وتىرىستا دەپۋتات ولگا پەرەپەچينا «قازاقستان رەسپۋبليكاسىنىڭ ۇلتتىق قورىنان 2019-2021 جىلدارعا ارنالعان كەپىلدەندىرىلگەن ترانسفەرت تۋرالى» جانە «2019 - 2021 جىلدارعا ارنالعان رەسپۋبليكالىق بيۋدجەت تۋرالى» زاڭ جوبالارىنىڭ سەنات كوميتەتتەرى مەن جۇمىس توپتارىندا تالقىلانۋ بارىسى تۋرالى حاباردار ەتتى.
ق. توقاەۆ ەلباسىنىڭ تاياۋداعى قازاقستان حالقىنا جولداۋىنداعى تاپسىرمالارىن قارجىلىق تۇرعىدا قامتاماسىز ەتۋ ەلىمىزدىڭ ءۇش جىلدىق بيۋدجەت جوباسىنا قوسىلعانىن اتاپ ءوتتى. «ادامدار جاقسى وزگەرىستەردى ناقتى سەزىنۋ ءۇشىن مەملەكەت باسشىسىنىڭ تاپسىرمالارىن لايىقتى دەڭگەيدە ورىنداۋ – ءبىزدىڭ باستى ماقساتىمىز», - دەپ اتاپ ءوتتى سەنات باسشىسى.
بيۋدجەتتىڭ شىعىس بولىكتەرىن ۇلعايتۋ تۋرالى دەپۋتاتتاردىڭ ۇسىنىستارى تۋرالى ايتا كەلىپ, ق.توقاەۆ مەملەكەت قارجىسىن ءتيىمدى پايدالانۋدى قامتاماسىز ەتۋ تۋرالى ەلباسىنىڭ العا قويعان مىندەتىن ەسكە سالدى. سەنات توراعاسىنىڭ پىكىرىنشە, ءبىزدىڭ ازاماتتارىمىزدى تولعاندىراتىن الەۋمەتتىك-ەكونوميكالىق كوكەيكەستى ماسەلەلەردىڭ شەشىمى مەن ايماقتىق جانە مەكەمەلەر مۇددەلەرىنىڭ اراجىگى ايقىن بولۋى ءتيىس. رەسپۋبليكالىق بيۋدجەت ەڭ الدىمەن ءبىزدىڭ ازاماتتارىمىزدىڭ ءال-اۋقاتىنىڭ ارتا ءتۇسۋىن قامتاماسىز ەتۋى ءتيىس. ق.توقاەۆ ول ءۇشىن باسىمدىقتاردى ايقىنداۋ قاجەت ەكەنىنە نازار اۋداردى.
سەنات توراعاسى اتاپ وتكەندەي, تاياۋدا وتكەن قاۋىپسىزدىك كەڭەسىنىڭ وتىرىسىندا كوممۋنالدىق قىزمەت كورسەتۋ باعاسىنىڭ نەگىزسىز ءوسۋى مەن بيۋدجەت قارجىسىن ءوز ماقساتىنان باسقا سالاعا پايدالانۋ تۋرالى قاتاڭ ايتىلدى. ق.توقاەۆتىڭ پىكىرىنشە, شىنايى نيەت پەن بىلىكتى شەشىم ارقىلى ۇنەمدەۋ جانە قولدا بار قورلاردى پايدالانۋ ەسەبىنەن بىرقاتار ماسەلەلەردىڭ شەشىمىن تابۋعا بولادى.
توراعا وسىعان بايلانىستى پارلامەنتشىلەردى بيۋدجەتتىڭ شىعىس بولىگىن ۇلعايتۋعا اپاراتىن بارلىق ۇسىنىستاردى مۇقيات ويلاستىرۋعا شاقىردى. «تەك مەملەكەتتىك مۇددە تۇرعىسىنان قاراۋ كەرەك, كوميتەتتەر مەن دەپۋتاتتاردىڭ بارلىق ۇسىنىستارى تەك وسى كوزقاراستان قارالۋى ءتيىس», - دەدى ق.توقاەۆ.
