استانا مەن الماتى تۇرعىندارى 2018 جىلعى جەلتوقسان ايىندا ارنايى بەلگىلەنگەن بىرقاتار حالىققا قىزمەت كورسەتۋ ورتالىقتارىنا (حقكو) بارىپ, وڭ جانە سول قولدارىنداعى ەكى ساۋساعىنىڭ تاڭبالارىن تاپسىرۋلارى كەرەك. قازاقستاندىقتاردىڭ ساۋساق تاڭباسىن جيناۋ كەزەڭ-كەزەڭمەن جۇزەگە اسىرىلماق. ەل ۇكىمەتى ەلەكتروندى تسيفرلىق قولتاڭبانى وسى بيومەتريالىق دەرەكتەرمەن الماستىرۋدى ويلاستىرۋدا.
ء«بىز مۇنى پيلوتتىق رەجيمدە بيىلعى جىلدان باستاپ ەندىرۋگە كىرىسپەكپىز. باستاۋ ءۇشىن ەكى قالا – استانا مەن الماتى تاڭداپ الىندى. جەلتوقسان ايىندا ەگجەي-تەگجەيىن حابارلايمىز: ازاماتتار بەلگىلى ءبىر حقكو-لارعا بارىپ, ءوز قالاۋى بويىنشا جەكە باسىنىڭ بيومەتريالىق دەرەكتەرىن تاپسىرا الادى. ءبىز بۇگىندە ەكى بيومەتريالىق كورسەتكىشتى انىقتادىق. ونىڭ ءبىرى – ادامنىڭ كادىمگى فوتوبەينەسى بولسا, ەكىنشىسى وڭ جانە سول قولدارىنداعى ەكى ساۋساقتىڭ تاڭباسى بولادى», – دەدى «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باسقارما توراعاسى ابىلايحان وسپانوۆ.
مەملەكەت وسى ارقىلى ەلدەگى جانە كەيىن شەتەلگە كەتەتىن بارلىق ازاماتتاردىڭ ساۋساق تاڭباسىنا قول جەتكىزەدى. ال بۇدان قاراپايىم ادامعا كەلەر قانداي پايدا بار؟ بارلىق حقكو-لاردىڭ ۇستىنەن قارايتىن, ءارى مەملەكەتتىك قىزمەتتەر كورسەتۋدى ورتالىقتاندىرۋعا جاۋاپتى «ازاماتتارعا ارنالعان ۇكىمەت» مەمكورپوراتسياسىنىڭ باسشىسى ساۋساق تاڭبالارىن تاپسىرعان ادامدار بولاشاقتا وزدەرىمەن بىرگە ەشقانداي قۇجات تاسىماي, وسى تابيعات بەرگەن «قولتاڭباسى» ارقىلى كەز كەلگەن جەردە مەمقىزمەت الۋ مۇمكىندىگىن يەلەنەتىنىن ايتادى.
«ولار وسى پارامەترلەرى ارقىلى اۆتوريزاتسيالانىپ, ەلەكتروندى مەملەكەتتىك قىزمەتتەر الا الادى. وسىعان قاجەتتى قۇرىلعىلار قوعامدىق قولجەتىمدىلىك پۋنكتتەرىندە, ەلەكتروندى ۇكىمەت پورتالىندا, سونداي-اق حقكو-لاردا بولادى», – دەدى ابىلايحان ەسەن ۇلى. ول قازىر eGov پورتالىنان قىزمەت الۋ ءۇشىن اۆتوريزاتسيالانۋدان ءوتۋ, جەكە تۇلعاڭىزدى سايكەستەندىرۋ تالاپ ەتىلەتىنىن ەسكە سالدى.
ماسەلەن, ەتسق نەمەسە ءبىر رەتتىك پارول ەنگىزۋ قاجەت. «اۆتوريزاتسيا پروتسەسى ءۇشىن بيومەتريالىق پارامەترلەر پايدالانىلاتىن بولادى. ال مەكەنجايلىق انىقتاما, سوتتىلىعىنىڭ جوقتىعى تۋرالى انىقتاما جانە باسقا دا حالىق اراسىندا كەڭ تانىمال قىزمەتتەر ءۇشىن اۆتوريزاتسيا قالادى. سىزگە SMS-پارول كەلەدى, ونى ەنگىزەسىز دە, مەملەكتەتتىك قىزمەتكە قول جەتكىزەسىز. بىراق ول زاڭناماعا وزگەرىستەر ەنگىزىلگەنشە سولاي بولادى. بۇگىندە زاڭنامانى وزگەرتۋ بويىنشا جۇمىس جۇرگىزىلۋدە. سودان كەيىن قازاقستاندىقتارعا ءوز بيومەتريالارى كومەگىمەن دە مەمقىزمەت الۋىنا جول اشىلادى», – دەدى مەمكورپوراتسيا باسشىسى.
