بىزگە بەيمالىم «امانگەلدى» رومانى
ول جارىققا شىقپاي قالسا دا كلاسسيكتەردەن جاقسى باعا العان ەدى
الدىمەن, كەزىندە مەملەكەتتىك باسپادان شىعارۋدىڭ ءساتى تۇسپەگەن «امانگەلدى» رومانىنىڭ اۆتورى تۋرالى از عانا مالىمەت بەرە كەتەيىك. باقىت يمانوۆ – امانگەلدى يمانوۆتىڭ نەمەرە ءىنىسى. دالىرەك ايتساق, يماننىڭ ۇلكەن ۇلى بالىقتان تۋعان كوشىمبەكتەن – بايەگىز, ودان – باقىت. ال يماننىڭ ەكىنشى ۇلى ۇدەربايدان امانگەلدى ومىرگە كەلگەنى جالپاق جۇرتقا بەلگىلى عوي. باقىت يمانوۆ 1914 جىلى تۋىپ, 1975 جىلى قايتىس بولعان.
ول جارىققا شىقپاي قالسا دا كلاسسيكتەردەن جاقسى باعا العان ەدى
الدىمەن, كەزىندە مەملەكەتتىك باسپادان شىعارۋدىڭ ءساتى تۇسپەگەن «امانگەلدى» رومانىنىڭ اۆتورى تۋرالى از عانا مالىمەت بەرە كەتەيىك. باقىت يمانوۆ – امانگەلدى يمانوۆتىڭ نەمەرە ءىنىسى. دالىرەك ايتساق, يماننىڭ ۇلكەن ۇلى بالىقتان تۋعان كوشىمبەكتەن – بايەگىز, ودان – باقىت. ال يماننىڭ ەكىنشى ۇلى ۇدەربايدان امانگەلدى ومىرگە كەلگەنى جالپاق جۇرتقا بەلگىلى عوي. باقىت يمانوۆ 1914 جىلى تۋىپ, 1975 جىلى قايتىس بولعان.
باقىت 40-جىلداردىڭ باسىندا قازاق جۋرناليستيكا ينستيتۋتىنىڭ (كيج) 2 كۋرسىن ءتامامداپ, العاشقى كاسىبي مامان رەتىندە تۋعان جەرى – باتپاققارا (بۇگىنگى قوستاناي وبلىسىنىڭ امانگەلدى اۋدانى) وڭىرىندە وسى سالادا جەمىستى ەڭبەك ەتكەن. كەيىن اۋداندىق «سوتسياليستىك شارۋا» گازەتىنىڭ رەداكتورى بولىپ ءجۇرگەندە ول تالاپتى جاستاردى جازۋعا باۋلي ءبىلىپتى. بۇل قامقورلىعىنىڭ زايا كەتپەگەنىن مىنا مىسالدان اڭعارامىز. قازاق ءباسپاسوزىنىڭ بەلدى تۇلعالارى تولەۋباي ىدىرىسوۆ پەن ساپابەك ءاسىپ, جۋرناليستيكادا ءوزىندىك قولتاڭبالارىن قالىپتاستىرعان قايىرجان ەلەشوۆ پەن ءمۇسىلىم دوسماعانبەتوۆ, بوگەتباي الماعانبەت جانە باسقالار باقىتتىڭ ءۇمىت ەتكەن شاكىرتتەرى بولعان. بۇلاردىڭ قاي-قايسىسى دا ۇستاز سەنىمىن ناقتى ىستەرىمەن اقتاي بىلگەن قالام جورعالارى ەكەندىگىن ايتقان ءلازىم.
