جيىنعا جوو رەكتورلارى, كوللەدجدەردىڭ ديرەكتورلارى, جاستار مەن ستۋدەنتتەر ۇيىمدارىنىڭ, «اتامەكەن» ۇكپ, بيزنەس قاۋىمداستىقتار, ۇەۇ جانە وبلىستىق پروكۋراتۋرا وكىلدەرى قاتىستى.
ەلباسى ءوزىنىڭ جىل سايىنعى جولداۋلارىندا ءبىلىم بەرۋ جۇيەسىنە ايرىقشا نازار اۋداراتىنىن ايتا كەتكەن ءجون. ماڭىزدى ماسەلەلەر — مەكتەپ قابىرعاسىنان باستاپ كوللەدجدەر مەن ۋنيۆەرسيتەتتەرگە دەيىن ساپالى كادرلاردى دايارلاۋ. پرەزيدەنت ءبىلىم, عىلىم جانە دەنساۋلىق ساقتاۋ شىعىندارىن بارلىق كوزدەردەن بەس جىل ىشىندە ءجىو-ءنىڭ 10%-نا دەيىن جەتكىزۋدى تاپسىردى. قازىرگى تاڭدا ءبىلىم بەرۋگە جۇمسالعان شىعىندار ءجىو-ءنىڭ 7,3–7,4%-ىن قۇرايدى.
ۇكىمەت پرەزيدەنتتىڭ تاپسىرمالارىن ورىنداۋ ءۇشىن قاجەتتى شارالاردى قابىلداپ جاتىر. الداعى ءۇش جىلدا جولداۋدى ىسكە اسىرۋعا 1,75 ترلن تەڭگە باعىتتالادى. 2019 جىلعى 1 قاڭتاردان باستاپ ەڭ تومەنگى جالاقى مولشەرى 1,5 ەسەگە — 28-دەن 42 مىڭ تەڭگەگە دەيىن وسەدى. وسىلايشا, 1,3 ملن جالدامالى جۇمىسشىنىڭ جالاقىسى 30%-عا وسەدى. سونداي-اق, بۇل 275 مىڭ ازاماتتىق قىزمەتكەرگە, ونىڭ ىشىندە پەداگوگ ماماندارىنا قاتىستى, ولاردىڭ جالاقىسى 35%-عا ارتادى.
پرەمەر-مينيستر «مۇعالىم مارتەبەسى تۋرالى» زاڭ قابىلدانعاننان كەيىن جوسپارلانعان رەفورمالاردى باستاۋ تۋرالى شەشىم قابىلدانعانىن اتاپ ءوتتى. مۇعالىمنىڭ مارتەبەسىن كوتەرۋ — كەلەشەك ۇرپاقتى تاربيەلەۋدىڭ نەگىزى, وسكەلەڭ ۇرپاق ءۇشىن مۇعالىم ۇلگى جانە ونەگە بولۋى ءتيىس. بۇعان قوسا ۋنيۆەرسيتەتتەردە مۇعالىمدەردى دايارلاۋ ماسەلەسىنە ەرەكشە كوڭىل ءبولۋ قاجەت.
ءبىلىم بەرۋ جۇيەسىنىڭ ماڭىزدى ماسەلەلەرىنىڭ ءبىرى — ساپا مەن باعا اراسىنداعى سايكەسسىزدىك. وسىعان بايلانىستى ب. ساعىنتاەۆ كەزدەسۋ قاتىسۋشىلارىن سەبەپتەردى انىقتاۋعا جانە بىرلەسىپ قاجەتتى شارالاردى قابىلداۋعا شاقىردى. جوو-لار مەن كوللەدجدەرگە قويىلاتىن تالاپتار — تۇلەكتەردىڭ جۇمىسقا ورنالاسۋىن قامتاماسىز ەتۋ جانە وقىتۋشىلار قۇرامىنىڭ ءتيىستى بىلىكتىلىگىنىڭ بولۋى. بۇل ءۇشىن بىرقاتار شەشىمدەر قابىلداندى: جوو-لاردان جۇمىسقا ورنالاسۋ كورسەتكىشتەرى تومەن ماماندىقتاردىڭ ليتسەنزيالارى قايتارىپ الىنادى, ءاربىر بەس جىلدا وقىتۋشىلار بىلىكتىلىك تالاپتارىنا سايكەس ەمتيحان تاپسىرادى. بۇدان وزگە, ۋنيۆەرسيتەتتەر مەن كوللەدجدەردىڭ تەحنيكالىق جابدىقتالۋى زاماناۋي تالاپتارعا سايكەس كەلۋى كەرەك ەكەنى اتالىپ ءوتتى.
