جول-كولىك وقيعاسى تۋرالى حابار العاننان كەيىن اپات ورنىنا قارماقشى اۋدانىنىڭ اكىمى سۇلتان ماقاشوۆ پەن اۋدان اكىمدىگىنىڭ قىزمەتكەرلەرى, وبلىستىق دەنساۋلىق ساقتاۋ, جۇمىلدىرۋ دايىندىعى باسقارمالارى مەن جەرگىلىكتى پوليتسيا قىزمەتىنىڭ, سونداي-اق توتەنشە جاعدايلار دەپارتامەنتى جانە ىشكى ىستەر دەپارتامەنتىنىڭ باسشىلارى باردى.
وقيعا ورنىندا جەرگىلىكتى پوليتسيا قىزمەتىنىڭ 34 قىزمەتكەرى,13 ارنايى تەحنيكا مەن 34 توتەنشە جاعدايلار دەپارتامەنتىنىڭ مامانى, 130 مەديتسينا سالاسىنىڭ قىزمەتكەرى, ونىڭ ىشىندە 16 دارىگەر جۇمىلدىرىلدى. سونداي-اق, 12 "جەدەل جاردەم" بريگاداسى جۇمىس ىستەدى.
84 جولاۋشىعا كومەك كورسەتىلدى. سونىمەن قاتار, جالاعاش جانە قارماقشى اۋداندارىندا ەكى اۋرۋحانا جانە وبلىستىق مەديتسينالىق ورتالىق زارداپ شەككەندەرگە كومەك كورسەتۋدە.
«قازالى-قىزىلوردا» مەن «قىزىلوردا-قارماقشى» باعىتىنداعى 2 اۆتوبۋستا بارلىعى 86 ادام بولعان. ءارتۇرلى دارەجەدەگى جاراقات العان 43 جولاۋشى قارماقشى اۋداندىق اۋرۋحاناسىنا, 6 ادام جالاعاش اۋدانىنىڭ ورتالىق اۋرۋحاناسىنا, 5 ادام وبلىستىق مەديتسينا ورتالىققا جەتكىزىلدى. قالعان 30 جولاۋشىعا العاشقى مەديتسينالىق كومەك كورسەتىلىپ, امبۋلاتوريالىق ەمدەۋ شارالارى تاعايىندالدى. اپات ورنىندا 2 ادام قايتىس بولدى جانە اۋىر جاراقات سالدارىنان اۋرۋحانادا ءبىر بالا كوز جۇمدى»,-دەدى وبلىستىق دەنساۋلىق ساقتاۋ باسقارماسىنىڭ باسشىسى اقمارال ءالنازاروۆا.
قايتىس بولعان جانداردىڭ وتباسىلارىنا جەرگىلىكتى بيلىك تاراپىنان جان-جاقتى كومەك كورسەتىلەتىن بولادى.