امانگەلدى باتىردىڭ ەكىنشى ۇلى ءشارىپ يمانوۆ «اتانىڭ اسىل مۇراسى» دەگەن ەستەلىگىندە («باتىردىڭ بيىك تۇلعاسى», 1986 ج., الماتى, «قازاقستان» باسپاسى) بىلاي جازادى: «باقىت يمانوۆ جازۋ عانا ەمەس, اۋىزەكى اڭگىمەگە شەبەر, وتكەن-كەتكەن اتالار شەجىرەسىن كوپ بىلەتىن, ءسوز ۇستاعان كىسى بولاتىن. امانگەلدى شەجىرەسىن جان بىتكەننەن قىزعانىپ, جان ادامعا جاريا ەتپەي, جاسىرىن ۇستاعانى دا سوندىقتان بولار.
اكەمنىڭ شەجىرە-تىزبەسىنەن كوز جازىپ قالعان مەن 1953 جىلى سەمياممەن دەمالىسقا ەلگە بارعاندا قولجازبانىڭ ۇلكەن ءبىر ءبولىمىنىڭ باقىت يمانوۆتىڭ قولىندا ەكەنىن ەستىدىم دە, قويار دا قويماي الماتىعا الىپ قايتتىم».
باقىت شىعارماشىلىعىنىڭ شىڭى دەپ, ونىڭ قالامىنان تۋىنداعان «امانگەلدى» رومانىن ايتار ەدىك. ول ءۇش كىتاپتان تۇرادى. ءبىرىنشىسى 1879-1891 جىل ارالىعىن, ياعني باتىردىڭ جاستىق شاعىن قامتىسا, ەكىنشى كىتاپتا 1895-1914 جىلدارعى تاريحي وقيعالاردى نەگىز ەتىپ الىپ, 1914-1919 جىلدارعى كەزەڭدى ءۇشىنشى كىتاپقا ەنشىلەپتى. وسى جەردە ايتا كەتەيىك, باقىت سونىمەن بىرگە اتى اڭىزعا اينالعان اتاسى جايلى «قاندى تاس» دەگەن داستان جازعان توسەلگەن اقىن دا بولعان. نە كەرەك, بۇكىل سانالى عۇمىرىن وسى حالىق مەرەيىن اسقاقتاتاتىن الماستاي سان قىرلى تاقىرىپتى تەرەڭ زەرتتەۋگە ارناپ, كوركەم كەستەلەۋگە كەمەلدەنگەن ەكەن. شىنايى تالانت يەسى وسى ماقساتىنا جەتكەن دە سياقتى ەدى. بىراق روماننىڭ قولجازباسىن ءازىر ەتكەنىمەن, ونىڭ بىرنەشە تاراۋلارى ءارتۇرلى دەڭگەيدەگى باسپاسوزدە جاريالانىپ, وكىنىشتىسى سول, كىتاپ بولىپ باسىلعانىن كورۋگە تاعدىر جازباپتى وعان.
باقىت يمانوۆتىڭ بۇل رومانى جونىندە جازۋشى, عالىم ساپابەك ءاسىپ جاقسى پىكىر بىلدىرە كەلىپ, اۆتوردىڭ وزىنە ارناپ جىبەرگەن قولجازباسىن قاراۋىنداعى جۋرناليستەرگە ىسىرا سالۋعا قيماي, تياناقتاپ قاراپ, رەداكتوردىڭ ورىنباسارلىعى قىزمەتىن اتقارىپ وتىرعان قوستاناي وبلىستىق «كوممۋنيزم تاڭى» گازەتىنىڭ ون نومىرىنە باسقانىن ايتتى. ءتىلى كوركەم, كومپوزيتسياسى شىمىر, تاريحي وقيعالاردى بايانداۋدا دالدىك تۇرعىسىنان ءمىن تاققىزبايتىن شىنشىل شىعارمانى وقىرماندار جىلى قابىلداپتى. بۇل 1968 جىل بولسا كەرەك.