سونىمەن قاتار, كەزدەسۋ بارىسىندا جامبىل وبلىسىنىڭ ءبىلىم بەرۋ سالاسىنىڭ وكىلدەرى ءسوز سويلەدى. م. ح. دۋلاتي اتىنداعى تاراز مەملەكەتتىك ۋنيۆەرسيتەتىنىڭ رەكتورى م. سارىبەكوۆ وبلىستا ءبىلىم بەرۋ جۇيەسىن ودان ءارى دامىتۋ باعىتتارى اراسىندا زاماناۋي تالاپتاردى جانە ءوڭىر ەكونوميكاسىنىڭ قاجەتتىلىكتەرىن ەسكەرە وتىرىپ, جاڭا ماماندىقتاردى اشۋ ماسەلەسىن اتاپ ءوتتى. تاراز مەملەكەتتىك پەداگوگيكالىق ۋنيۆەرسيتەتىنىڭ رەكتورى ە. امىربەك ۇلى وقىتۋعا جاڭا ءپاندى قوسۋ تۋرالى ۇسىنىس ءبىلدىردى. تاراز يننوۆاتسيالىق-گۋمانيتارلىق ۋنيۆەرسيتەتىنىڭ رەكتورى ە. ساۋراقوۆ بۇگىندە پرەزيدەنتتىڭ بەس الەۋمەتتىك باستاماسىن ورىنداۋ اياسىندا ىسكە اسىرىلىپ جاتقان ستۋدەنت جاستاردى جاتاقحانامەن قامتاماسىز ەتۋ ماسەلەسىن كوتەردى. قاراتاۋ گۋمانيتارلىق-تەحنيكالىق كوللەدجىنىڭ ديرەكتورى د. ماسەلبەكوۆ ءوز سوزىندە جۇمىسشى ماماندىقتارى (ينجەنەرلىك-پەداگوگيكالىق, قۇرىلىس, حيميا جانە ت.ب.) بويىنشا قوسارلى ءبىلىم بەرۋ تاقىرىبىن قوزعادى.
وبلىستىق ءبىلىم باسقارماسىنىڭ باسشىسى ر. تۇرماحانبەتوۆا ءوز كەزەگىندە وڭىردە مەكتەپكە دەيىنگى جانە ورتا ءبىلىم بەرۋدىڭ قولجەتىمدىلىگى مەن ساپاسىن ارتتىرۋ بويىنشا قابىلدانىپ جاتقان شارالار تۋرالى باياندادى. مەكتەپكە دەيىنگى ءبىلىم بەرۋ بويىنشا: وسى جىلدىڭ باسىنان بەرى وبلىستا 3357 ورىنعا ارنالعان 35 مەكەمە, ونىڭ ىشىندە 30 جەكەمەنشىك بالاباقشا مەن 5 شاعىن ورتالىق اشىلعان. وسىلايشا, 3 جاستان 6 جاسقا دەيىنگى بالالاردى قامتۋ 98% قۇرايدى. پرەزيدەنتتىڭ تاپسىرماسى بويىنشا ورتا ءبىلىم بەرۋ ساپاسىن ارتتىرۋ ماقساتىندا نازارباەۆ زياتكەرلىك مەكتەپتەرى جۇيەسىنە 40 ءبىلىم بەرۋ مەكەمەسى كوشىرىلدى. 16 مىڭعا جۋىق مۇعالىم ەڭبەكاقىلارىنا 30% كولەمىندە ۇستەمە اقى الادى.
