فورۋمعا قاتىسۋ ءۇشىن وبلىسقا اتاقتى سپورتشى, وليمپيادا ويىندارىنىڭ چەمپيونى جاقسىلىق ۇشكەمپىروۆ, «مەنىڭ اتامەكەنىم» قوعامدىق بىرلەستىگىنىڭ اتقارۋشى ديرەكتورى ءلاززات شىڭعىسباەۆا كەلدى.
وبلىس اكىمى شاراعا قاتىسۋشىلارعا قاراتا ايتقان سوزىندە اقتوبەلىكتەردى مەملەكەت باسشىسىنىڭ اۋىلدىق اۋماقتاردىڭ الەۋمەتتىك ورتاسىن جاڭعىرتۋ بويىنشا قويعان تاپسىرماسىن جۇزەگە اسىرۋعا بەلسەندى تۇردە ات سالىسۋعا شاقىردى.
- بىردە ءبىر كاسىپكەردىڭ سىرت قالماۋىن سۇرايمىن. قايدان شىققاندارىڭىزدى, كىمنىڭ جانە نەنىڭ ارقاسىندا تابىسقا قول جەتكىزگەندەرىڭىزدى ۇمىتپاڭىزدار. تۇراقتىلىقتىڭ, تۋعان جەردىڭ, حالىقتىڭ, مەملەكەت پەن پرەزيدەنتتىڭ قولداۋى بولماعاندا تابىستى بيزنەس تە بولماس ەدى. ارقاشان وسىنى جادىڭىزدا ۇستاڭىزدار. ءاربىر اقتوبەلىك ەلباسىنىڭ بارلىق الەۋمەتتىك باستامالارىن جۇزەگە اسىرۋ ءۇشىن ءوز ۇلەستەرىن قوسۋلارى كەرەك,-دەپ اتاپ ءوتتى بەردىبەك ساپارباەۆ.
تۋعان اۋىلىنا جاساعان قامقورشىلىق تاجىريبەسىمەن اتاقتى سپورتشى جاقسىلىق ۇشكەمپىروۆ تە ءبولىستى. ول سپورتتىق مانسابى اياقتالعان سوڭ تۋعان جەرى - الماتى وبلىسىنداعى مىڭباەۆ اۋىلىنا بارىپ مال شارۋاشىلىعىمەن اينالىسقان. تابىستى شارۋا تۋعان اۋىلىنىڭ قاجەتتىلىكتەرىن دە ۇمىتقان جوق. جاقسىلىق ۇشكەمپىروۆ ءوز اقشاسىنا 15 شاقىرىمدىق گاز قۇبىرىن, 200-دەن اسا بالا ەركىن جانە گرەك-ريم كۇرەستەرىمەن, دزيۋدومەن جانە بوكسپەن اينالىسىپ جۇرگەن سپورت مەكتەبىن سالدى. ول سونداي-اق اۋىلداستارىنا بالاباقشا, دارىگەرلىك امبۋلاتوريا مەن ەلۋ جاس وتباسى ءۇشىن قول جەتىمدى باسپانا تارتۋ ەتتى. تۋعان اۋىلىنىڭ اۋىل شارۋاشىلىعىن دامىتىپ, ءوز ۇلەسىن قوسقانى ءۇشىن ەلباسى بىلتىر جاقسىلىق ۇشكەمپىروۆكە "قازاقستاننىڭ ەڭبەك ەرى" اتاعىن بەردى.
مەتسەنات: «مۇنىڭ ءبارىن مەن نە ءۇشىن ىستەپ جاتىرمىن؟ مۇنىڭ ءبارىن مەن وزىممەن الىپ كەتپەيمىن. وسىنىڭ ءبارى ءبىزدىڭ ۇرپاقتارىمىز تۋعان جەرىن سۇيەتىن جاقسى ادام بولىپ وسۋلەرى ءۇشىن. تەك ءبىز, قازاقستاندىقتار, ەلىمىزدى مىقتى ءارى تابىستى قىلا الامىز. سول ءۇشىن كۇنى-ءتۇنى ەڭبەكتەنۋىمىز كەرەك. قازاقستاندا نەبارى 5,5 مىڭ اۋىل عانا بار. ەگەر ءاربىر تابىستى كاسىپكەر بەلگىلى ءبىر اۋىلعا قامقورشىلىق جاساسا, ەلىمىز گۇلدەنەتىن بولادى! بۇگىندە قازاقستانداعى 600-گە جۋىق اۋىل اۋقاتتى جەرلەستەرىنىڭ كۋراتورلىعىنىڭ ارقاسىندا قايتا جانداندى. بۇل ءىس جالعاسۋى ءتيىس»,-دەگەن سەنىمدە.