– تاعى ءبىر ەسىمدە قالعانى, باقىت ۇستازىمىزدىڭ سول رومانىنا قاتىستى قوستاناي وبكومىنا الماتىدان ارنايى رەسمي حات كەلگەن, – دەپ ساكەڭ مەنىڭ قولىمدا ساقتاۋلى ءبىر قۇجاتتىڭ مانىسىنە تەرەڭ بويلاي تۇسۋگە تۇرتكى بولىپ ەدى.
ەندى سول قۇجاتتى تۇزەتۋسىز, تولىق كەلتىرەيىك. «قكپ قوستاناي وبلىستىق كوميتەتىنىڭ سەكرەتارىنا. كوشىرمەسى: امانگەلدى اۋداندىق «سوتسياليستىك شارۋا» گازەتىنىڭ رەداكتورى يمانوۆ جولداسقا.
سسسر عىلىم اكادەمياسى قازاقستاندىق فيليالى جانىنداعى ءتىل-ادەبيەت جانە تاريح ينستيتۋتى قىزمەتكەرلەرى مەن جازۋشىلارىنىڭ قاتىناسۋى ارقىلى جينالىسىندا جازۋشى ب.يمانوۆتىڭ امانگەلدى باتىردىڭ بالالىق شاعى تاقىرىبىنا جازعان پوۆەسىن (بۇل – «امانگەلدى» رومانىنىڭ ءبىرىنشى كىتابى بولسا كەرەك – ق.ءا.) تىڭدادى. جينالىسقا مۇحتار اۋەزوۆ, ءسابيت مۇقانوۆ, ءتىل-ادەبيەت عىلىمىنىڭ دوكتورى ساۋرانباەۆ, سىنشى ىسمايىلوۆ, كەنجەباەۆ, تاعى باسقا جولداستار قاتىناستى.
باتىردىڭ وبرازىن جاساۋداعى روماننىڭ ءتىلىنىڭ اسەرلىلىگى مەن قاتىناسۋشى گەرويلاردىڭ, جەكە ادامداردىڭ, تابيعات قۇبىلىستارىنىڭ كوركەمدىگى تىم شەبەرلىكپەن كورسەتىلگەن. جولداس يمانوۆتىڭ امانگەلدى زامانىنداعى ەسكى ومىرگە, سالت-ساناعا باي ءتۇسىنۋىنىڭ, جاڭا سول زاماننىڭ ادامدارىنىڭ ۇعىمىن ءتاۋىر ەتىپ بەرگەنىنە قاراعاندا ەڭبەكتىڭ قۇندى بولاتىنىنا كۇماندانۋعا بولمايدى.
روماننىڭ قۇرىلىسى مەن جەكە ادامداردىڭ وي-ساناسىنا ءۇڭىلۋى ءجونىندە اۆتوردىڭ بىركەلكى ولقىلىعى بار. بىراق بۇل ءىس ۇستىندە تۇزەتۋگە بولاتىن كەمشىلىك. بۇل ەڭبەك قازاق حالقىنىڭ كوركەم ادەبيەتىندە امانگەلدى سياقتى باتىردىڭ بەينەسىن كورسەتەتىن تۇڭعىش شىعارما بولاتىنى انىق.
بىراق سول تالاپتى جيناقتاپ ءبىتىرۋ ءۇشىن جازۋشىعا تۇرمىس جونىنەن كومەك كورسەتىلىپ, تۆورچەستۆولىق ويلانىپ-تولعانۋىنا ءبىرتالاي قامقورلىق كەرەك سياقتى. ءبىزدىڭ سىزگە حات جازعاندا سۇرايتىنىمىزدىڭ ءوزى وسى ماسەلە.
1944 جىلعى قكپ قوستاناي وبكومىنىڭ قاۋلىسىنىڭ نەگىزىندە جاس جازۋشىعا كومەك كورسەتىلسە دەيمىز. مۇمكىندىگى بولسا قىزمەتىنەن بوساتىلىپ, باستاعان ەڭبەگىن اياقتاۋعا جاعداي جاسالسا تالاپ يەسىنە تىكەلەي قامقورلىق بولار ەدى. جانە تاياۋ ۋاقىتتا امانگەلدى جونىندە كۇردەلى كوركەم شىعارما جاساۋ بارىمىزگە ارداقتى بورىش.
