ماسكەۋ بۇل ماسەلەگە قاتىستى تۇبەك ارقىلى وتەتىن كەمە جولىن ەشقاشان جاۋىپ تاستاماعانىن, كىدىرىستەر بايقالعان بولسا, ول «اۋا رايىنىڭ قولايسىزدىعىنان تۋىنداۋى مۇمكىن» ەكەنىن مالىمدەدى.
ىرگەلەس ەكى ەلدىڭ اراسىنداعى قارىم-قاتىناستىڭ بۇرىنعىدان دا شيەلەنىسە ءتۇسۋى قاراشانىڭ 25-ىندە رەسەيلىك اسكەريلەردىڭ ۋكراينانىڭ ءۇش اسكەري كەمەسىن اتقىلاپ, 20 شاقتى تەڭىزشىسىن تۇتقىنعا الۋىنان كەيىن بايقالعان-دى.
بۇل وقيعاعا قاتىستى قوس تاراپ ءبىرىن-ءبىرى كىنالاپ وتىر. ماسكەۋ «كيەۆ ارانداتۋ ماقساتىمەن ءبىزدىڭ تەڭىزدەگى شەكارامىزدى قاساقانا بۇزدى» دەسە, ۋكراينا «بۇل رەسەيدىڭ كەزەكتى باسقىنشىلىق ارەكەتى» دەپ مالىمدەدى.
وسىدان كەيىن ۋكراينانىڭ جوعارعى راداسى پرەزيدەنت پەتر پوروشەنكونىڭ ەلدىڭ جەكەلەگەن وبلىستارىندا وتىز كۇنگە دەيىن سوعىس جاعدايىن ەنگىزۋ تۋرالى جارلىعىن ماقۇلدادى. ال رەسەي تارابى ۇستالعان تەڭىزشىلەرگە شەكارانى زاڭسىز كەسىپ وتكەنى جونىندەگى باپپەن ايىپ تاقتى. مۇنداي باپپەن ايىپتالعاندارعا قولدانىلاتىن جازا – التى جىلعا دەيىن باس بوستاندىعىنان ايىرۋ. سوڭعى مالىمەتتەرگە قاراعاندا, ۋكراينالىق اسكەريلەر ماسكەۋگە جونەلتىلگەن.
رەسەي-ۋكراينا شيەلەنىسى ناتو سىرتقى ىستەر مينيسترلەرىنىڭ كەزدەسۋىندە دە كوتەرىلىپ, اليانستىڭ باس حاتشىسى يەنس ستولتەنبەرگ رەسەيدى ۋكرايندىق تەڭىزشىلەر مەن كەمەلەردى بوساتۋعا, سونداي-اق ازوۆ تەڭىزىندەگى ۋكراينا پورتتارىنا ەركىن جول اشۋعا شاقىرعان-دى. يەنس ستولتەنبەرگتىڭ ايتۋىنشا, وداقتاستار قارا تەڭىزدەگى اسكەري قيمىلدارىن, بۇل اۋدانداعى اۋە باقىلاۋىن كۇشەيتكەن.
قارا تەڭىز بەن ازوۆ توڭىرەگىندە رەسەي مەن ۋكراينا شيەلەنىسىنىڭ شيرىعا تۇسۋىنە ەۋروپالىق وداق تا ايرىقشا الاڭداۋشىلىق بىلدىرۋدە. جوعارىدا اتالعان ناتو جيىنىندا ەۋرووداقتىڭ سىرتقى ساياسات پەن قاۋىپسىزدىك بويىنشا جوعارعى وكىلى فەدەريكا موگەريني «ۋكراينانىڭ تەرريتوريالىق تۇتاستىعى مەن ەگەمەندىگىنە جاڭا قاۋىپ ءتوندى جانە ونىڭ سىرتقى ساۋداسىنا كەدەرگىلەر جاسالدى», دەپ مالىمدەدى. «ازوۆ تەڭىزىندەگى بەلسەندىلىك ەۋرووداققا مۇشە ەلدەردىڭ تۋىن كوتەرگەن كەمەلەردىڭ قوزعالىسىن قاتتى كىدىرتۋدە. بۇل ەكونوميكامىزعا ىقپال ەتەدى», دەدى ول. بۇل رەتتە ۋكراينا ەۋروپالىق وداقتان رەسەيگە قارسى سانكتسيالاردى ودان ءارى كۇشەيتە ءتۇسۋدى ءوتىنىپ وتىر.
رەسەي بيلىگى بولسا, بۇل وقيعانىڭ استارىندا ۋكراينادا الداعى 2019 جىلى وتەتىن پرەزيدەنتتىك سايلاۋ قارساڭىندا ساياسي ۇپاي جيناۋ ماسەلەسى جاتىر, سول ءۇشىن ۇيىمداستىرىلعان ارەكەت دەگەندى كولدەنەڭ تارتىپ وتىر.
ەكى ەل اراسىنداعى بۇرىنعىدان دا سالقىنداي تۇسكەن قارىم-قاتىناس – قازىرگى كۇنى جاھاندىق كۇن تارتىبىندەگى باستى تاقىرىپتاردىڭ ءبىرى. ۋكراينانىڭ سانكتسيالار جونىندەگى وتىنىشىنە قاتىستى ەۋرووداق جاعداي ۋشىعا تۇسسە, ءتيىستى شارالار قولدانۋ جوسپارلانىپ وتىرعانىن مالىمدەدى. بۇل ماسەلە ەۋرووداقتىڭ 10 جەلتوقساندا وتەتىن سامميتىندە تالقىلانباقشى.
قامبار احمەت,
«ەگەمەن قازاقستان»
