ەلباسى ءىس-شارا باستالماس بۇرىن اسكەري-پاتريوتتىق ورتالىق مۋزەيىنىڭ ەكسپوزيتسيالارىمەن تانىستى. وندا قازاقستان ارمياسىنا ارنالعان اسكەري سۋرەتشىلەر ستۋدياسىنىڭ تۋىندىلارى مەن «وربۇلاق شايقاسىنىڭ» ديوراماسى قويىلعان. سونىمەن قاتار ەلباسى 3D-mapping شوۋ تەحنولوگياسى بويىنشا ۇيىمداستىرىلعان كورمەنى تاماشالادى.
قازاقستان پرەزيدەنتى الدىمەن شاراعا قاتىسۋشىلاردى وسكەلەڭ ۇرپاقتى وتانشىلدىققا تاربيەلەيتىن «جاس سارباز» قوزعالىسىنىڭ قۇرىلۋىمەن قۇتتىقتادى. مەملەكەت باسشىسى ۇلتتىق رۋحتى قالىپتاستىرىپ, ەل تاريحىن تەرەڭ زەرتتەۋدىڭ ماڭىزدىلىعىن ايرىقشا اتاپ ءوتتى.
– جاقىندا جاريالانعان جولداۋداعى ماڭىزدى ماسەلەلەردىڭ ءبىرى – پاتريوتتىق تاربيە بەرۋ ءىسى. ەگەر ءبىز وتانىمىزدى قورعاي الماساق, وندا تاۋەلسىزدىكتىڭ 27 جىلى ىشىندە اتقارعان بارلىق جۇمىسىمىزدىڭ ءمانى جوعالادى, – دەدى نۇرسۇلتان نازارباەۆ.
ەلباسى بۇگىندە مەملەكەت تاراپىنان اتقارىلىپ جاتقان شارالاردىڭ ءبارى كەلەر ۇرپاق ءۇشىن جاقسى جاعداي جاساۋعا باعىتتالعانىن ايتتى.
– وسىنىڭ ءبارى جاستارىمىز – ءبىزدىڭ بولاشاعىمىز ءۇشىن. اتقارىلىپ جاتقان جۇمىستار سىزدەردىڭ ومىرلەرىڭىزدى ودان سايىن جاقسارتىپ, قازاقستانىمىزدى ودان ءارى بايىتا ءتۇسۋ ءۇشىن جاسالۋدا, – دەدى مەملەكەت باسشىسى. نۇرسۇلتان نازارباەۆ ەلىمىزدەگى جاس بۋىندى «جاس سارباز» قوزعالىسى مۇشەسىنىڭ قاتارىنا قوسىلۋعا شاقىردى.
– «جاس سارباز» قوزعالىسى ەلىمىزدىڭ بارلىق وڭىرىندە قۇرىلۋى ءتيىس. ەلىمىزدەگى جاستار وسى قوزعالىستىڭ قاتارىنان تابىلۋى قاجەت. سوندىقتان دەنە شىنىقتىرۋمەن اينالىسىپ, اسكەري ماماندىقتاردى يگەرگەن ءجون. بۇل قوزعالىس قورعانىس مينيسترلىگىمەن بىرلەسىپ, پاتريوتتار تاربيەلەۋ ىسىنە بەلسەندى اتسالىسۋى كەرەك. سوندا عانا سىزدەر ءوز حالقىڭىزدىڭ تىرەگىنە اينالاسىزدار, – دەدى قازاقستان پرەزيدەنتى. مەملەكەت باسشىسى « ۇلى دالانىڭ جەتى قىرى» اتتى ماقالانىڭ قازاقستاندىق ءپاتريوتيزمدى كۇشەيتۋ ىسىندەگى ەرەكشە ماڭىزى بارىن اتاپ ءوتتى. سونىمەن قاتار قازاقستان قوعامىنىڭ گۇلدەنۋى ءۇشىن تۇراقتىلىق پەن ۇلتارالىق كەلىسىمدى ساقتاۋدىڭ ماڭىزدىلىعىنا توقتالدى.
– ەلىمىزدە كوپتەگەن ەتنوس وكىلدەرى تۇرادى. ءبىز ءبارىمىز دە – قازاقستان ازاماتتارىمىز. باي تاريحىمىزدىڭ ارقاسىندا توزىمدىلىك پەن قۇرمەتتەۋدى بويىمىزعا سىڭىردىك. بۇل قۇندىلىقتار قازاقستاندى بىرىكتىرەدى, مەملەكەتتى قۋاتتى جانە سىيلى مەملەكەتكە اينالدىرادى. سوندىقتان وتانىمىزدىڭ پاتريوتى بولۋ – بارشامىزدىڭ پارىزىمىز, – دەدى ەلباسى. ءسوز سوڭىندا مەملەكەت باسشىسى بارلىق قاتىسۋشىلارعا تابىس پەن جاڭا جەتىستىكتەر تىلەدى.