جازۋشىلار مەن ءتىل عىلىمي قىزمەتكەرلەرىنىڭ ۇسىنىسى بويىنشا:
سسسر عىلىم اكادەمياسى قازاقستاندىق فيليالىنىڭ ءتىل-ادەبيەت, تاريح ينستيتۋتىنىڭ ديرەكتورى – ن.ساۋرانباەۆ (جازىلعان مەرزىمى دۇرىس اجىراتىلمادى – ق.ءا.)».
اڭعارعان ادامعا وسى قۇجاتتىڭ ءون بويىنان قالام يەسىنىڭ ەڭبەگىنە دەگەن ىقىلاس, تاقىرىپتى مەيلىنشە ەركىن مەڭگەرىپ, ساپالى شىعارما تۋدىرۋعا دەگەن زور سەنىم بايقالىپ, وعان تۇرمىستىق جاعىنان ءتيىستى قامقورلىق جاساۋ جونىنەن ءىس-شارالار بەلگىلەنسە دەگەن تىلەك بايقالادى. بۇل قاتىناس قاعازدان قانداي ناتيجە بولدى؟ وكىنىشكە قاراي, ول جاعى بەيمالىم.
ارينە, مۇنداي قاتىناس قاعازدار بەلگىلى تۇجىرىمعا نەگىزدەلىپ جازىلادى ەمەس پە؟ وسى رەتتە جازۋشى س.وماروۆتىڭ تالقىلاۋعا قاتىسىپ, ب.يمانوۆتىڭ رومانى تۋرالى بىلدىرگەن پىكىرىن ەگجەي-تەگجەيلى كەلتىرۋدى ورىندى دەپ تاپتىق.
«اۆتوردى دا, ونىڭ حالىق باتىرى ا.يمانوۆ جايلى ەڭبەگىن دە مەن سوناۋ قىرقىنشى جىلداردان بەرى بىلەمىن. سول كەزدىڭ وزىندە-اق باقىت يمانوۆ ۇلكەن پروزادا كۇرەتامىرى كوپ, كۇردەلى ەڭبەكتەر جازا الاتىن تالانتى بار ەكەندىگىن تانىتقان-دى. ءالى ەسىمدە, سوعىستان كەيىنگى جىلدارى قازاق سسر عىلىم اكادەمياسىندا يمانوۆتىڭ «باتىردىڭ بالالىق شاعى» اتتى وسى ەڭبەگى تالقىلاندى. سوندا مۇحتار اۋەزوۆ, ءسابيت مۇقانوۆ سىندى ادەبيەت الىپتارى, ەسماعانبەت ىسمايىلوۆ, بەيسەنباي كەنجەباەۆ, نىعمەت ساۋرانباەۆ ءتارىزدى عالىمدار يمانوۆ ەڭبەگىن قۇندى ەڭبەك دەپ تانىتقان-دى. كەيبىر تولىقتىرۋلار مەن جوندەۋلەر جاساۋ جايلى اۆتورعا كەلەلى كەڭەس تە بەرىلگەن. سودان كەيىن دە شيرەك عاسىرداي ۋاقىت ءوتتى. وسىنشا ۋاقىتتى اۆتور بوسقا وتكىزگەن جوق. ەڭبەگىنىڭ العاشقى ۆاريانتىن مەرزىمدى باسپاسوزدەردە جاريالاتتى. سول ۇزىندىلەردىڭ ءوزى وقىرمانداردىڭ پىكىرتالاسىن تۋعىزدى. اۆتور وقۋشىلاردان كوپتەگەن حاتتار الدى. ب.يمانوۆ ۇلكەن جازۋشىلاردىڭ, ءىرى عالىمداردىڭ, جۋرناليستەردىڭ, امانگەلدىمەن ۇزەڭگىلەس قارتتاردىڭ, بۇكىل وقۋشى قاۋىمىنىڭ سىن-ەسكەرتپەلەرىن ەسكەرە وتىرىپ, قولجازباعا كوپتەگەن وزگەرىستەر مەن تولىقتىرۋلار ەنگىزدى. اراعا 20 جىل سالىپ قايىرا كەلگەن قولجازبانى قايتا وقىعاندا مەن اۆتوردىڭ ءوزىنىڭ قالامگەرلىك پارىزىنا مەيلىنشە ءمان بەرگەن جاۋاپكەرشىلىگىنە, اسقان ەڭبەككەرلىگىنە ءدان ريزا بولدىم.
