قازاقستان • 14 قاراشا، 2018

باتىس قازاقستان وبلىسىنىڭ جانىبەك اۋىلىندا 40 پاتەر پايدالانۋعا بەرىلدى

152 رەتكورسەتىلدى

باتىس قازاقستان وبلىسىنىڭ ەڭ شالعاي جاتقان اۋداندارىنىڭ ءبىرى – جانىبەك اۋىلىندا ءبىر كۇندە قوسپاتەرلىك 20 ءۇي پايدالانۋعا بەرىلدى. مەملەكەتتىك باعدارلاما بويىنشا جاڭا پاتەر العانداردىڭ قاتارىندا كوپ بالالى وتباسىلار، جالعىزباستى انالار، اتا-اناسىنان ايرىلعاندار، بيۋدجەت سالاسى قىزمەتكەرلەرى، تاعى باسقا الەۋمەتتىك وسال توپ وكىلدەرى بار.

ناۋرىز كوشەسىندە قازداي تىزىلگەن بۇل ۇيلەردىڭ ماڭايى توي بولارداي ابىر-سابىر. «نۇرلى جەر» باعدارلاماسى بويىنشا سالىنعان ەكىپاتەرلىك جيىرما تۇرعىن ءۇيدىڭ قۇرىلىسى اياقتالىپ، جاڭا يەلەرىن تاۋىپ جاتىر. ايتۋلى شاراعا اۋدان باسشىلارىنان بولەك، باتىس قازاقستان وبلىسى اكىمىنىڭ ورىنباسارى ميرجان ساتقانوۆ ارنايى كەلىپتى.

- قۇرمەتتى جەرلەستەر! بارشاڭىزدى وبلىس اكىمى التاي كولگىنوۆتىڭ اتىنان بۇگىنگى قۋانىشتارىڭىزبەن شىن جۇرەكتەن قۇتتىقتايمىن! وسىناۋ شاراعا قاتىسقانىما ءوزىم دە قۋانىشتىمىن. ەلىمىزدە جۇزەگە اسىرىلىپ جاتقان «نۇرلى جەر»، «7-20-25» باعدارلامالارىنىڭ ارقاسىندا ءوڭىر، اۋدان تۇرعىندارى باسپاناعا قول جەتكىزۋدە. سونىڭ جەمىسىن بۇگىن وزدەرىڭىز دە كورىپ وتىرسىزدار. وسى تۇرعىن ۇيلەردى سالعان مەردىگەرگە، وعان اتسالىسقان بارشا ازاماتتارعا العىسىمدى بىلدىرەمىن. پاتەرلەرىڭىز قۇتتى بولىپ، ءىشى بالالاردىڭ شات كۇلكىسىنە تولى بولسىن! – دەگەن ميرجان مۇنايدار ۇلى پاتەر يەلەرىنە باسپانا كىلتىن تابىس ەتتى.

وسى كۇنى 4 بولمەلى سۋ جاڭا پاتەرگە يە بولعان ازاماتتىڭ ءبىرى شەرنياز شامشيدەنوۆ. 39 جاسار شەرنياز جانىبەك اۋىلىنداعى مەملەكەتتىك مەكەمەلەردىڭ بىرىندە قاراۋىل بولىپ قىزمەت ەتەدى ەكەن. بەس بالانىڭ اكەسى. بالالارىنىڭ الدى 7 سىنىپتا وقىسا، كەلىنشەگى نادەجدا ەكى جاسار كەنجەسىن باعىپ ۇيدە وتىر ەكەن.

- وسىدان بەس جىل بۇرىن كوپ بالالى وتباسى رەتىندە تۇرعىن ءۇي كەزەگىنە تۇرىپ ەدىك. مىنە، «نۇرلى جەر» باعدارلاماسىنىڭ ارقاسىندا باسپانالى بولىپ جاتىرمىن. اۋدان باسشىلارىنا العىسىم شەكسىز، - دەيدى شەرنياز.

جاڭا پاتەر كىلتىن تاپسىرعان اۋدان باسشىلارى قازاق داستۇرىمەن سۋ جاڭا ۇيلەردىڭ بىرىنە كىرىپ، ءدام تاتىپ شىقتى. بۇل – وسى وڭىرگە بەلگىلى ءانشى شىنار قايىپوۆاعا بەرىلگەن ءۇش بولمەلى پاتەر ەكەن.