بۇعان قوسا, ماسەلەلەردى تالقىلاۋ بارىسىندا ستۋدەنت جاستاردىڭ وكىلدەرى پرەزيدەنتتىڭ قازاقستان حالقىنا جولداۋىندا ايتىلعان باستامالارعا قولداۋ ءبىلدىردى. اتاپ ايتقاندا, جامبىل پوليتەحنيكالىق جوعارى كوللەدجىنىڭ IV كۋرس ستۋدەنتى م. اسىلحان جاڭا نەمىس ءبىلىم بەرۋ باعدارلاماسى بويىنشا العان تاجىريبەسىمەن ءبولىستى. باعدارلاما بىرنەشە بىلىكتىلىكتى الۋعا مۇمكىندىك بەرەدى. ماسەلەن, 2,5 جىل ىشىندە ول 10-عا جۋىق بىلىكتىلىكتى يگەردى: بۇل — سىلاق جانە گەودەزيالىق جۇمىستار, كىرپىش قالاۋ, بەتون, مونتاج جانە ارلەۋ جۇمىستارى. الىنعان بىلىمدەر مەن داعدىلار ەڭبەك نارىعىندا ءتيىستى جۇمىستى تابۋعا ەلەۋلى سەپتىگىن تيگىزەدى.
تاراز مەملەكەتتىك پەداگوگيكالىق ۋنيۆەرسيتەتىنىڭ سوڭعى كۋرس ستۋدەنتى ءۇ. ءىلياسوۆا, ءوز كەزەگىندە, «مۇعالىم مارتەبەسى تۋرالى» زاڭدى قابىلداۋ جونىندەگى ەلباسىنىڭ باستاماسىن قولدايتىنىن جەتكىزدى. ونىڭ ايتۋىنشا, بۇل جاس پەداگوگتار مەن ستۋدەنتتەردى جىگەرلەندىرەدى. اتالعان زاڭ جاس ماماندارعا وزدەرىنە دەگەن سەنىمدى ۇيالاتىپ, ءساتتى ناتيجەلەر كورسەتۋگە جول اشادى, ال ءبىلىم بەرۋ سالاسىن قارجىلاندىرۋدى ۇلعايتۋ جاس مامانداردىڭ ۇستاز بولۋعا دەگەن قىزىعۋشىلىعىن وياتپاق.
«ەلباسىمىز بيىلعى جولداۋىندا 2019 جىلدى جاستار جىلى دەپ بەلگىلەدى. بەس الەۋمەتتىك باستاماسىندا جاتاقحانا ماسەلەسىنە توقتالدى. بۇنىڭ بارلىعى جاستارعا جاسالىپ جاتقان قولداۋ دەپ بىلەمىز. ءبىز, جاستار, پرەزيدەنتكە شەكسىز العىس ايتامىز», — دەدى ءوڭىر جاستارىنىڭ اتىنان ءۇ. ءىلياسوۆا.
پرەمەر-مينيستر وڭىردە ءبىلىم بەرۋ قىزمەتتەرىنىڭ ساپاسىمەن تانىسۋ ماقساتىندا جوعارى پوليتەحنيكالىق كوللەدجدىڭ ماتەريالدىق-تەحنيكالىق جابدىقتالۋىن تەكسەردى. جالپى حيميا زەرتحاناسىنا باردى, وندا حيميالىق تالداۋعا ارنالعان جاڭا قوندىرعىلار ەنگىزىلگەن. بۇدان وزگە, ب. ساعىنتاەۆقا روبوتتى تەحنيكانىڭ ازىرلەنگەن جۇيەسى تانىستىرىلدى. جامبىل وبلىسى اكىمدىگىنىڭ دەرەكتەرى بويىنشا تەحنيكالىق جانە كاسىپتىك ءبىلىم بەرۋ سالاسىندا 48 ۇيىم جۇمىس ىستەيدى, ونىڭ 25-ءى — مەملەكەتتىك. 2018 جىلى ەكونوميكانىڭ 94 باسىم سالاسى بويىنشا 27 396 ستۋدەنت, ونىڭ ىشىندە 14 657 — مەملەكەتتىك تاپسىرىس بويىنشا تجكب الۋدا.
