بۇل ءداستۇر بۇگىن دە جالعاسىن تاۋىپ وتىر. ەندى اعارتۋشى ۇستاز سپانديار كوبەەۆتىڭ قۇرمەتىنە ءدارىسحانا اشىلدى. ونىڭ لەنتاسىن ۋنيۆەرسيتەت رەكتورى, پروفەسسور ەركىن ءابىل مەن ۇستاز ۇرپاقتارىنىڭ ءبىرى ماعىش عارىپقىزى قيدى.
– سپانديار كوبەەۆتىڭ اتىنا ءدارىسحانا بەرۋ كوپتەن ويلاستىرىپ جۇرگەن شارۋا بولاتىن. ءبىلىم سالاسىنىڭ قايراتكەرلەرىن, عالىمدار مەن بەلگىلى ۇستازداردى جاستار ۇمىتپاۋى ءتيىس. سوندىقتان ءدارىسحانا اتىن بەرۋ حالقىمىزدىڭ ۇلىلارىن ۇمىتتىرماي, جاستارعا ناسيحاتتاۋدىڭ ءبىر ءتاسىلى دەپ بىلەمىز. ءبىزدىڭ ۋنيۆەرسيتەتتە مۇنداي ءىس جالعاسىن تاباتىن بولادى, – دەدى ەركىن امانجول ۇلى.
ءدارىسحانادا سپانديار كوبەەۆتىڭ ءومىر جولى مەن شىعارماشىلىعى تۋرالى اقپاراتتار, سۋرەتى ىلىنگەن. اعارتۋشى ۇستازدىڭ قازاق ادەبيەتىندە دە وزىندىك ورنى بار. ول قارا سوزبەن جازىلعان العاشقى رومانداردىڭ ءبىرى «قالىڭمالدىڭ» اۆتورى جانە كرىلوۆتىڭ شىعارمالارىن قازاق ۇعىمىنا سايكەستەندىرىپ اۋدارعان ەدى.
– ىبىراي التىنساريننەن ءبىلىم العان, ءىزىن جالعاعان ۇستازدار قوستاناي جەرىندە از بولماعان. ولاردىڭ كوشىن ۇلتتىڭ ۇيتقىسى بولعان احمەت بايتۇرسىن ۇلى, مىرجاقىپ دۋلات ۇلى, ەلدەس وماروۆ باستادى, ولاردى سپانديار كوبەەۆ, بەكەت وتەتىلەۋوۆ جالعادى. سپانديار كوبەەۆتىڭ العاشقى كىتاپتارى «ۇلگىلى بالا», «ۇلگىلى ءتارجىما» دەپ اتالادى. ول بىلىممەن بىرگە بالانىڭ تاربيەسىنە كوپ كوڭىل بولگەن. بۇل ءال-فارابي بابامىزدىڭ «تاربيەسىز بەرگەن ءبىلىم قاۋىپتى» دەگەن ويىمەن ۇندەس», دەدى اقىن اقىلبەك شاياحمەت.
سپانديار كوبەەۆ ءومىرىنىڭ سوڭىنا دەيىن مەڭدىعارا اۋدانىنا قاراستى اقسۋات اۋىلىندا تۇردى, سونداعى ورتا مەكتەپتى باسقاردى. الدىنان مىڭداعان شاكىرت ءبىلىم الدى, بۇكىل وقۋشىلارى ونى «اتاي» دەپ اتاعان. وسى «اتاي» دەگەن ءسوزدىڭ وزىنەن ۇستاز بەن بالا اراسىنداعى كەرەمەت جىلىلىق, شاكىرتتىڭ ۇستازعا دەگەن قۇرمەتى ءبىلىنىپ تۇرعانداي. ۇستازدى ورىس ءتىلدى وقىرماندار ورتاسىنا تانىستىرۋ ماقساتىمەن كوپ ىزدەنگەن جاساعان ارداگەر ۇستاز سۆەتلانا ماچنەۆا سپانديار كوبەەۆتىڭ بالانىڭ بىلىمگە ىنتاسىن وياتۋدا بۇگىنگى مۇعالىمدەر ۇيرەنەتىن ۇلگىسى مول ەكەنىن ايتتى.