بۇل جەردە شىعارما مازمۇنىن قايتالاپ جاتۋدىڭ قاجەتى شامالى. مەن ءبىر عانا نارسەگە, وسى قولجازبانىڭ از-كەم وڭدەۋلەر مەن قىسقارتۋلاردان كەيىن وقۋشىلارعا ۇيالماي ۇسىناتىن تۋىندى ەكەندىگىنە باسا نازار اۋدارعىم كەلەدى. مۇندا امانگەلدىنىڭ 20 جاسقا دەيىنگى ءومىرى سۋرەتتەلىپ, باتىردىڭ تولىققاندى بەينەسى جاسالعان. سونىمەن بىرگە مۇندا بەكەت, بالىق, قالامپىر, شاپىراش, قۇسبەگى ءتارىزدى جاقسى دارالانعان, وقۋشى كوكەيىندە قالاتىن ادامدار وبرازى دا بار. اۆتور كوپ رەتتە ۇمىتىلا باستاعان كونە سوزدەردى رەتىن تاۋىپ پايدالانعان. سول سوزدەردىڭ ءوزى شەشەن سويلەيدى, شەبەر وينايدى.
ب.يمانوۆتىڭ «باتىردىڭ بالالىق شاعى» اتتى ەڭبەگىن مۇمكىندىگىنشە تەزىرەك وقۋشىعا ۇسىنعان ءجون».
ءيا, قايتالاپ ايتايىق, بۇل پىكىردى جازعان بەلگىلى جازۋشى سەيىتجان وماروۆ ەدى. ول سونىمەن بىرگە روماندى تالقىلاۋعا قاتىسقان, جوعارىدا ەسىمدەرى اتالعان كلاسسيكتەردەردىڭ دە, ايتۋلى عالىمداردىڭ دا پىكىرىن جيىنتىقتاپ سىيدىرا بىلگەن سىڭايلى. ورتاق پىكىردى سىعىمداپ, جاقسى جاعىمەن قوسا كەمشىلىكتەرىن دە باتىل كورسەتكەنى سەزىلەدى. سايىپ كەلگەندە, بارشاسىنىڭ دا ايتپاعى ءبىر ارناعا توعىسادى: قايتكەندە دە تاريحي ماڭىزى ەلەۋلى بۇل روماندى باسپادان تەزىرەك شىعارىپ, وقىرماندارعا ۇسىنۋ قاجەتىگىنە نازار اۋدارادى.
