ءبىز كۇتكەن جەڭىس
شۆەتسيا مەن رەسەي قۇرامالارىمەن كەزدەسكەننەن كەيىنگى ءساتسىزدىكتىڭ ورنىن تولتىرىپ, دوپتى حوككەيدەن قازاقستان قۇراماسى فينليانديا كومانداسىن ايقىن باسىمدىقپەن ويسىراتا ۇتتى. جۇلدەلى ورىنعا عانا ەمەس, قازاقستاندىقتاردىڭ بۇل جەڭىسى الەمدىك قىسقى سپورت تۇرىنە وزىندىك ويىن ورنەگى بار جاڭا كوماندانىڭ كەلگەنىن دە بايقاتىپ تاستاعانداي.
شۆەتسيا مەن رەسەي قۇرامالارىمەن كەزدەسكەننەن كەيىنگى ءساتسىزدىكتىڭ ورنىن تولتىرىپ, دوپتى حوككەيدەن قازاقستان قۇراماسى فينليانديا كومانداسىن ايقىن باسىمدىقپەن ويسىراتا ۇتتى. جۇلدەلى ورىنعا عانا ەمەس, قازاقستاندىقتاردىڭ بۇل جەڭىسى الەمدىك قىسقى سپورت تۇرىنە وزىندىك ويىن ورنەگى بار جاڭا كوماندانىڭ كەلگەنىن دە بايقاتىپ تاستاعانداي.
كورەرمەننىڭ كۇپتى كوڭىلىن قازاقستاندىق قۇراما ويىننىڭ العاشقى مينۋتتارىندا-اق جادىراتىپ جىبەردى. راۋان ەساليەۆتىڭ ادەمى پاسىن ۇتىمدى پايدالانعان اندرەي موروكوۆ ماتچتىڭ بەسىنشى مينۋتىندا ەسەپ اشىپ, تۇڭعىش دوپتى قاقپا تورىنا توعىتىپ ۇلگەردى. قارسىلاستار قانشالىقتى ويىن تىزگىنىن قولعا الۋعا ۇمتىلعانىمەن, 12-ءشى مينۋتتا الەكساندر ناسونوۆ شىعارعان دوپتى ۆياچەسلاۆ ماركين ءىلىپ الىپ, فين قاقپاسىنا سۇڭگىتە ءبىلدى. فينليانديا قۇراماسىنىڭ مەرگەنى رۋتكونەن سوققان قارسىلاستاردىڭ العاشقى گولى ءبىزدىڭ جىگىتتەردىڭ جىگەرىن جانىعانداي اسەر ەتتى. تارتىستى ءساتتىڭ بىرىندە فيندەر تاراپىنان ويىن ەرەجەسى بۇزىلىپ, تورەشى 12 مەترلىك ايىپ دوبىن بەلگىلەدى. ونى ناسونوۆ شەبەر ورىنداپ, ەسەپتى 3:1 ەتىپ جاڭالادى.
ويىننىڭ 31-ءشى مينۋتىندا ەۆگەني ءشادريننىڭ سوققان ءتورتىنشى گولى الەكسەي نيكيشوۆ جاتتىقتىراتىن قۇراما ايدىنداعى ويىننىڭ تىزگىنىن ءوز قولىنا العانىن انىق تانىتتى. كوك مۇزدىڭ ۇستىندە كوركەم ويىن كورسەتە بىلگەن سەرگەي پوچكۋنوۆ ءۇش بىردەي فين ويىنشىسىنان سىتىلىپ شىعىپ, لەونيد بەدارەۆكە ادەمى مۇمكىندىك شىعاردى. گول! ەسەپ – 5:1.