كەزدەسۋ بارىسىندا جاس ساربازدار مەملەكەت باسشىسىنا «جاس ساربازدىڭ» قۇرمەتتى توراعاسى» كۋالىگىن, توسبەلگىسى مەن ارنايى كيىمىن تابىستادى.
وسىدان ءۇش جىل بۇرىن ءدال وسى كۇنى مەملەكەت باسشىسى – قازاقستان رەسپۋبليكاسى قارۋلى كۇشتەرىنىڭ مادەني وشاعى − ۇلتتىق اسكەري-پاتريوتتىق ورتالىقتى سالتاناتتى تۇردە اشقان بولاتىن. سالتاناتتى جيىندا «جاس سارباز» بالالار مەن جاسوسپىرىمدەر اسكەري-پاتريوتتىق قوزعالىسى» رەسپۋبليكالىق قوعامدىق بىرلەستىگىنىڭ جۇمىسى باياندالىپ, قوزعالىستىڭ وڭىرلەردەگى فيليالدارى ءوز جۇمىسىن باستادى. سونىمەن قاتار قوزعالىس تاربيەلەنۋشىلەرىنىڭ جاڭا كيىم ۇلگىسى تانىستىرىلدى.
بۇگىندە «جاس سارباز» بالالار مەن جاسوسپىرىمدەر اسكەري-پاتريوتتىق قوزعالىسى» رەسپۋبليكالىق قوعامدىق بىرلەستىگىندە 2828-گە جۋىق اسكەري-پاتريوتتىق كلۋب پەن سىنىپتار بار. وندا 73 164 بالا قامتىلعان. اتالعان ورتالىقتا سوڭعى ەكى جىل ىشىندە اسكەري-پاتريوتتىق تاربيەلەۋ بويىنشا 992 ءىس-شارا وتكىزىلگەن. ونىڭ ىشىندە جىل سايىن «ايبىن» رەسپۋبليكالىق اسكەري-پاتريوتتىق جاستار جيىنى دا بار. بىلتىردان باستاپ اتالعان شارا حالىقارالىق دارەجەدە ۇيىمداستىرىلىپ كەلەدى.
سالتاناتتى شارادا ءسوز العان اعا لەيتەنانت مەيىربەك مەڭدىعاليەۆ: مەملەكەت باسشىسىنىڭ تاپسىرماسى بويىنشا بالالار مەن جاسوسپىرىمدەر اسكەري-پاتريوتتىق قوزعالىسى» قوعامدىق بىرلەستىگى قۇرىلدى. الداعى ۋاقىتتا رەسپۋبليكا بويىنشا «جاس ساربازدىڭ» جاڭا سىنىپتارى مەن اسكەري-پاتريوتتىق كلۋبتارى اشىلادى. ءبىزدىڭ ماقساتىمىز – ءتول تاريحىن بىلەتىن, بۇگىنىن باعالايتىن, تاۋەلسىزدىگىمىزدى كوزىنىڭ قاراشىعىنداي ساقتايتىن ۇلاعاتتى جاس ورەندى تاربيەلەۋ», دەدى. ال استانا قالاسىنداعى 66-شى مەكتەپ-ليتسەيىنىڭ 11-سىنىپ وقۋشىسى دانيار بەكەتوۆ زامانداستارىنىڭ تەك ءبىلىم, عىلىم, يننوۆاتسيا سالالارىن مەڭگەرىپ قانا قويماي, ءوز ۇلتىنىڭ مادەنيەتى مەن ءتول تاريحىن بىلۋگە ۇمتىلاتىنىن جەتكىزدى. ء«وز وتانىمىزدى قورعايتىن جىگەرلى, ءبىلىمدى سارباز بولۋدى ماقسات ەتەمىز. قاتارلاستارىمىزدى سپورتپەن شۇعىلدانۋعا, ۇلتتىق تانىم كوكجيەگىن كەڭەيتۋگە شاقىرامىز», دەدى ول.
قازاقستان رەسپۋبليكاسى تۇڭعىش پرەزيدەنتى كۇنى قارساڭىندا ۇيىمداستىرىلعان كەزدەسۋدە جاس ساربازدار شاعىن كونتسەرت ۇيىمداستىرىپ, جەتكەن جەتىستىكتەرىمەن ءبولىستى.
ەركەجان ايتقازى,
«ەگەمەن قازاقستان»