مۇنداي جاناشىرلىق ويلاردى باسقا دا ءىرى وقىمىستىلار قۋاتتاعانىن دالەلدەيتىن قۇجاتتار قولىمىزدا بار ەدى. ەندى سونىڭ ىڭعايىنا كوشەيىك. سونىڭ بىرەگەيى – قازاق سسر عىلىم اكادەمياسىنىڭ پرەزيدەنتى ق.ساتباەۆ پەن وسى اكادەمياعا قاتىستى ءتىل-ادەبيەت ينستيتۋتىنىڭ ديرەكتورى ە.ىسمايىلوۆتىڭ قوستاناي وبلىستىق پارتيا كوميتەتىنىڭ سەكرەتارى زولوتۋحينگە (كوشىرمەسى: امانگەلدى اۋداندىق پارتيا كوميتەتىنىڭ سەكرەتارى ج.احمەتجانوۆقا) جولداعان ءوتىنىش-حاتى بولاتىن. ۋاقىتىن ءدوپ باسىپ اجىراتا الماعان سول قۇجاتتى قاز-قالپىندا سويلەتەيىك: «قازاقستان عىلىم اكادەمياسىنىڭ جانىنداعى ءتىل-ادەبيەت ينستيتۋتىنىڭ قىزمەتكەرلەرى مەن بىرنەشە جازۋشىلاردىڭ پىكىرى بويىنشا رەسپۋبليكامىزدا العاش رەت جازىلىپ, تۇڭعىش ەڭبەك بولعالى وتىرعان جاس جازۋشى باقىت يمانوۆتىڭ «باتىردىڭ بالالىق شاعى» دەگەن پوۆەستىڭ قۇندى بولىپ شىعاتىنىن ەسكەرىپ, بۇل كىتاپتىڭ بىتەر شاعى تايانعاندىقتان جانە ەڭبەكتىڭ قازاق حالقىنىڭ باتىرى امانگەلدى يمانوۆتىڭ ءومىرى مەن ەرلىك ىستەرىن كورسەتەتىن اڭگىمە بولىپ شىعۋىنا بايلانىستى جولداس ب.يمانوۆ قىزمەتىنەن بوساتىلىپ الماتىعا كەلۋىنە ەرىك بەرۋىڭىزدى جانە پارتيا-سوۆەت ۇيىمدارىنىڭ وسى يگى ماقساتقا كومەكتەسۋىن سۇرايمىز».
وكىنىشكە قاراي, بۇل وتىنىشتەر اياقسىز قالعان ەدى. ب.يمانوۆقا ءتيىستى قامقورلىق كورسەتىلمەدى. جازۋشى ءوزىنىڭ حاتتارىندا الماتىدا الىستا جاتقاندىقتان رومانعا قاتىستى شاپشاڭ ءىس-قيمىلدار جاساي الماعانىنا بارماق شاينايدى. باسقا دا كەدەرگىلەر ونىڭ جولىنا كەسە-كولدەنەڭ تۇرىپ العان ەدى. جەرگىلىكتى تۇرعىنداردىڭ تۋىستىق كوزقاراستان تۋىنداعان كىتاپ كەيىپكەرلەرىنە قاتىستى ءتۇرلى رەتسىز وزگەرىستەر ەنگىزۋ ءجونىندەگى قيسىنسىز ۇسىنىستارىنان باسىن اراشالاي الماعان اۆتور ابدەن ءدىڭكەلەپ شارشاعان-تىن. بىراق تەك اۆتورلىق تانىمىن, باعىتىن بەرىك ۇستانىممەن قورعاي بىلگەن جازۋشى دەربەس ۇنىمەن دايەكتى شارۋا تىندىردى. ءوز كەزەگىندە «جازۋشى» باسپاسىنان رومان قولجازباسىنا قاتىستى جولدانعان بىرنەشە حاتتاردىڭ يەلەرىمەن (م.ماماجانوۆ, ا.شامكەنوۆ, ا.بايتاناەۆ, ت.ب.) ىنتىماقتاسىپ جۇمىس ىستەۋگە تىرىسىپ باقتى. شىعارماشىلىق ورايىنداعى ەسكەرتپەلەرگە ءمان بەرىپ, ىقتياتپەن وڭدەدى.