ەكىنشى تايمدا ءبىزدىڭ جىگىتتەرگە قارسى ويىن ەرەجەسى ءبىرشاما بۇزىلۋمەن بولدى. بالكىم قارسىلاستاردىڭ جۇيكەسى سىر بەرسە كەرەك, ايتەۋىر ءبىزدىڭ بەدارەۆكە قارسى جىبەرىلگەن تارتىپسىزدىك ءۇشىن تورەشى ەكى رەت ايىپ دوبىن تاعايىندادى. ونىڭ ءبىرىن بروننيكوۆ ءساتتى پايدالانعانىمەن, ەكىنشى 12 مەترلىكتى پوچكۋنوۆ سوعا المادى. نۇعمانوۆ پەن ءشادريننىڭ شەبەرلىگى ارقاسىندا ەلەكتروندى تاقتاداعى كورسەتكىش 8:1 بولعان ەدى. تورەشى ويىن ەرەجەسى بۇزىلعان سوڭ, قازاقستان قۇراماسىنا قارسى 12 مەترلىك ايىپ دوبىنا شەشىم شىعاردى. فينليانديا قۇراماسىنىڭ سۇرمەرگەنى لۋككاريلا مۇمكىندىكتى قالت جىبەرمەي, ءبىزدىڭ قاقپانىڭ اشىق تۇسىن ءدال كوزدەي ءبىلدى. لۋككاريلا مىقتى ەكەن, 70-ءشى مينۋتتىڭ باسىندا وكسانەن شىعارىپ بەرگەن دوپتى ءبىزدىڭ قاقپاعا قاپىسىز سوعىپ, ءوز قورجىنىن تولىقتىرا ءتۇستى. ەسەپ – 8:3.
ويىننىڭ 72-ءشى مينۋتىندا ءوزىنىڭ اۋەلگى قاتەلىگىن قايتارعانداي بولىپ, قازاقستاندىق سۇرمەرگەن پوچكۋنوۆ ءبىزدىڭ ابىرويىمىزدى اسىرعان توعىزىنشى گولدى سوقتى. ارتىنشا ويىن ەرەجەسى بۇزىلىپ, 12 مەترلىك ايىپ دوبىن ەساليەۆ كەرەمەت ورىندادى. راۋاننىڭ بۇل دوبى ماتچتىڭ تاعدىرشەشتى سوققىسى بولدى. سوڭعى مينۋتتاردا بۇرىشتان بەرىلگەن دوپتى شەبەرلىكپەن ءبىزدىڭ قاقپاعا فين حاۋسكا سۇڭگىتىپ جىبەرگەن ەدى, الايدا قازاقستاندىق قۇرامانىڭ پەشەنەسىنە جازىلعان جەڭىسكە ونىڭ اسەرى بولا قويمادى. ەسەپ – 10:4, قازاقستان – فينليانديا كەزدەسۋىندەگى جەڭىس ءبىزدىڭ ەنشىمىزدە.
جالپى, قوس قۇرامانىڭ اراسىنداعى ويىندار تارتىستى وتەدى. ولاردىڭ قولا مەدال ءۇشىن تالاسۋى داستۇرگە اينالعانداي. ەڭ كوركەم گولدىڭ اۆتورى اتانعان ەۆگەني ءشادريننىڭ ويىنىن اتاپ وتكەن ءجون. بۇل كەزدەسۋدە شادرين جارادى.
الەكسەي نيكيشوۆتىڭ كومانداسى 3 رەت جەڭىپ, 2 رەت جەڭىلدى. ەندى جارتىلاي فينالدا شۆەتسيامەن كەزدەسۋ كۇتىپ تۇر. بۇگىن «مەدەۋ» مۇز ايدىنىندا رەسەي مەن فينليانديا كەزدەسەدى. ال قازاقستان قۇراماسى, تاعى دا قايتالايىق, بۇعان دەيىن ەسە جىبەرگەن شۆەتسيا كومانداسىمەن تاياق تۇيىستىرەدى.
كەشە الەم چەمپيوناتىندا دەمالىس كۇنى بولدى.
وسى چەمپيوناتتا ەلىمىز قۇراماسىنىڭ كەم دەگەندە قولا ءجۇلدەنى يەلەنەتىنى ءسوزسىز. ال شۆەتسيا قۇراماسىمەن وتەتىن كەزدەسۋدە ءبىزدىڭ راۋان ەساليەۆ باستاعان جىگىتتەر نامىسقا تىرىسىپ, جەڭىسكە جەتسە, بۇل قازاقستاننىڭ الەم چەمپيوناتى تاريحىنداعى العاشقى كۇمىس جۇلدەسى بولادى. قازىرگى كەزدە ناق وسى سكانديناۆيا ەلى مەن رەسەيدىڭ بەنديدە داۋرەنى ءجۇرىپ تۇر. بۇل ەكى قۇراما وسى كەزگە دەيىن مۇمكىن بولعان بارلىق جۇلدەلەردى جەڭىپ العان كوماندالار. شۆەتسيا قۇراماسىنىڭ ءبىر ءوزى ون رەت الەم چەمپيونى بولعانى بەلگىلى.
