تاۋەلسىزدىك قولعا تيىسىمەن ەلباسى ن.نازارباەۆ باستاعان ەل-جۇرتىمىز دامۋدىڭ دارا دا داڭعىل جولىنا ءتۇستى. وسى ورايدا اتا زاڭىمىزدىڭ قابىلدانۋى, قارۋلى كۇشتەرىمىزدىڭ قۇرىلۋى, شەكارامىزدىڭ شەگەندەلۋى, ارقا تورىندە جاڭا استانانىڭ ءوز سانىمەن بوي تۇزەۋى, ەكونوميكامىزدىڭ وركەندەۋى, شەتتەگى قانداستارىمىزدىڭ اتاجۇرتىنا ورالۋى جانە باسقا دا شەشىمىن تاپقان يگىلىكتى ىستەر سانامىزدا جاڭعىرادى. مۇنىڭ بارلىعى شيرەك عاسىردان استام ۋاقىتتىڭ ىشىندە ەلىمىزدىڭ مارتەبەسى بيىك, بەدەلى زور مەملەكەتكە اينالعانىن قاپىسىز ۇقتىرادى.
بۇل رەتتە ەلباسىنىڭ باستامالارى ارقاسىندا ەلىمىزدىڭ يادرولىق قاۋىپسىزدىكتى نىعايتۋ سالاسىندا كوشباسشى ەل رەتىندە تانىلعانىن ايرىقشا اتاپ ءوتۋىمىز كەرەك. بۇعان قوسا, ەلىمىزدىڭ بىتىمگەرلىك باعىتىنداعى باستامالارىنا حالىقارالىق قوعامداستىق جوعارى باعاسىن بەرىپ وتىرعانىن دا ماقتانىشپەن ايتامىز. مۇنىڭ بارلىعى قازاقستاننىڭ تارتىمدىلىعىن ارتتىرىپ, ەلىمىزدىڭ بۇۇ قاۋىپسىزدىك كەڭەسىنە مۇشەلىككە سايلانۋىنا, وسى ۇيىمعا توراعالىق ەتۋىنە جول اشتى.
ەلىمىزدىڭ حالىقارالىق جانە ايماقتىق ۇيىمداردىڭ جۇمىسىنا بەلسەندى ارالاسىپ وتىرعانى دا كوڭىل قۋانتادى. قازاقستاننىڭ 2010 جىلى ەقىۇ-عا, 2011-2012 جىلدارى يىۇ-عا توراعالىق ەتكەنى ءسوزىمىزدىڭ دالەلى بولا الادى. تمد-دا العاشقى بولىپ ەكسپو-2017 كورمەسىن ۇيىمداستىرعانى دا باستى تابىستارىمىزدىڭ ءبىرى.
قازاقستاننىڭ باسەكەگە قابىلەتتى, دامىعان 50 ەلدىڭ قاتارىنا قوسىلعانى ەلىمىزدىڭ بولاشاعى جارقىن ەكەنىن كورسەتىپ بەردى.
«نۇرلى جول» باعدارلاماسى سىندى مەملەكەتتىك اۋقىمدى جوبالاردىڭ ءتيىمدى ىسكە اسىرىلۋىنىڭ ارقاسىندا جۇزەگە اسىرىلعان يگى ىستەردىڭ جاسامپاز تاريحى قالىپتاستى. ەلىمىزدىڭ ەكونوميكاسىنا قۇيىلعان قىرۋار ينۆەستيتسيا حالىقارالىق بيزنەس-قاۋىمداستىقتىڭ قازاقستانعا دەگەن زور سەنىمىن راستايدى. حالىقتىڭ ءال-اۋقاتىن ارتتىرۋ, جۇمىسسىزدىقتى قىسقارتۋ, جاس ۇرپاقتى ۋاقىت تالابىنا ساي تاربيەلەپ, ءبىلىم نارىمەن سۋسىنداتۋ, اسىرەسە اۋىلداردى قولداۋ شارالارى ءوزىنىڭ وڭ ناتيجەسىن كورسەتتى.