اتتەڭ-اي, بىراق ءبارى-ءبارى قۇر سوزبەن قۇردىمعا كەتكەندەي بولدى. رومان جارىققا شىقپاي قالدى. دەگەنمەن, كەڭ ورامدى تۋىندىنىڭ ءۇش كىتابىنىڭ ءبىرىنشىسى ءۇزىپ-ج ۇلىپ مەرزىمدى ءباسپاسوز بەتتەرىندە جاريالانعان ەدى. سوعان دا شۇكىرلىك ەتىپ جۇرگەندە, جەرگىلىكتى قالامگەر ءبوگەتباي الماعانبەت «امانگەلدى» رومانىنىڭ وزگە دە بەيمالىم قولجازباسىن باقىتتىڭ زايىبى حاديشا تاستانقىزىنان الىپ, 2003 جىلى قوستاناي قالاسىنداعى «كوپي-تسەنتردەن» باسىپ شىعارۋعا مۇرىندىق بولدى. بۇل – كوزى كورۋدەن قالعان قارت ءجۋرناليستىڭ اسقان ەرلىگى دەۋگە تۇرارلىق قارەكەت بولاتىن.
سونىمەن باقىت يمانوۆتىڭ «امانگەلدى» رومانىنىڭ «باتىردىڭ بالالىق شاعى» دەپ اتالاتىن ءبىرىنشى كىتابى (بۇل ەڭبەكتى باتىردىڭ ۇلى رامازان امانگەلديەۆتىڭ «باتىردىڭ بالالىق شاعى» دەپ اتالاتىن پوۆەسىمەن استە شاتاستىرۋعا بولمايدى. اتتاس شىعارما بولعانىمەن, ول ءوزىندىك دەربەس دۇنيە – ق.ءا.) وبلىستىق دەڭگەيدەگى باسپادان ايتەۋىر شىقتى عوي دەپ, كوڭىلدى ءبىر دەمدەۋگە بولار ەدى. ونداي كوڭىل جۇباتاتىن توقتامنىڭ اۋىلى الىس ەكەندىگىن اشىپ ايتپاقپىز. رومان مۇنداي كۇلدى-بادام, سالدىر-سالاق كۇيىندەگى ءماتىنىمەن باسىلىپ شىقپاعانى ءجون ەدى. ءارىپ قاتەلەرى ءورىپ ءجۇر. ەكى ءسوزدىڭ بىرىندە دەسەك, اسىرا ءسىلتەگەنىمىز ەمەس. سويلەمدەرىن ۇعۋ قيىن. كوركەم تىركەستەردىڭ توبەسىنەن اشىق كۇندە جاي تۇسكەندەي. مۇنى اۆتور ەڭبەگىن قورلاۋ دەپ تۇيگەنىمىز ءجون. باسپا جاۋاپكەرشىلىگى قايدا؟ وقىرماندارىن سىيلاماس پا؟ ۇلت ءمۇددەسىنە نەگە قيانات جاسالعان؟ كىتاپ, بەتىن اشىپ قويا سالۋ ءۇشىن شىعارىلا ما؟ مۇنداي ورەسكەلدىككە قاشان تىيىم بولادى؟ وكىنىشكە قاراي, وسىنداي ساپاسىز ونىمدەر ءالى دە بالالاپ جاتىر.
ءسوزدىڭ توبىقتاي ءتۇيىنىن ايتار بولساق, باقىت يمانوۆتىڭ «امانگەلدى» رومانىن تولىق كۇيىندە مەملەكەتتىك باسپادان شىعارىپ, وقىرمانداردىڭ رۋحاني سۇرانىسىن وتەۋگە جەدەل كىرىسكەن ابزال دەيمىز. كەزىندە كلاسسيك جازۋشىلار مەن كورنەكتى عالىمداردىڭ ءىلتيپاتىنا بولەنگەن ايتۋلى رومان تۇتاس بولمىسىمەن (كەيبىر ۆاريانتتارى قولدى بولعانى ايتىلىپ ءجۇر – ق.ءا.) وقىرماندار يگىلىگىنە جارايتىن كۇن ابدەن تۋعان سەكىلدى. ءۇمىتتى بولايىق!
قايسار ءالىم.
استانا.
