وليمپياداعا 171 كۇن قالدى
ءدۇبىر
ءبىزدىڭ ماقساتىمىز – بەس مەدال
الماتىدا اۋىر اتلەتيكادان ۇلتتىق قۇرامانىڭ وليمپيا ويىندارىنا دايىندىق بارىسىن تالقىلاۋعا ارنالعان جيىن ءوتتى.
وعان سپورت جانە دەنە شىنىقتىرۋ ىستەرى اگەنتتىگىنىڭ ءتوراعاسى تالعات ەرمەگياەۆ, اۋىر اتلەتيكا فەدەراتسياسىنىڭ پرەزيدەنتى قايرات تۇرلىحانوۆ پەن سپورتتىڭ وسى تۇرىنەن ۇلتتىق قۇرامانىڭ باپكەرلەرى مەن ءمۇشەلەرى قاتىستى. جيىنعا سونداي-اق, اگەنتتىك توراعاسىنىڭ ورىنباسارى ەلسيار قاناعاتوۆ, شتاتتاعى ۇلتتىق كوماندالار جانە سپورت رەزەرۆى ديرەكتسياسىنىڭ ديرەكتورى قايىرگەلدى جانپەيىسوۆ تە قاتىسىپ, وندا زىلتەمىرشىلەردىڭ لوندون وليمپياداسىنا دايىندىعى تالقىلاندى.
ءدۇبىر
ءبىزدىڭ ماقساتىمىز – بەس مەدال
الماتىدا اۋىر اتلەتيكادان ۇلتتىق قۇرامانىڭ وليمپيا ويىندارىنا دايىندىق بارىسىن تالقىلاۋعا ارنالعان جيىن ءوتتى.
وعان سپورت جانە دەنە شىنىقتىرۋ ىستەرى اگەنتتىگىنىڭ ءتوراعاسى تالعات ەرمەگياەۆ, اۋىر اتلەتيكا فەدەراتسياسىنىڭ پرەزيدەنتى قايرات تۇرلىحانوۆ پەن سپورتتىڭ وسى تۇرىنەن ۇلتتىق قۇرامانىڭ باپكەرلەرى مەن ءمۇشەلەرى قاتىستى. جيىنعا سونداي-اق, اگەنتتىك توراعاسىنىڭ ورىنباسارى ەلسيار قاناعاتوۆ, شتاتتاعى ۇلتتىق كوماندالار جانە سپورت رەزەرۆى ديرەكتسياسىنىڭ ديرەكتورى قايىرگەلدى جانپەيىسوۆ تە قاتىسىپ, وندا زىلتەمىرشىلەردىڭ لوندون وليمپياداسىنا دايىندىعى تالقىلاندى.
باسقوسۋعا سپورتشىلار اراسىنان يليا يلين مەن سۆەتلانا پودوبەدوۆا عانا قاتىسقان جوق. باسقالارىنىڭ ءبارى كەلىپ, اگەنتتىك توراعاسىنىڭ, باپكەرلەردىڭ ۇلتتىق قۇراما الدىنا قويعان مىندەت-ماقساتتارىن زەيىن قويىپ تىڭدادى. يلين بولسا, وليمپياداعا جەكە باعدارلاما بويىنشا دايىندالىپ جاتىر. ال پودوبەدوۆا سۇرانىپ, رەسەيگە بارىپ-كەلمەك ەكەن.
جيىندا قازاقستان قۇراماسىنا قاتىستى كوپتەگەن ءماسەلە قارالدى. الدىمەن اگەنتتىك ءتوراعاسى ءسوز الىپ, ەلىمىزدىڭ وليمپيادادا اۋىر اتلەتتەرىمىزگە ەرەكشە ءۇمىت ارتىلىپ وتىرعانىن, التىن جۇلدەدەن ءۇمىتتى سپورتشىلارىمىز بولسا, ول زىلتەمىرشىلەر ەكەنىن اتاپ ءوتتى. وسىعان بايلانىستى ت.ەرمەگياەۆ مەملەكەتتىڭ ۇلتتىق قۇرامانىڭ وليمپياداعا دايىندىعىنا ەرەكشە كوڭىل ءبولەتىنىن ءمالىمدەدى. وسىدان كەيىن باس باپكەر الەكسەي ني كوماندانىڭ لوندون وليمپياداسىنا دايىندىعىمەن تانىستىردى.
ول قازاقستان قۇراماسىنىڭ جارىسقا جان-جاقتى دايىندالىپ جاتقانىن ايتا كەلىپ, جاقىن ارادا يليننەن باسقالارىنىڭ ءبارى تالدىقورعاندا جينالىپ, مامىر ايىنىڭ سوڭىنا دەيىن سول جەردە جاتتىعاتىندارىن اتاپ كورسەتتى. «وسى جەردە, – دەدى ول, – قازاقستان چەمپيوناتى وتەدى. بۇل سىندا ءبىز لوندون وليمپياداسىنا باراتىن سپورتشىلاردى انىقتايمىز».
ونىڭ ايتۋىنشا, وليمپياداعا قازىر ەرلەر – ءتورت, ايەلدەر دە ءتورت ليتسەنزيانى يەلەنىپ وتىر. سودان كەيىن ۇلتتىق قۇراما تەكەلىگە جاتتىعۋعا بارىپ, سول جەردەن لوندونعا اتتانادى. وسى ورايدا باس باپكەر قازاقستان قۇراماسى تۇماندى البيوندا بەس مەدال الۋعا ۇمتىلاتىنىن, سونىڭ ەكەۋى التىن جۇلدە بولسا دەگەن تىلەگى بار ەكەنىن جەتكىزدى.
