IT-تەحنولوگيالارمەن جابدىقتالعان جاڭا نىسان پايدالانۋعا بەرىلگەلى روبوتوتەحنيكا, بيوتەحنولوگيا, مەحاترونيكا, 3D پروتوتيپتەۋدىڭ, تاعى باسقا زاماناۋي سالالاردىڭ ورتالىعىنا اينالىپ ۇلگىردى. مۇندا قوسىمشا ءبىلىم بەرۋدىڭ سوڭعى ۇلگىدەگى عىلىمي جەتىستىكتەرى دە توپتاستىرىلعان. 1800 وقۋشى ءبىر مەزەتتە 80-گە جۋىق ۇيىرمەلەرگە قاتىسا الادى. قازاقستان مەن رەسەي اراسىنداعى حY وڭىرارالىق ىنتىماقتاستىق فورۋمى وسىندا ۇيىمداستىرىلىپ, العاشقى سىناق «جاقسى» دەگەن باعاعا يە بولدى.
روبو-فەستيۆالعا ەلىمىزدىڭ بارلىق ايماقتارىنان, سونداي-اق قىرعىزستاننان, وزبەكستاننان جانە رەسەيدەن 10-21 جاس ارالىعىنداعى 250-گە جۋىق جاس روبوت جاساۋشىلار جينالىپ, ءوزارا ءبىلىم سىناستى.
شارانىڭ اشىلۋ سالتاناتىندا سويلەگەن سوزىندە ايماق باسشىسى قۇمار اقساقالوۆ ەلباسى جاس بۋىن الدىنا وزىق ۇلگىدەگى تەحنولوگيالاردى كەڭىنەن مەڭگەرۋ مىندەتىن قويعانىن, كەلەشەكتەگى دامۋ جولىمىزدى تابيعي رەسۋرستار ەمەس, زامانعا ساي كەمەل ءبىلىم ايقىندايتىنىن ايتا كەلىپ, فەستيۆالعا قاتىسۋشىلارعا تابىس تىلەدى. «روبوتيكس» فەدەراتسياسىنىڭ پرەزيدەنتى ايجان جاكەەۆا شارا ماقساتى قازاقستاندا سپورتتىق روبوتوتەحنيكاعا دەگەن قىزىعۋشىلىقتى ارتتىرۋ بولىپ تابىلاتىنىن, روبوتوتەحنيكا ءبىلىم بەرۋ جۇيەسىنە جەكە ءپان رەتىندە ەنگىزىلگەنىن جەتكىزدى.
بالالار جاساعان روبوتتار ۇلكەن جانە كىشى بياتلون, شاعىن روبو سۋمو, جىلجىمالى روبو سۋمو, لابيرينت, بياتلون, ەستافەتا تۇرلەرى بويىنشا سايىسقا ءتۇسىپ, كوپ ۇپاي جيناۋعا ۇمتىلدى. قىرعىزستاننان كەلگەن وكىل يليا فومين اكەلگەن روبوت ماشينا لەگو-لابيرينت ويىنىندا ءتاپ-ءتاۋىر ونەر كورسەتتى. تۇركىستاندىق الماس اۋدابەكوۆتىڭ دە روبوت قۇراستىرۋدا تاجىريبەسى قالىپتاسىپ قالعانى اڭعارىلادى. رەسەيدىڭ چەليابى قالاسىنان كەلگەن ميحايل يۆانوۆ ەستافەتادا, ال باتىسقازاقستاندىق نۇرعالي حاتەپ بىرنەشە ءتۇرى بويىنشا باق سىناۋدى ءجون كورىپتى.
بىلتىر اقتوبەدە وتكەن چەمپيوناتتا قاراعاندىلىق جاس ورەندەر دەس بەرمەسە بۇل جولى دا ەڭ مىقتى ەكەنىن تانىتىپ, وبلىس اكىمى تىككەن باس جۇلدەنى جەڭىپ الدى. ەكىنشى, ءۇشىنشى ورىنداردى اتىراۋ مەن باتىس قازاقستان وبىستارىنىڭ وكىلدەرى ءبولىستى. جەكەلەگەن اتالىمدار بويىنشا دا ۇزدىكتەر انىقتالىپ, سىي-سياپاتتار كورسەتىلدى.
فەدەراتسيانىڭ پيلوتتىق باعدارلامالارى اياسىندا تەحنيكالىق شىعارماشىلىق ارقىلى بالالاردى بەيىمدەۋ جانە الەۋمەتتىك وڭالتۋ, مەكتەپكە دەيىنگى روبوتەحنيكا تاجىريبەلەرى ۇلگى ەتىلدى. شەبەرلىك سىنىپتارى وتكىزىلدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
