اكادەميانىڭ ءباسپاسوز ورتالىعىنان حابارلاعانىنداي, پولشانىڭ فريدەريك شوپەن اتىنداعى اۋەجايدا دومبىرا, قوبىز جانە جەتىگەن ءبىر ۋاقىتتا كۇي وينادى. ەرەكشە اۋەنگە قۇلاق تۇرگەن جولاۋشىلار قازاق ونەرىنە ءتانتى بولىپ, ۇلكەن قوشەمەت كورەسەتتى. اكادەميا ستۋدەنتتەرىنىڭ مىڭ بۇرالعان اسەم بيلەرى دە كورەرمەندىڭ ىستىق ىقىلاسىنا ءبولىندى. اۋەجايداعى ەستەن كەتپەس كونتسەرتتى جۇرگەنوۆ اتىنداعى ۇلتتىق ونەر اكادەمياسىنىڭ مۋزىكانتتارى قويدى. بۇل ولاردىڭ قازاقستاننىڭ تۇڭعىش پرەزيدەنتى كۇنىنە وراي شەتەلدىكتەرگە جاساعان توسىنسىيى بولدى.
پولياك كورەرمەنى حاننا «ماعان مۋزىكا مەن بي وتە قاتتى ۇنادى. ءسىزدىڭ ەلدىڭ مادەنيەتى مەن مۋزىكاسى ادەمى. قازاقستاندا بولعان ەمەسپىن. بىراق ونداي مۇمكىندىك تۋىپ جاتسا, قۋانا-قۋانا بارامىن» دەگەن لەبىزىن ءبىلدىردى.
سونداي-اق «الاتاۋ» فولكلورلىق ءانسامبلى ۆارشاۆاداعى قازاقستان ەلشىلىگىنىڭ ۇيىمداستىرۋىمەن بولعان سالتاناتتى جيىندا حالقىمىزدىڭ اندەرى مەن كۇيلەرىن, ەۋروپا ەلدەرىنىڭ كلاسسيكالىق شىعارمالارىن ورىندادى. مەرەكەلىك-مادەني كوش ۆارشاۆا ساپارىنان پراگا قالاسىندا جالعاسىپ, ارتىنشا 5 جەلتوقسان كۇنى بۋداپەشتتە ءوز مارەسىنە جەتەدى.
ەلۆيرا سەرىكقىزى,
«ەگەمەن قازاقستان»
الماتى
