قازاقستان رەسپۋبليكاسى ۇكىمەتىنىڭ قاۋلىسىنا سايكەس, 2018 جىلعى جاسوسپىرىمدەر وليمپياداسىندا جوعارى ناتيجە كورسەتكەنى ءۇشىن چەمپيوندار مەن جۇلدەگەرلەرگە, اتاپ ايتقاندا, «التىن» ءۇشىن – $10 000, «كۇمىس» ءۇشىن – $5 000, جانە «قولاعا» – $3 000 كولەمىندە سىياقى بەرىلدى. سونداي-اق, جەڭىمپازداردىڭ باپكەرلەرى دە قۇرالاقان قالمادى.
«سىزدەر حالىقارالىق دودالار مەن ازيا چەمپيوناتتارىندا كوزگە ءتۇسىپ, جاسوسپىرىمدەر وليمپياداسى سەكىلدى كەشەندى جارىستا العاش رەت باق سىنادىڭىزدار. بۇل ۇلكەن تاجىريبە. ال ءبىر-بىرلەرىڭە قولداۋ كورسەتىپ, ءبىر تۋ استىندا بىرىككەندەرىڭ – ءبىز ءۇشىن ۇلكەن قۋانىش. سىزدەر تۇتاس كومانداعا اينالىپ, ۇلتتىق وليمپيادالىق كوميتەتتىڭ باستى ماقساتىن جۇزەگە اسىردىڭىزدار», - دەدى قر ۇوك پرەزيدەنتى تيمۋر ق ۇلىباەۆ.
«ەلباسىنىڭ حالىققا ارناعان سوڭعى جولداۋىندا سپورت پەن سپورتتىق ينفراقۇرىلىمدى دامىتۋعا ەرەكشە كوڭىل ءبولىندى. ءبىز سپورت جانە مادەنيەت مينيسترلىگىمەن بىرىگە وتىرىپ, سپورتتىق ينفراقۇرىلىمدى جاقسارتۋعا ات سالىسامىز. سونىمەن قاتار, سپورت ۋنيۆەرسيتەتىن قۇرۋ ماقساتى دا تۇر. مۇنىڭ ءبارى ەلىمىزدە سپورتشىلاردى دايىنداۋ جۇيەسىن قالىپتاستىرۋعا اسەر ەتەتىنى ءسوزسىز. بۇگىنگى تاڭدا ۇلكەن جەتىستىگىمەن قۋانتقان تالانتتى جاستارىمىز كەلەشەكتە ەل نامىسىن ابىرويمەن قورعايتىنىنا بەك سەنىمدىمىن», - دەدى ۇوك پرەزيدەنتى.
بۋەنوس-ايرەستە قازاقستان قۇراماسى تورت التىن, ءۇش كۇمىس جانە ءۇش قولا مەدال جەڭىپ الدى. ودان بولەك, حالىقارالىق كوماندالار ساپىندا كۇمىس جانە قولا جۇلدەگە يەلىك ەتتى.
جاسوسپىرىمدەر وليمپياداسىنىڭ چەمپيوندارى: بەكارىس سادۋاقاس (دزيۋدو), دياس باحراددين (ەسكەك ەسۋ), گلەب برۋسەنسكي مەن ەۆگەني فەدوروۆ (ۆەلوسپورت), ايبەك ورالباي (بوكس).
كۇمىس جۇلدەگەرلەر: دامير تويباي (بوكس), تالعات شايكەن (بوكس), مارگاريتا گريتسەنكو (دزيۋدو).
قولا جۇلدەگەرلەر: نادەجدا ريابەتس (بوكس), ستەللا سۋحانوۆا (ەسكەك ەسۋ),ء ابىلمانسۇر باتىرعالي (كاراتە).
حالىقارالىق كوماندا ساپىندا روزا ابيتوۆا (كوركەم گيمناستيكا) كۇمىس, بەكارىس سادۋاقاس (دزيۋدو) قولا مەدال جەڭىپ الدى.
جاسوسپىرىمدەر ويىنىندا مەدال سانى مەن جۇلدە جەڭىپ العان سپورت تۇرلەرى دە رەكوردتىق كورسەتكىشكە يە بولدى. ەسكە سالا كەتەيىك, ارگەنتيناعا سپورتتىڭ 23 تۇرىنەن 58 اتلەت اتتاندى.
التىن مەدال يەگەرى, 17 جاستاعى بەكارىس سادۋاقاس قۇراما سپورتشىلارىنىڭ اتىنان ءسوز سويلەدى.
«ارگەنتيناداعى دوداعا قاتىسقان سپورتشىلاردىڭ اتىنان قولداۋ كورسەتكەن بارشاڭىزعا العىس ايتامىن. ءبىز بۇل سىنعا قارقىندى تۇردە دايىندالدىق. ەڭبەگىمىز ەش كەتپەي, مەدالمەن ورالعانىمىز ءۇشىن قۋانىشتىمىن. ەندى ەرەسەكتەر اراسىنداعى وليمپيادادا توپ جارۋ ءۇشىن بار كۇشىمىزدى سالامىز», - دەدى ول.
كەلەسى جاسوسپىرىمدەر وليمپياداسى 2022 جىلى سەنەگالدا وتەدى.
