وتىرىستى اشقان گۇلشارا ابدىقالىقوۆا ءوز سوزىندە ەلباسى نۇرسۇلتان نازارباەۆتىڭ 7 قاراشادا وتكەن قاۋىپسىزدىك كەڭەسىنىڭ وتىرىسىندا سىبايلاس جەمقورلىققا قارسى بەلسەندى كۇرەس جالعاسا بەرەتىنىن, حالىق قاراجاتتىڭ قايدا جانە قانداي ماقساتقا جۇمسالعانىن بىلۋگە ءتيىس ەكەنىن ايتقانىن ەسكە سالدى.
كوميسسيا وتىرىسىندا حالىقتى جۇمىسپەن قامتۋ سالاسىنداعى زاڭدىلىقتى ساقتاۋعا, سونداي-اق «نۇرلى جول» ينفراقۇرىلىمدىق دامۋ مەملەكەتتىك باعدارلاماسىن جۇزەگە اسىرۋعا بولىنگەن قاراجاتتى پايدالانۋ تيىمدىلىگىنە قاتىستى قابىلدانىپ جاتقان شارالار تالقىلاندى.
سونىمەن قاتار باس پروكۋراتۋرانىڭ, مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ, ينۆەستيتسيالار جانە دامۋ, ەڭبەك جانە حالىقتى الەۋمەتتىك قورعاۋ مينيسترلىكتەرى باسشىلارىنىڭ باياندامالارى تىڭدالدى.
جالپى, حالىقتى جۇمىسپەن قامتاماسىز ەتۋ ماسەلەسى – مەملەكەتتىڭ الەۋمەتتىك ساياساتىنىڭ نەگىزى. بۇل باعىتتى قولداۋ بويىنشا قابىلدانعان كەشەندى باعدارلامالار ەڭبەك نارىعىندا تۇراقتىلىقتىڭ ساقتالۋىنا جانە داعدارىس كەزەڭدەرىنىڭ كەلەڭسىز سالدارلارىن جۇمسارتۋعا سەپتىگىن تيگىزەدى.
بۇگىندە جوعارىدا اتالعان باعدارلامالاردى قارجىلاندىرۋعا ايتارلىقتاي مەملەكەت قاراجاتى بولىنۋدە. سونىمەن بىرگە 2016 جىلدان بەرى انتيكوررۋپتسيالىق قىزمەت 194 قىلمىستى تىركەپ, 32 ادام سوتتالعان. زاڭ بۇزۋ جايتتارى نەگىزىنەن جۇمىسقا تۇرۋ فاكتىلەرىنىڭ جالعاندىعىمەن, بيۋدجەت قاراجاتى مەن الىنعان شاعىن نەسيەلەردى باسقا ماقساتتارعا پايدالانۋمەن بايلانىستى بولىپ وتىر.
گ.ابدىقالىقوۆا وسى ورايدا سىبايلاس جەمقورلىق قاتەرلەرىن ازايتاتىن ءتيىمدى تەتىكتەردى ەنگىزۋ قاجەتتىگىن ايتتى.
سونداي-اق قۇقىق قورعاۋ جانە باقىلاۋ ورگاندارى وكىلدەرى كوميسسيانى قارجىلاندىرىلۋى 3 ترلن تەڭگەدەن اسقان «نۇرلى جول» ينفراقۇرىلىمدىق دامۋ مەملەكەتتىك باعدارلاماسىن ىسكە اسىرۋعا بايلانىستى كوپتەگەن زاڭ بۇزۋشىلىقتار جونىنەن حاباردار ەتتى. ماسەلەن, باعدارلاما جۇزەگە اسىرىلا باستالعالى بەرى 120 سوتقا دەيىنگى تەرگەۋ قولعا الىنىپ, 48 ادام سوتتالعان. مەملەكەتتىك اۋديت ورگاندارى جالپى قۇنى 48 ملرد تەڭگە بولاتىن زاڭ بۇزۋ جايتتارىن تىركەگەن.
مەملەكەتتىك حاتشى سىبايلاس جەمقورلىقتى ازايتۋ ءۇشىن جەرگىلىكتى جەرلەردە ءاربىر ينۆەستيتسيالىق جوبانىڭ جۇزەگە اسىرىلۋىن قامتاماسىز ەتۋ, ەلەكتروندى رەسۋرستار مۇمكىندىكتەرىن كەڭىنەن قولدانۋ ماڭىزدى ەكەنىن اتاپ ءوتتى.
تالقىلاۋ قورىتىندىسى بويىنشا كوميسسيا وكىلەتتى مەملەكەتتىك ورگاندارعا انىقتالعان زاڭ بۇزۋ جايتتارىن جويۋ باعىتىندا ناقتى شارالار قابىلداۋ جونىندە تاپسىرما بەردى.
سەرىك ابدىبەك,
«ەگەمەن قازاقستان»