- مەن جانىبەك اۋداندىق مادەنيەت ۇيىندە مادەني دەمالىستى ۇيىمداستىرۋشى لاۋازىمىندا 17 جىلدان بەرى ەڭبەك ەتىپ كەلەمىن. وتباسىم، ءۇش بالامىز بار. جەرگىلىكتى اكىمدىكتەن تۇرعىن ءۇي سۇراپ، پاتەر كەزەگىنە 4 جىل بۇرىن تۇرعان ەدىك. وتە قۋانىشتىمىز. بۇل ۇيلەردىڭ اي سايىنعى تولەمى دە كوپ ەمەس، 8-9 مىڭ تەڭگە ارالىعىندا ەكەن. بيىل جانىبەكتە قونىس توي كوپ، - دەيدى شىنار بىزگە.

شىنىمەن دە جانىبەك اۋدانىندا سوڭعى ەكى جىلدا قۇرىلىس قارقىندى ءجۇرىپ جاتىر. بىلتىر 104 ءۇيدىڭ قۇرىلىسى باستالعان ەكەن. ءۇش پاتەرلى 8 ءۇي، بارلىعى 24 باسپانا 2017 جىلى-اق يەسىن تاپقان. ال بيىل سۋ جاڭا 80 پاتەر تاپسىرىلىپ وتىر. بۇدان بولەك، بۇرىننان تۇرعان ءبىر عيمارات كۇردەلى جوندەۋدەن وتكىزىلىپ، تاعى 8 وتباسى باسپانالى بولعان.

- جانىبەك اۋىلىندا بيىل تاپسىرىلعان 40 ءۇي قانشا ادامدى قۋانتىپ، اۋىلدىڭ دا ءسانىن كەلتىردى. جانىبەك اۋىلىنىڭ ەكى شەتىندە سۋ جاڭا ۇيلەردەن ەكى كوشە پايدا بولدى. وسىدان ءبىر اي بۇرىن «نۇرلى جەر» باعدارلاماسى اياسىندا سالىنعان قوسپəتەرلى 20 ءۇيدىڭ قۇرىلىسىن مەردىگەر «Real Stroi Ibvest» جشس اياقتاپ، كىلتىن تاپسىرعان ەدى. بۇل قۇرىلىسقا 286 ملن. تەڭگە قارجى بولىنگەن. وسى ۇيلەرگە ينجەنەرلىك-ينفراقۇرىلىم جۇيەسىن جۇرگىزۋگە جەرگىلىكتى بيۋدجەتتەن 61 ملن. تەڭگە قاراجات شىقتى. ول جۇمىستاردى «سيمۆول»، «Real Stroi Invest» فيرمالارى اتقاردى. ال بۇگىنگى 20 ءۇيدىڭ قۇرىلىسىن «قازقۇرىلىس سەرۆيس» جشس اتقارىپ شىقتى. بۇعان ەل بيۋدجەتىنەن 298 ملن. تەڭگە، ينجەنەرلىك-ينفراقۇرىلىم جۇيەسىن جۇرگىزۋگە جەرگىلىكتى بيۋدجەتتەن 80 ملن. تەڭگە قارجى ءبولىندى. جاڭا ۇيلەردىڭ اۋدانى – 71 شارشىمەتر، - دەيدى جانىبەك اۋدانى اكىمىنىڭ ورىنباسارى ءبىرجان مەڭەشوۆ.

قازبەك قۇتتىمۇرات ۇلى

«ەگەمەن قازاقستان»

سوڭعى جاڭالىقتار

تويدىڭ سوڭى توپىرلاعان اۋرۋ

ايماقتار • بۇگىن، 10:22

ۇعىنا بىلگەنگە – ۇلت تاعدىرى

ساياسات • بۇگىن، 06:57

كوڭىلگە مەدەت بولعان ماقالا

رۋحانيات • بۇگىن، 06:56

54 ادام جازىلىپ شىقتى

كوروناۆيرۋس • بۇگىن، 06:39

ەل بولىپ ەڭسەرەمىز

ساياسات • بۇگىن، 06:20

بۋمەرانگ

رۋحانيات • بۇگىن، 05:54

قورعاۋشىلارعا دا قولداۋ قاجەت

ايماقتار • بۇگىن، 05:46

تويدىڭ سوڭى توپىرلاعان سىرقات

ايماقتار • بۇگىن، 05:43

اقيرەكتە – ارىستان باب...

تانىم • بۇگىن، 05:33

تەاتردىڭ ونلاين تارتۋى

رۋحانيات • كەشە

ۇقساس جاڭالىقتار