بۇگىندە ىلە اۋدانىندا 3000-نان استام مۇگەدەكتەر تىركەلگەن. ولاردىڭ نەگىزگى تابىسى مەملەكەتتىك الەۋمەتتىك قامسىزداندىرۋ ەسەبىنەن جۇزەگە اسادى. وسىنداي مۇمكىندىگى شەكتەۋلى ادامدارعا كومەك كورسەتۋ جانە ولاردى الەۋمەتتەندىرۋ ماقساتىندا ىلە اۋدانىندا كاسىپتىك شارالار تۇراقتى جۇزەگە اسىپ كەلەدى. وسى ورايدا «فيليپ مورريس قازاقستان» كومپانياسى (فمق) مەن «پروگرەسس» پوليتەحنيكالىق كوللەدجىنىڭ بىرلەسكەن جوباسىن ەرەكشە اتاپ وتۋگە بولادى. مۇنداعى ماقسات وسى ساناتتاعى ازاماتتارعا ەڭبەك نارىعىندا باسەكەگە قابىلەتتى بولۋعا, ءوزىنىڭ ءال-اۋقاتىن ارتتىرۋعا جانە قارجىلىق تاۋەلسىزدىككە قول جەتكىزۋگە مۇمكىندىك بەرۋ.
جوبا اياسىندا مۇگەدەك جانداردى ءتۇرلى ماماندىقتارعا وقىتۋ باعدارلامالارى جۇزەگە اسۋدا. قازىرگى كەزدە ەرەكشە قاجەتتىلىكتەرى بار 30 ازاماتقا تىگىنشى, ناۋبايشى, اسپازشى, ماسساج مامانى, اياق كيىم تىگۋ شەبەرى, سابىن قايناتۋ شەبەرى, كومپيۋتەرلىك ساۋاتتىلىقتى يگەرۋ بويىنشا دارىستەر جۇرگىزىلۋدە. كاسىبي وقىتۋمەن قاتار ءبىلىم الۋشىلار ءۇشىن اقپارات جانە تاجىريبە الماسۋ, شاعىن بيزنەستى دامىتۋ جانە باسقا دا قىزىقتى كلۋبتار جۇمىسى جولعا قويىلعان.
«پروگرەسس» پوليتەحنيكالىق كوللەدجىنىڭ ديرەكتورى جاننا تەلپەكباەۆانىڭ ايتۋىنشا, مۇنداي جوبالار مۇگەدەكتەرگە قوعامنىڭ تولىققاندى مۇشەسى بولۋعا, ءوز جولىن تابۋعا جانە پايدالى ءارى قارجىلاي تاۋەلسىز بولۋعا مۇمكىندىك بەرەدى.
وسىنداي جوبالار جۇزەگە اسقان 8 جىل ىشىندە «فيليپ مورريس قازاقستان» كومپانياسى 40 ميلليون تەڭگەگە جۋىق قارجى بولگەن. بۇل قاراجات مۇمكىندىگى شەكتەۋلى ادامداردى ءتۇرلى ماماندىقتارعا وقىتۋعا, مۇعالىمدەردىڭ جالاقىسىنا, كۋرستى وقىتۋعا ارنالعان ماتەريالداردى الۋعا باعىتتالۋدا. وسى جىلداردا 240 ادام وقىتىلىپ, ولار بۇگىندە قوعامنىڭ ءتۇرلى سالاسىندا بەلسەندى ەڭبەك ەتىپ كەلەدى.
تاراتا ايتىپ وتەتىن بولساق, ولاردىڭ 60-ى «مەگا» جانە «سپۋتنيك» ساۋدا-ويىن-ساۋىق ورتالىقتارىنداعى كيىم جانە اياق كيىم جوندەۋ شەبەرحاناسىنا, الماتى قالاسىنىڭ ەستۋ قابىلەتى بۇزىلعان ادامدارعا ارنالعان وندىرىستىك بىرلەستىگىنە, كيىم جانە ارنايى كيىم تىگۋ كومپانيالارىنا جۇمىسقا ورنالاسسا, 40 ادام جەكە كاسىپ سالاسىندا ەڭبەك ەتۋدە. «پروگرەسس» پوليتەحنيكالىق كوللەدجىندە تىگىن شەبەرحاناسىندا قىزمەت ەتەتىن 10 ادام ءوز ونىمدەرىن ءوندىرىپ, ىلە اۋدانىندا ۇيىمداستىرىلعان جارمەڭكەلەردە ساتۋعا مۇمكىندىگى بار. ال 7-ءۋى ساڭىراۋقۇلاق وسىرۋگە ماشىقتانعان. ساڭىراۋقۇلاقتاردى ءوسىرۋ, ساقتاۋ جانە وتكىزۋ جولدارى مەن ادىستەرىن ۇيرەنۋدە ازىق-ت ۇلىك داقىلدارىن ءوسىرۋ سالاسىنداعى عىلىمي مەكەمەلەردىڭ كومەگى زور. سونداي-اق 10 ادام نان-توقاش ونىمدەرىنە جەكە تاپسىرىس السا, 20 ادام «اتامەكەن» ۇكپ وقىتۋ باعدارلاماسى ارقىلى ءوز بيزنەسىن ۇيىمداستىرۋ بويىنشا بىلىكتىلىگىن ارتتىردى.
ەلۆيرا سەرىكقىزى,
«ەگەمەن قازاقستان»