ەل بىرلىگىن نىعايتۋ مەملەكەتتىڭ باسىم باعىتتارىنىڭ ءبىرى بولعاندىقتان, وسى ورايدا قولعا الىنعان شارالار ءوزىنىڭ اۋقىمدىلىعىمەن دارالانىپ تۇر. بۇل ارادا ەلباسى باستاماسىمەن قۇرىلعان قحا-نىڭ ورنىن ەرەكشە اتاپ وتكەنىمىز ورىندى.
ەلىمىزدىڭ مادەني-رۋحاني ومىرىنە قاتىستى اتقارىلعان شارالار وتە كوپ. ماسەلەن, «مادەني مۇرا» جوباسى اياسىندا ۇيىمداستىرىلعان شارالار, قازاق حاندىعىنىڭ 550 جىلدىعىنىڭ تويلانۋى, «رۋحاني جاڭعىرۋ» باعدارلاماسىنان تۋىندايتىن مىندەتتەردىڭ كۇن تارتىبىنە قويىلۋى, قازاق ءتىلى ءالىپبيىن لاتىن قارپىنە كوشىرۋ ءىسىنىڭ باستالعانى جانە باسقا دا اۋقىمدى جۇمىستار حالقىمىزدىڭ رۋحاني ومىرىنە تىڭ سەرپىن بەردى.
ەلباسىنىڭ شەتتەگى قانداستارىمىزدى اتامەكەنگە شاقىرۋى ناتيجەسىندە 1 ميلليوننان استام قازاقتىڭ ەلگە قونىس اۋدارۋىن تاۋەلسىزدىك تابىستارىنىڭ بىرەگەيى دەسەك قاتەلەسپەيمىز. بۇل كوش ءالى دە جالعاسا بەرمەك.
ەلىمىز جاستاردى قولداۋ ىسىنە ايرىقشا كوڭىل ءبولىپ كەلەدى. باسقاسىن بىلاي قويعاندا, ءبىر عانا «بولاشاق» باعدارلاماسى ارقىلى بۇگىنگە دەيىن 13 مىڭ جاس ورەن الەمنىڭ وزىق وقۋ ورىندارىندا ءبىلىم الدى. ەلباسىنىڭ باستاماسىمەن 2019 جىل جاستار جىلى دەپ بەلگىلەنۋى دە مەملەكەتتىڭ جاستاردى قولداۋعا ەكپىن ءتۇسىرىپ وتىرعانىن ۇقتىرادى.
ەلىمىزدە مەملەكەتتىك كاسىبي اپپارات قۇرۋ, ەسەپ بەرەتىن مەملەكەتتى قالىپتاستىرۋ, زاڭ ۇستەمدىگىن قامتاماسىز ەتۋ سىندى مىندەتتەر جۇزەگە اسىرىلۋدا. بۇل ورايدا حالىق ەلباسى ۇسىنعان «100 ناقتى قادام» ۇلت جوسپارىنىڭ يگىلىگىن كورىپ وتىر. اتالعان سالاداعى شارالار «تسيفرلى قازاقستان» باعدارلاماسى اياسىندا ودان ءارى جاڭاشا سيپاتتا جالعاسىن تاپپاق.
قورىتا ايتقاندا, الەمنىڭ ەڭ دامىعان 30 ەلىنىڭ قاتارىنا قوسىلۋدى ماقسات ەتكەن قازاقستاندا تاۋەلسىزدىك جىلدارىنداعى تابىستارىن ودان ءارى ەسەلەي ءتۇسۋدىڭ بارلىق العىشارتتارى قالىپتاسقان. بۇل ەل تاۋەلسىزدىگىنىڭ باياندىلىعىن, حالقىمىزدىڭ بولاشاعىنىڭ جارقىن ەكەنىن بىلدىرەدى.
جولدىباي بازار,
«ەگەمەن قازاقستان»
