جىر كەشىنىڭ باستى ماقساتى – ەلباسىمىز جايلى جازىلعان اۆتورلىق ولەڭدەردى ەلگە تانىتۋمەن قاتار قازاق اقىن-جازۋشىلارى, سونداي-اق الەم قالامگەرلەرىنىڭ شىعارمالارىن جاستار اراسىندا ناسيحاتتاۋ.
ءىس-شاراعا الماتى قالاسىنىڭ 10-نان استام جوعارعى وقۋ ورىندارىنىڭ ستۋدەنتتەرى قاتىسىپ, جۇزدەن جۇيرىكتەر انىقتالدى. ەلباسى جايلى ولەڭدەرمەن شىمىلدىعىن اشقان جىر كەشى مۇقاعالي ماقاتاەۆ, مۇحتار شاحانوۆ, تاعى باسقا قالامگەرلەردىڭ شىعارمالارىنان ءۇزىندى وقۋمەن جالعاسىن تاپتى.
قازىلار القاسىنىڭ شەشىمىمەن جوعارعى ۇپاي جيناعان, «داۋىس مانەرى», «ساحنا شەبەرلىگى» جانە «ارتىستىك ونەرى» بويىنشا جاقسى كورسەتكىشتەرگە جەتكەن جاستار باعالى سىيلىقتار مەن اقشالاي جۇلدەلەرگە يە بولدى.
قاتىسۋشى ستۋدەنتتەردىڭ پىكىرىنشە, بۇل كۇنگى كورسەتكەن ونەرلەرى ۇلكەن اۋديتوريانىڭ, قالىڭ كوپشىلىكتىڭ الدىنا شىققان ءبىرىنشى تاجىريبەلەرى. ءىس-شارا جاستاردىڭ ۇلكەن ساحنادا وزدەرىن ەركىن ۇستاپ, ەرەكشە جىرلار وقۋىنا مۇمكىندىك بەردى.
«جىل سايىن ءوتىپ تۇراتىن بۇل شارانىڭ اۋقىمى كەڭەيىپ كەلەدى. ەڭ العاش, بەس جىل بۇرىن ۇيىمداستىرىلعان جىر كەشىنە تەك ەكى جوعارعى وقۋ ورنىنان 10 ستۋدەنت قاتىسقان بولسا, ەندى, مىنە بەس جىلدان كەيىن ۇلكەن ساحناعا 10-نان اسا جوعارعى وقۋ ورنىنان 60-تان استام ۇمىتكەر قاتىسىپ وتىر. بۇل ۇلكەن جەتىستىك», - دەپ اتاپ ءوتتى «رۋحاني جاڭعىرۋ -قازككا» جوبالىق كەڭسەسىنىڭ جەتەكشىسى اقىلبەك بەدەلحان ۇلى.
ءىس- شارانىڭ سوڭىندا ەلباسىنىڭ سۇيىكتى اندەرى شىرقالىپ, مەرەكەلىك ءىس-شارا كونتسەرتتىك باعدارلاماعا ۇلاستى.
مەملەكەتتىك ءتىلدى دامىتۋ ينستيتۋتىنىڭ ماماندارى, قازاقستان جازۋشىلار وداعىنىڭ مۇشەلەرى, الماتى قالاسىنىڭ جوعارعى وقۋ ورىندارىنىڭ وقىتۋشىلارى مەن ستۋدەنتتەرى, قازككا ارداگەرلەرى قاتىسقان جىر كەشى اياسىندا «رۋحاني جاڭعىرۋ» باعدارلاماسىنىڭ جۇزەگە اسىرىلۋى, وعان جوو ستۋدەنتتەرى مەن الماتى قالاسىنىڭ جاستارىنىڭ قوسقان ۇلەسى, جوو-دا قۇرىلعان «رۋحاني جاڭعىرۋ» جوبالىق كەڭسەلەرىنىڭ جۇمىستارىمەن تانىسۋ, تاجىريبە الماسۋ جانە جاستاردىڭ باعدارلاما جايلى وي-پىكىرلەرىن ءبىلۋ, ت.ب. ماسەلەلەر قاراستىرىلىپ, ساراپشىلار پىكىرلەرى تىڭدالدى.
ەلۆيرا سەرىكقىزى,
«ەگەمەن قازاقستان»
الماتى
