بيىلعى ماۋسىمدا الماتىلىقتار ءۇشىن العاش ەسىگىن اشقان الىپ سىرعاناۋ الاڭى اتاكەنت كورمە ورتالىعىنىڭ ىرگەسىنەن ورىن تەپكەن. تاۋلىك بويى ۇزدىكسىز جۇمىس ىستەيتىن سىرعاناۋ الاڭىنا سالاماتتى ءومىر سالتىن ۇستاناتىن قالا تۇرعىندارى مەن مەگاپوليس قوناقتارى قالاعان ۋاقىتىندا كەلىپ اقىسىز سىرعاناق تەۋىپ سەرگىپ قايتا الادى. ءتىپتى مۇنداعى ارناۋلى نۇسقاۋشىلار, كەلۋشىلەرگە تەگىن كەڭەس بەرىپ قىزمەت كورسەتەدى. الداعى كۇندەرى قالانىڭ 10-نان استام نۇكتەسىندە ورنالاسقان مۇنداي ورىندار الماتىلىقتارعا قۇشاق اشاتىن بولادى.
جوعارىدا ايتقانىمىزداي تاۋلىك بويى جۇمىس ىستەيتىن سىرعاناۋ ورىندارى بارلىق كەلۋشىلەر ءۇشىن اقىسىز. تەك دەمالۋشىلار وزىمەن بىرگە كونكيلەرىن الا كەلۋى ءتيىس. سونداي-اق سىرعاناۋ الاڭدارىنىڭ ماڭىندا تاماقتانۋعا ارنالعان ارناۋلى ورىندار مەن كونكيلەردى جالعا بەرۋ ورتالىقتارى جۇمىس ىستەيدى. ۇيىمداستىرۋشىلار ولاردىڭ باعالارى بۇقارا حالىققا قول جەتىمدى بولۋى ءاردايىم قاداعالانىپ وتىراتىنىن ايتادى.
سىرعاناۋ الاڭقايلارىنىڭ بارلىعى زاماناۋي ستاندارتتارعا ساي جاڭا تەحنولوگيالاردىڭ كومەگىمەن جاسالادى. ەڭ باستىسى الماتىنىڭ مىڭ قۇبىلعان اۋا-رايىنا ورايلاستىرىلعان. مۇز الاڭدارى كۇن رايى قالاي بولعانىنا قاراماستان, ءتىپتى 10 گرادۋس جىلى بولسا دا ەرىمەي قاتىپ تۇرا بەرەدى. ياعني, الاڭداردىڭ ارناۋلى توڭازىتقىش قۇرالى مۇزدى ەرىتپەۋگە قولايلى تەمپەراتۋرانى قامتاماسىز ەتە الادى. قالا جۇرتشىلىعىنا قۋانىش سىيلاعان الەۋمەتتىك جوبانى جۇزەگە اسىرۋعا قالا اكىمدىگى مۇرىندىق بولىپ وتىر.
– سىرعاناق تەبۋ ساناڭدى سەرگىتىپ, دەنەڭدى جاتتىقتىرۋدىڭ ەڭ ءتيىمدى ءتاسىلى عوي. ويىن-ساۋىق ورتالىقتارىنداعى مۇز ايدىندارىنا بارعاندا بىراز شىعىندالاتىنبىز. بىلتىردان بەرى وسى تەگىڭ سىرعاناۋ الاڭدارىنا كەلەتىن بولدىق. بۇل دا قاراپايىم تۇرعىندار مەن ستۋدەنت جاستارعا جاسالعان ۇلكەن كومەك دەپ ەسەپتەيمىن, – دەيدى قالا تۇرعىنى بەكزات نۇرىمەتوۆ.
سىرعاناق الاڭدارىنىڭ ەسىگى كوكتەمنىڭ العاشقى ايىنا دەيىن ايقارا اشىق. جولىڭىز ءتۇسىپ ارۋ الماتىعا كەلە قالساڭىز, الاتاۋدان ەسكەن سالقىن سامالمەن تىنىستاپ, سىرعاناق تەۋىپ سەرگىپ قايتۋدى ۇمىتپاڭىز, وقىرمان!
ارمان وكتيابر,
«ەگەمەن قازاقستان»
الماتى