سونداي-اق, بىزگە كەشە قارسىلاس بولعان سۋومي ەلىنىڭ دە دوپتى حوككەيدەن ۇنەمى جۇلدەگەرلەر قاتارىنان كورىنىپ جۇرگەنى بەلگىلى. اتاپ ايتقاندا, 2004 جىلعا دەيىن جۇلدەگەرلەردىڭ جانىندا جۇرگەن فينليانديا قۇراماسى سول كەزدەن باستاپ كوماندالىق ويىن كورسەتىپ, قازىردە قولا ءۇشىن تالاساتىن جاعدايعا جەتىپ وتىر. سوڭعى 8 جىلدا ونىڭ جۇلدىزدى شاعى تۋدى دەسە بولادى. بۇل ەلدىڭ دوپتى حوككەيشىلەرى شۆەتسيادا وتكەن دودانى ۇتىپ الدى. وسىلايشا 31 رەت ءجۇلدە ساراپقا سالىنعان چەمپيوناتتا تەك ءۇش ەلدىڭ قۇرامالارى عانا قۇرمەت تۇعىرىنىڭ بيىك ساتىسىنان كورىنە ءبىلدى. ەڭ كوپ جەڭىمپاز اتانعان ەل, ارينە, كسرو بولدى. كەڭەس وداعىنىڭ سپورتشىلارى بارلىعى 14 رەت التىن جۇلدەنى تىسىمەن تىستەپ كورگەن ەكەن. بىراق, 1991 جىلى وداق تاراعان سوڭ, ونىڭ جەتىستىكتەرى رەسەي قۇراماسىنا تيەسىلى دەلىنىپ ءجۇر. ويتكەنى, رەسەي وزدەرىن بەنديدەن حالىقارالىق قاۋىمداستىقتا كسرو-نىڭ زاڭدى مۇراگەرى رەتىندە تىركەپ قويعان دەسەدى. ال سول سولتۇستىك كورشىلەرىمىز دەربەس ەل رەتىندە 6 مارتە الەم چەمپيونى اتاندى.
قازاقستان دا بۇل دودادا ءجۇلدەلى ورىندارعا تالاسىپ جۇرگەن كوماندالاردىڭ ءبىرى. ءبىزدىڭ ەلدىڭ سپورتشىلارى ەڭ العاش 2003 جىلى رەسەيدىڭ ارحانگەلسك قالاسىندا وتكەن جارىستا قولا ءجۇلدەگە يە بولدى. قازاقستاندىقتار ءۇشىنشى ورىن ءۇشىن باسەكەدە فينليانديا قۇراماسىنان 4:1 ەسەبىمەن باسىم ءتۇستى. بۇدان سوڭ 2005 جىلى رەسەيدىڭ قازان قالاسىندا وتكەن چەمپيوناتتا وتانداستارىمىز قولا جۇلدەنى قاناعات تۇتتى. بۇل جولى دا ءۇشىنشى ورىنعا سۋومي بەنديشىلەرىمەن تالاسقان جىگىتتەرىمىز اسا شيەلەنىستى ويىندا 5:3 ەسەبىمەن جەڭىسكە جەتتى. ءسويتىپ, قازاقستان قۇراماسى الەمدىك جارىستىڭ ەكى بىردەي قولا جۇلدەسىن يەلەندى. الايدا 2005 جىلدان بەرى قاراي وتكەن التى چەمپيوناتتا ءبىزدىڭ جۇلدەگە قولىمىز جەتپەدى. وسى ۋاقىت ءىشىندە فينليانديا قۇراماسى بەس رەت الدىمىزدى وراپ كەتتى.
فينليانديامەن بولعان كەشەگى ويىندا سول كەتكەن ەسەمىزدى قايتاردىق دەپ سانايىق.
قانات ەسكەندىر.
الماتى.
