەرەك ازاماتتار بارشىلىق. ەلىنىڭ بولاشاعى, وسكەلەڭ ۇرپاقتىڭ ەرتەڭى ءۇشىن ايانباي قىزمەت اتقارعان سونداي اتپال ازاماتتىڭ ءبىرى دە بىرەگەيى – نۇرتاس ءداندىباي ۇلى وڭداسىنوۆ. نۇرتاس ءداندىباي ۇلى كەڭەستىك يدەولوگيا ۇستەمدىك قۇرىپ, كوممۋنيستىك پارتيا داۋىرلەپ تۇرعان زاماندا ۇلتتىق كادرلاردى دايارلاۋعا ەلەۋلى ۇلەس قوسىپ, وزىندىك مەكتەبىن قالىپتاستىردى. وڭداسىنوۆتىڭ تىكەلەي اتسالىسۋىمەن بۇگىنگى ۇلتتىق عىلىم اكادەمياسىنىڭ ىرگەتاسى قالاندى. نۇرتاس ءداندىباي ۇلىنىڭ ۇيىتقى بولۋىمەن قازاق مەملەكەتتىك قىزدار پەداگوگيكالىق ينستيتۋتى, قازاق مەملەكەتتىك كونسەرۆاتورياسى, دەنە شىنىقتىرۋ ۋچيليششەسى سىندى وتاندىق جوعارى مەكتەپتەر اشىلدى. بۇگىندە اتالعان ءبىلىم وردالارى – بىلىكتى مامان دايارلاپ قانا قويماي, قازاقستاندىق ءبىلىم بەرۋ جۇيەسىندە وزىندىك ورنىن قالىپتاستىرىپ ۇلگەردى, – دەيدى گ. الدامبەرگەنوۆا.
وقۋ ورنىنىڭ باسشىسى ۇلتىمىزدىڭ ارداقتى ازاماتىن ۇلىقتاۋ – وسكەلەڭ ۇرپاق تاربيەسىندە الاتىن ورنى ولشەۋسىز ۇلكەن ەكەنىن دە اتاپ ءوتتى.
– قازاقتا «وتكەنىن ۇمىتقان – وشكەندىكتىڭ بەلگىسى, وتكەنىن ەسكە العان – وسكەندىكتىڭ بەلگىسى» دەگەن قاناتتى ءسوز بار. قىزدار ۋنيۆەرسيتەتىندەگى بۇگىنگى شارا – سونىڭ ناقتى ايعاعى. وسكەلەڭ ۇرپاق ءۇشىن تاعىلىم بولارلىق يگىلىكتى ىسكە باستاما تانىتىپ, قولداۋ بىلدىرگەن جاندارعا ۋنيۆەرسيتەت ۇجىمى اتىنان العىس ايتامىز, – دەدى گاۋحار تورەمۇراتقىزى.
سونىمەن قاتار مەموريالدى تاقتانىڭ اشىلۋ راسىمىندە الماتى قالاسى مادەنيەت جانە ارحيۆتەر باسقارماسىنىڭ باسشىسى حانزادا ەسەنوۆا, مەملەكەت جانە قوعام قايراتكەرى ءشامشا بەركىمباەۆا مەن بەلگىلى عالىم, اكادەميك ومىرزاق ايتباي ۇلى ءسوز سويلەپ, ن. وڭداسىنوۆتىڭ قازاق حالقىنىڭ يگىلىگى ءۇشىن اتقارعان ىلكىمدى ىستەرى تۋراسىندا كەڭىنەن اڭگىمەلەدى.
شارا اياسىندا سونداي-اق نۇرتاس وڭداسىنوۆ تۋرالى «بيلىكتەن بيىك تۇلعا» اتتى دەرەكتى ءفيلمنىڭ تۇساۋكەسەرى ءوتىپ, كينو تۋىندى العاش رەت كوپشىلىك نازارىنا ۇسىنىلدى. قازاقستان رەسپۋبليكاسى پرەزيدەنتى تەلەراديوكەشەنىنىڭ مۇرىندىق بولۋىمەن جارىق كورگەن فيلمدە قايراتكەردىڭ سانالى عۇمىرىنىڭ جارقىن ساتتەرى مەن شىعارماشىلىق ەڭبەكتەرى جايلى تىڭ مالىمەتتەر, زامانداستارى مەن زيالى قاۋىم وكىلدەرىنىڭ ەستەلىكتەرى باياندالعان.
ايتا كەتەيىك, نۇرتاس وڭداسىنوۆ قازاق كسر حالىق كوميسسارلار كەڭەسىنىڭ توراعاسى, قازاق كسر جوعارعى كەڭەسى تورالقاسى توراعاسىنىڭ توراعاسى, گۋرەۆ (اتىراۋ) وبلىستىق اتقارۋ كوميتەتىنىڭ توراعاسى, گۋرەۆ وبلىستىق پارتيا كوميتەتىنىڭ ءبىرىنشىسى حاتشىسى قىزمەتتەرىن اتقارعان. «ارابشا-قازاقشا», «پارسىشا-قازاقشا» تۇسىندىرمە سوزدىكتەرىنىڭ اۆتورى. ەكى مارتە «ەڭبەك قىزىل تۋ» وردەنىمەن ماراپاتتالعان.
جاندار اسان,
قىزدار ۋنيۆەرسيتەتىنىڭ ءباسپاسوز ورتالىعىنىڭ باسشىسى
