مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ باستاماسىمەن قولعا الىنعان جوبا - «ادالدىق دۇكەنى» دەپ اتالادى. اتالعان باستامانى ەڭ العاش اگەنتتىكتىڭ شىمكەنت قالاسى بويىنشا دەپارتامەنتى قالاداعى بارلىق جوعارعى وقۋ ورىندارى مەن كوللەدجدەردە اشۋ تۋرالى ۇسىنىس ايتقان.
جاقسى باستاماعا م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى العاشقىلاردىڭ ءبىرى بولىپ قولداۋ ءبىلدىردى. كۇنى كەشە دەپارتامەنت باسشىلىعى داريا قوجامجاروۆا باسقاراتىن ۋنيۆەرسيتەت ۇجىمىمەن بىرلەسە سالتاناتتى تۇردە اشىلۋ ءراسىمىن وتكىزدى.
«ادالدىق دۇكەنىنىڭ» جۇمىسى وزىنە-ءوزى قىزمەت كورسەتۋ جۇيەسى بويىنشا جۇرگىزىلەدى. ءبىر قىزىعى, مۇندا وقىتۋشىلار مەن ستۋدەنتتەر وزدەرىنە قاجەتتى زاتتاردى الىپ, الىنعان تاۋار ءۇشىن اقشانى كاسسا جاشىگىنە قالدىرىپ, ەسەپ ايىرىسادى. ءبىر سوزبەن, دۇكەندە ساتۋشى جوق. زات ساتىپ الۋشىلار ءوز-وزدەرىنە قىزمەت ەتەدى.
اشىلۋ سالتاناتىندا دەپارتامەنتتىڭ سىبايلاس جەمقورلىق پروفيلاكتيكاسى باسقارماسىنىڭ باسشىسى ەرعالي جۇماباەۆ قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ باستاماسىمەن جۇزەگە اسقان جوبانى شىمكەنت قالاسىندا العاش بولىپ قولداعان ۋنيۆەرسيتەتكە العىسىن ءبىلدىردى.
ءسوز كەزەگىندە ەرعالي تىلەسباي ۇلى «جوبانىڭ باستى ماقساتى - قوعامدا سەنىم اتموسفەراسىن بىرتىندەپ قۇرۋ جانە ستۋدەنت جاستارعا ءوزىن جاقسى, ادال ادام رەتىندە انىقتاۋعا مۇمكىندىك بەرۋ», دەدى.
شىمكەنتتىك ستۋدەنتتەر مۇنداي دۇكەننىڭ اشىلۋىنا تاڭدانىستارىن جەتكىزىپ, جاستارعا سەنىم بىلدىرگەن ۇيىمداستىرۋشىلارعا, ۋنيۆەرسيتەت ۇجىمىنا ريزاشىلىقتارىن جەتكىزدى.
شاھارداعى ىرگەلى وقۋ ورداسىندا اشىلعان «ادالدىق دۇكەنى» كەلەسى كەزەكتە قالانىڭ بارلىق جوعارعى, ورتا, ارناۋى وقۋ ورىندارىندا اشىلاتىن بولادى.
نۇرشات توكەن,
«ەگەمەن قازاقستان»
شىمكەنت