ايتا كەتەيىك, وسى جىلدىڭ باسىنان بەرى اقتوبە وبلىسىندا اۋىلدى قولداۋدىڭ بىرنەشە اۋقىمدى جوبالارى جۇزەگە اسىرىلۋدا. سونىڭ ىشىندە «اۋىل قامقورشىسى» جوباسى بار, ونىڭ اياسىندا كاسىپكەرلەر اۋىلداردى قامقورشىلىققا الۋدا. بۇگىندە بيزنەسمەندەر 1,7 ملرد تەڭگەگە كومەك كورسەتتى. ماسەلەن, «اكتەپ» جشس ديرەكتورى نۇرلان ساعىنالين العاداعى ەكى كوشەنى جارىقتاندىرۋعا, 19 اۋلانى اباتتاندىرۋعا جانە قىرىق ويىن الاڭىن ورناتۋعا 40 ملن تەڭگە اۋداردى. «نەكتار» وك باسشىسى شاميل كاسپرانوۆ 31 ملن تەڭگەگە تامدى اۋىلىنداعى دارىگەرلىك امبۋلاتوريا عيماراتىنا كۇردەلى جوندەۋ جۇرگىزدى. «پاريج كوممۋناسى ءححى» جشس ديرەكتورى گايك تەرتەريان ەسەت باتىردىڭ مەموريالدى كەشەنىن اباتتاندىرۋعا 13 ملن تەڭگە ءبولدى. «جاقيا» قايىرىمدىلىق قورىنىڭ قۇرىلتايشىسى جانبولات سارسەنوۆ ارالتوبە اۋىلىنداعى سپورتتىق جانە ويىن الاڭدارىن سالۋعا, مەكتەپتى ماتەريالدىق-تەحنيكالىق جاعىنان جابدىقتاۋعا 90 ملن تەڭگە ءبولدى.
فورۋمنىڭ قورىتىندىسى بويىشا الەۋمەتتىك ماڭىزدى جوبالاردى وبلىستىڭ 12 اۋدانىنداعى اۋىلداردا جانە اقتوبە قالاسىندا جۇزەگە اسىرۋ تۋرالى مەموراندۋمدارعا قول قويىلدى. اتاپ ايتقاندا مەتسەناتتار قوبدا اۋدانىنىڭ قاراكەمەر اۋىلىنداعى الپىس ورىندىق مەكتەپتىڭ, ايتەكە بي اۋدانىنىڭ قارابۇتاق اۋىلىنداعى جابىق سپورت كەشەنىنىڭ, مارتوك اۋدانىنىڭ حازرەت اۋىلىنداعى دارىگەرلىك امبۋلاتوريانىڭ, شالقار قالاسىنداعى جاستار سارايىنىڭ جانە ت.ب. قۇرىلىسىن قارجىلاندىرۋدى ءوز مىندەتتەرىنە الدى. قول قويىلعان مەموراندۋمداردىڭ جالپى سوماسى - 524 ملن تەڭگە.
بۇدان وزگە, شارا اياسىندا «جومارت جۇرەك» سىيلىعىنىڭ وبلىستىق كەزەڭىنىڭ جەڭىمپازدارى اتانعان وبلىس مەتسەناتتارى ماراپاتتالدى. ولاردىڭ ءبارى دە ءوڭىر تۇرعىندارىنا كومەك كورسەتىپ, وسىندا ءىرى قايىرىمدىلىق جوبالارىن جۇزەگە اسىرعان.
ايتا كەتۋ كەرەك, فورۋم جەرگىلىكتى كاسىپكەر سامات قالدىعۇلوۆتىڭ قاراجاتىنا سالىنعان اۋىل كلۋبىنىڭ جاڭا عيماراتىندا ءوتتى. امانگەلدى اۋىلىنىڭ تۋماسى كلۋب پەن دەمالىس ساياباعىنان تۇراتىن دەمالىس ورتالىعىن جابدىقتاۋعا 118 ملن تەڭگە بولگەن.
«مەن وسى كىشكەنتاي اۋىلدا تۋىپ-ءوستىم. سوندىقتان, پرەزيدەنتىمىزدىڭ ۇندەۋىن ورىنداي وتىرا ماعان اۋىلداستارىم دەمالىپ, بوس ۋاقىتىن ءتيىمدى وتكىزۋلەرى ءۇشىن تۋعان اۋىلىمدا دەمالىس ورتالىعىن اشۋ تۋرالى وي كەلدى. ءبىزدىڭ ەلدە بيزنەستى دامىتۋ ءۇشىن بارلىق جاعداي جاسالعان. وسى جوبا باسقا كاسىپكەرلەر ءۇشىن ۇلگى بولادى جانە ولار دا تۋعان جەرلەرىن دامىتۋ ءۇشىن ءوز ۇلەستەرىن قوسادى دەپ سەنەمىن»,-دەدى س.قالدىعۇلوۆ.
وبلىستا پاتريوت وتانداستاردىڭ قاتىسۋىمەن وسى جىلدىڭ سوڭىنا دەيىن «تۋعان جەرگە تاعزىم» اكتسياسى اياسىندا 3 ملرد-تان استام تەڭگەگە 786 جوبا جۇزەگە اسىرىلماق. اتاپ ايتقاندا, جاڭا الەۋمەتتىك نىساندار سالىنىپ, جولدار مەن كوپىرلەر جوندەلدى, ەلدى مەكەندەر اباتتاندىرىلدى, ءبىلىم بەرۋ نىساندارىنىڭ ماتەريالدىق-تەحنيكالىق بازاسى كۇشەيتىلدى, قايىرىمدىلىق شارالارى وتكىزىلدى.
وڭىردە سونداي-اق «اۋىل – ەل بەسىگى» جوباسىنىڭ ءبىر بولىگى - ء«ار اۋىلعا – ءبىر قامقورشى» اكتسياسى دا بەلسەندى قولداۋ تاپتى. قازىرگى تاڭدا وسى اكتسيا اياسىندا قۇنى 2 ملرد تەڭگە بولاتىن 344 جوبا جۇزەگە اسىرىلدى. 2019 جىلى كاسىپكەرلەردىڭ قولداۋىمەن 218 ەلدى مەكەندە قۇنى 2 ملرد تەڭگەدەن اساتىن تاعى 322 جوبا جۇزەگە اسىرىلاتىن بولادى دەپ جوسپارلانىپ وتىر.
تەمىر قۇسايىن,
«ەگەمەن قازاقستان»
