«قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋىندا مەملەكەت باسشىسى قولايلى ءومىر ءسۇرۋ ورتاسىن تۋدىرۋ ءۇشىن ساپالى ءارى قولجەتىمدى تۇرعىن ءۇيدىڭ بولۋىن نەگىزگى فاكتورلاردىڭ ءبىرى رەتىندە اتادى.
نىساندى ارالاۋ كەزىندە پرەمەر-مينيستر ب. ساعىنتاەۆقا جاڭا ىقشام اۋداندا بيىل 10 ءۇيدىڭ (800 پاتەر) قۇرىلىسىن اياقتاۋ جوسپارلانعانى تۋرالى باياندادى. تۇرعىن ۇيلەر پرەزيدەنتتىڭ «بەس الەۋمەتتىك باستاما» ۇندەۋىندە ايتىلعان «7–20–25» باعدارلاماسى بويىنشا ساتىلاتىن بولادى. بۇدان وزگە, تۇرعىن ءۇي الابىندا جەكە قۇرىلىسى سالۋشىلار 205 تيپتىك جەكە تۇرعىن ۇيلەر سالىپ جاتىر, ولاردىڭ قۇرىلىسى دا جىل سوڭىنا دەيىن اياقتالادى.
تۇرعىن ءۇيدىڭ قولجەتىمدىلىگى مەن ساپاسىن ارتتىرۋ ماقساتىندا 2018 جىلى وڭىردە «نۇرلى جەر» باعدارلاماسى بويىنشا 32 تۇرعىن ءۇي مەن 37 ينجەنەرلىك ينفراقۇرىلىم جوباسىن سالۋ ءۇشىن بارلىعى 13 ملرد تەڭگە بولىنگەن. ونىڭ يگەرىلۋى قازىر 96% قۇراپ وتىر. ناتيجەسىندە 10 ايدا 448,3 مىڭ م² تۇرعىن ءۇي تاپسىرىلدى, بۇل وتكەن جىلدىڭ كورسەتكىشىنەن 8,4%-عا جوعارى.
وبلىس اكىمىنىڭ ورىنباسارى ە. داۋىلباەۆ سونىمەن قاتار مەملەكەت باسشىسىنىڭ تاپسىرماسى بويىنشا وبلىس اكىمدىگى جەرگىلىكتى بيۋدجەتتەن باستاپقى جارنانىڭ 10% سۋبسيديالاۋ تەتىگىن ەنگىزگەنىن حابارلادى. جالپى, باعدارلاما بيىل وبلىستا ءۇي كەزەگىندە تۇرعىنداردىڭ 30% قامتاماسىز ەتۋگە مۇمكىندىك بەرەدى.
ەسكە سالايىق, ەلىمىز بويىنشا «نۇرلى جەر» باعدارلاماسى اياسىندا بيىلعى جىلدىڭ 9 ايىندا 8,8 ملن م² تۇرعىن ءۇي پايدالانۋعا بەرىلدى, بۇل 2017 جىلدىڭ وسىنداي كەزەڭىمەن سالىستىرعاندا 11,6%-عا ارتىق. 77 مىڭنان استام وتباسى ءوز باسپانا جاعدايلارىن جاقسارتتى, ونىڭ ىشىندە 9,5 مىڭ وتباسى مەملەكەت قاراجاتى ەسەبىنەن سالىنعان تۇرعىن ۇيگە يە بولدى. قر ينۆەستيتسيالار جانە دامۋ مينيسترلىگىنىڭ مالىمەتىنشە, بيىل بارلىعى 12,1 ملن م² كەم ەمەس تۇرعىن ءۇيدى پايدالانۋعا بەرۋ جوسپارلانعان, ونىڭ ىشىندە مەملەكەتتىك ينۆەستيتسيالار اياسىندا 1,3 ملن م² نەمەسە 22 مىڭ پاتەر بەرىلمەك.
