حالقىمىزدا «وتكەنسىز ەل بولمايدى, تاريحسىز جەر بولمايدى»,-دەگەن قاناتتى ءسوز بار.
ءدال وسى سوزدە ايتىلعانداي, مەملەكەت باسشىسى ۇلت تاريحىنداعى كەڭىستىك پەن ۋاقىتتى ساراپقا سالا وتىرىپ, تەك قازاقتىڭ عانا ەمەس, ءتۇبى ءبىر تۇركى ەلىنىڭ تاريحىن تۇگەندەپ, وعان قازىرگى عىلىمنىڭ بيىگىنەن قاراۋدى جانە ناقتى عىلىمي دەرەكتەرگە سۇيەنە وتىرىپ, جاھاندىق تاريحتاعى ءوز ءرولىمىزدى پايىمداۋدى ۇسىندى.
وسى جولدا ەلباسى بابالارىمىزدان كەلە جاتقان ۇلتتىق قۇندىلىقتارىمىز – اتقا ءمىنۋ مادەنيەتى, ۇلى دالاداعى ەجەلگى مەتاللۋرگيا, اڭ ءستيلى, التىن ادام, تۇركى الەمىنىڭ بەسىگى, ۇلى جىبەك جولى, قازاقستان الما مەن قىزعالداقتىڭ وتانى سىندى تامىرى تەرەڭ تاقىرىپتار ارقىلى ناقتى دالەلدەر كورسەتتى.
ەجەلگى داۋىردەن قازىرگى زامانعا دەيىنگى كەزەڭدى قامتيتىن وتكەنىمىزدى قايتا جاڭعىرتۋ ءۇشىن «ارحيۆ 2025» جەتى جىلدىق باعدارلاماسىن جاساۋدى تاپسىردى.
سونىمەن بىرگە « ۇلى دالانىڭ ۇلى ەسىمدەرى», «تۇركى الەمىنىڭ گەنەزيسى», « ۇلى دالانىڭ ەجەلگى ونەر جانە تەحنولوگيالار مۋزەيى», «دالا فولكلورى مەن مۋزىكاسىنىڭ مىڭ جىلى», «تاريحتىڭ كينو ونەرى مەن تەلەۆيزياداعى كورىنىسى» سىندى تىڭ تاسىلدەرمەن كەڭىنەن تالداۋ جاساۋ قاجەتتىگىن ايتتى.
حالقىمىزدىڭ, ۇلتىمىزدىڭ ۇلىلىعىنا ارنالعان بۇل قادام – تاعى دا ەلباسىنىڭ شىن مانىندە, تۋعان حالقىمەن بىتە قايناسقان, عالامدىق دەڭگەيدەگى ۇلكەن ويشىل, الىستى كوزدەيتىن ءىرى ستراتەگ ەكەنىن كورسەتتى.
سوندىقتان پرەزيدەنتىمىزدىڭ «رۋحاني جاڭعىرۋ» جولىنداعى باتىل باستامالارىنىڭ جالعاسى سانالاتىن « ۇلى دالانىڭ جەتى قىرى» تەك وتاندىق عانا ەمەس, بۇكىل تۇركى الەمىنىڭ عىلىم مەن رۋحانياتىنا جاڭا سەرپىن, جاڭا جىگەر بەرەتىن جانە ۇرپاقتان – ۇرپاققا جالعاساتىن تاريحي قۇجات بولىپ قالاتىنى ءسوزسىز.
نۇرلان نىعماتۋلين,
قر پارلامەنتى ءماجىلىسىنىڭ توراعاسى