«قازىرگى كۇنى ءبىزدىڭ وليمپياداعا ەش الاڭسىز دايىندالۋىمىزعا بارلىق جاعداي جاسالۋدا. سپورت جانە دەنە شىنىقتىرۋ ىستەرى اگەنتتىگى, رەسپۋبليكا اۋىر اتلەتيكا فەدەراتسياسى جانە باس دەمەۋشىمىز – «سامۇرىق-قازىنا» ۇلتتىق ءال-اۋقات قورى بارىنشا قولداۋ كورسەتۋدە. سوندىقتان ءبىز تالدىقورعانداعى چەمپيوناتتان كەيىن لوندونعا دەيىن تاۋ بوكتەرىندە دايىندالىپ, وليمپيادادان بەس جۇلدە اكەلۋدى ماقسات ەتىپ وتىرمىز», – دەدى الەكسەي ني.
باسقوسۋدا تۇركيادان كەلگەن كەڭەسشى-باپكەر ءانۋار تۇركىلەري ءوزىنىڭ ارىپتەسىمەن تولىق كەلىسەتىنىن ايتتى. «ءبىز ۇلىبريتانياعا التىن الۋعا بارامىز, ءۇش التىن جۇلدە الىپ جاتساق, وعان ەش تاڭدانباڭىزدار», – دەدى ول. نەگىزى, تۇركىلەري مىرزانىڭ اۋزى دۋالى دەسەدى بىلەتىندەر. ونىڭ ايتقانىنىڭ ايداي انىق, ءدال كەلەتىنىن افينا وليمپياداسىنان بەرگى تانىستىعىمىزدان دا بىلەمىز, بەيجىڭ وليمپياداسى باستالار الدىندا دا وعان كۋا بولعانبىز.
سول كەزدە ول يلينگە ەرەكشە ءۇمىت ارتىلىپ وتىرعانىن, تولاعايداي تاۋ-تاستى كوتەرە الاتىنداي كورىنەتىن باتىرىمىزدىڭ باس جۇلدەنى جەڭىپ الاتىنىن ايتقان بولاتىن. ەندى, مىنە, ءبىز تاعى دا وليمپيادامەن قاتار, ءۇش دۇركىن الەم چەمپيونى اتانعان تۋما تالانتتىڭ تۇماندى البيوندا دا توپ جاراتىنىنا سەنگىمىز كەلەدى. سولاي بولسا دەپ تىلەيمىز!
وسىدان كەيىن ۇلتتىق قۇرامانىڭ باس باپكەرى قايتا ءسوز الىپ, كوماندانىڭ كەيبىر مۇشەلەرىنىڭ وسىدان ءبىراز ۋاقىت بۇرىن قۇزىرلى ورگاندارعا ارنايى حات جازىپ, «ۇلتتىق قۇرامادان بولەك, جەكە ءوزىمىز دايىندالساق» دەگەن وتىنىشتەرىنە بايلانىستى تۇسىنىكتەمە بەرە كەتتى. وسى جاعدايدىڭ ءمان-جايىن باس باپكەردىڭ ءوزى بىلاي ءتۇسىندىردى:
«قازىرگى كەزدە تەك يليا يلين عانا ۇلتتىق قۇرامادان بولەك دايىندالىپ ءجۇر. بىراق ونىڭ دا ءار قادامىن بىزدەر ۇنەمى قاداعالاپ وتىرمىز. ال وزگە سپورتشىلارعا ونداي رۇقسات بەرىلگەن جوق. قازىرگى كۇنى ۆلاديمير كۋزنەتسوۆ, سەرگەي يستومين جانە ۆلاديمير سەدوۆ لازار دوننىڭ قول استىندا جاتتىعۋدا. قالعان مىقتىلاردى ءانۋار ءتۇركىلەريدىڭ ءوزى باپتاۋدا. ءجانە دە ولاردىڭ جەكە جاتتىقتىرۋشىلارى دا بۇل ىسكە بەلسەنە ارالاسۋدا».
P.S. 2008 جىلى بەيجىڭدە وتكەن وليمپيادادا قازاقستان قۇراماسى 1 التىن, 2 كۇمىس جانە 1 قولانى يەلەندى. بۇل جارىستا يليا يلين چەمپيون اتانسا, اللا ۆاجەنينا, يرينا نەكراسوۆا جانە ماريا گرابوۆەتسكايا جۇلدەگەرلەر قاتارىنان كورىندى. 2009 جىلى قازاقستان قۇراماسى گۋيانگتە وتكەن الەم چەمپيوناتىندا 4 التىن جانە 1 قولا مەدالعا يە بولدى. وندا ءزۇلفيا چينشانلو, مايا مانەزا, سۆەتلانا پودوبەدوۆا جانە ۆلاديمير سەدوۆ التىننان القا تاقسا, ۆلاديمير كۋزنەتسوۆ قولا جۇلدەگەر اتاندى. ال 2010 جىلى انتاليادا وتكەن سىندا مايا مانەزا مەن سۆەتلانا پودوبەدوۆا التىن تۇعىردان قول بۇلعادى. بىلتىر ەلىمىز پاريجدەگى الەم چەمپيوناتىندا 2 التىن جانە 2 كۇمىس مەدالدى يەلەندى. ءزۇلفيا چينشانلو مەن يليا يلين التىن, مايا مانەزا مەن سۆەتلانا پودوبەدوۆا كۇمىس مەدالعا يە بولدى.
داستان كەنجالين.
