ەلباسىنىڭ باعدارلامالىق ماقالاسى قوعامنىڭ, عىلىمي ورتانىڭ, شىعارماشىلىق زيالى قاۋىمنىڭ كەڭ اۋقىمدى تالقىلاۋىنا يە بولدى. جالپى, ادامزاتتىق جانە ۇلتتىق تاريحقا جاڭاشا تۇجىرىمدامالىق كوزقاراس قازاقستاننىڭ تاريحىن جانە تاريحي ەسكەرتكىشتەرىن ساقتاۋ مەن دارىپتەۋگە باعىتتالعان جولدى جالعاستىرادى.
القالى باسقوسۋدى قازاقستان ستراتەگيالىق زەرتتەۋلەر ينستيتۋتى ديرەكتورىنىڭ ورىنباسارى سانات كوشكىمباەۆ اشتى. – پرەزيدەنت ءوز ماقالاسىندا تاريحي بەلسەندىلىكتى ەرەكشە اتاپ وتكەن. كەز كەلگەن كەزەڭنىڭ ارتىندا جارقىن بولاشاققا بەت العان ۇلت مۇددەسى تۇرادى. مىنە, سوندىقتان دا پرەزيدەنتىمىز تاريحي مۇددەنى دامىتۋ ارقىلى ۇلتتىق سانانى جاڭعىرتۋدى كوزدەيدى. ياعني ءبىز وتكەنىمىز بەن بولاشاعىمىزدى بايلانىستىرا وتىرىپ, وسىنداي ۇلى دالانىڭ ۇرپاقتارى ەكەنىمىزدى ماقتان تۇتۋىمىز كەرەك. ءبىز تاريحقا قاراپ, ودان جارقىن, شابىتتاندىراتىن جانە وڭ مىسالدار تابۋىمىز كەرەك, – دەدى ول.
سونداي-اق ءال-فارابي اتىنداعى قازاق ۇلتتىق ۋنيۆەرسيتەتىنىڭ ارحەولوگيا جانە دالا وركەنيەتى عىلىمي-زەرتتەۋ ينستيتۋتىنىڭ ديرەكتورى ۆيكتور زايبەرت بايانداما جاسادى. ونىڭ ايتۋىنشا, مەملەكەت باسشىسى « ۇلى دالانىڭ جەتى قىرى» اتتى ماقالاسىندا ءبىر جاعىنان وتاندىق عىلىمنىڭ جەتىستىگى مەن قوعامنىڭ دامۋىن اتاپ وتكەن بولسا, ەكىنشى جاعىنان ەلىمىزدىڭ بولاشاعىنا فيلوسوفيالىق كوزقاراستاردىڭ كەڭ ارناسىن سالىپ بەرىپ وتىر. «جالپى, ەلباسى ايتقان ۇلى دالا جۇيەسى الەمگە كوپتەگەن جاڭالىقتى بەردى. ۇلى دالا ءحVىىى-حح عاسىرلاردا تاريحشىلار جازعانداي وتپەلى ءدالىز عانا ەمەس, ەۋرازيانىڭ بۇكىل اۋماعىندا يگى يننوۆاتسيالار تۋدىرعان وركەنيەت وشاعى بولدى. ەجەلگى زەرتتەۋلەر كورسەتكەندەي, ۇلى دالادا وركەنيەت پەن ۇدەرىستىڭ دەڭگەيى تەك ماتەريالدىق بازا كوزىمەن عانا ەمەس, ەڭ الدىمەن رۋحاني الەم جانە الەۋمەتتىك-ساياسي باعدارلارىمەن ەرەكشەلەنەدى. تاريحي دامۋدىڭ بولاشاعىندا ونىڭ ءجۇرىپ وتكەن مىڭداعان تەرەڭ قاباتتارى جاتىر», دەيدى تاريحشى ۆ.زايبەرت.
دوڭگەلەك ۇستەل بارىسىندا ۇلى دالانى جۇيەلى قاراستىرۋعا قاجەتتى نەگىزگى يمپەراتيۆتەر, الەمدىك ۇدەرىستەردەگى قازاقستاننىڭ ءرولىن قايتا قاراستىرۋ سياقتى كۇردەلى ماسەلەلەر ءسوز بولىپ, ناقتى جوبالار مەن باعدارلامالار تالقىلاندى.
ميراس اسان,
«ەگەمەن قازاقستان»