– بالالاردىڭ بىلىمگە ىنتاسىن وياتۋ – دارىندى ۇستازدىڭ عانا قولىنان كەلەدى. ۇستازىن جاقسى كورگەن بالا مەكتەپتى دە جاقسى كورەدى, جاقسى وقۋعا تىرىسادى. وتاندىق, ونىڭ ىشىندە قازاق پەداگوگيكاسىنا ۇلكەن ۇلەس قوسقان سپانديار كوبەەۆتىڭ ءوزى بالالاردى وتە جاقسى كورگەن. جالپى, قازاق پەداگوگيكاسى – الدىمەن ادامگەرشىلىكتى جوعارى قويۋمەن ەرەكشەلەنەدى. قازىر اقپارات زامانى, ءبىلىم سالاسىنا ءتۇرلى تەحنولوگيالار ەنگىزىلىپ جاتىر. بىراق مۇعالىم بالانى جاقسى كورمەسە, سول وزىق تەحنولوگيالاردىڭ ەشقايسىسى دا كۇتكەن ناتيجەنى بەرمەيدى. ءبىزدىڭ مۇعالىمدەر سپانديار كوبەەۆ سياقتى كەمەڭگەر ۇستازدان وسىنى ۇيرەنۋ كەرەك, – دەدى سۆەتلانا گريگورەۆنا.
اقىن, عالىم سەرىكباي وسپان ۇلى شارا بارىسىندا ىبىرايدىڭ ءىزىن جالعاعان سپانديار كوبەەۆتىڭ ءومىرى مەن قىزمەتى كەڭەستىك كەزەڭدە زەرتتەلسە دە, ونىڭ بۇگىنگە جەتپەگەن بەيمالىم جاعى زەرتتەۋدى قاجەت ەتەتىنىن ەسكە سالدى.
– مىڭداعان شاكىرتكە ۇستاز بولعان تۇلعانىڭ ءوز ۇستازى دوسماعۇل توقتاباەۆ تۋرالى كوپ ايتىلا بەرمەيدى. قازىر وسىنداي ەل ىشىندە ساۋات اشۋعا بار كۇش-جىگەرىن سالعان قايراتكەرلەر جايىندا زەرتتەۋلەر قولعا الىنسا ارتىق بولماس ەدى. ايتپاقشى سپانديار اتامىز مەكتەپكە ءدارىس وقۋعا العاش كىرگەن كۇنى شاكىرتتەر الدىندا ءسوزدى «كەل, بالالار, وقىلىق!» دەپ, ۇلى ۇستاز ىبىراي ءالتىنساريننىڭ ولەڭىمەن باستاپ كەتكەن ەكەن. قازىر دە مەكتەپ مۇعالىمدەرى ءار وقۋ جىلى باستالعاندا اتامىزدىڭ وسى ءۇردىسىن داستۇرگە اينالدىرسا نەسى ايىپ؟, دەپ بەلگىلى اقىن, عالىم سەرىكباي وسپان ۇلى ۇسىنىسىن دا ايتتى.
ءدارىسحانانىڭ اشىلۋ سالتاناتىندا ستۋدەنتتەر سپانديار كوبەەۆكە ارنالعان ولەڭدەرىن وقىدى, كەلۋشىلەر ۇستازدىڭ شىعارماشىلىعىنا ارنالعان كورمەنى تاماشالادى. كەمەڭگەر ۇستازدىڭ ۇرپاقتارى اتاسىنا ارناپ اس بەرىپ, ونىڭ رۋحىنا قۇران باعىشتادى.
ءنازيرا جارىمبەت,
«ەگەمەن قازاقستان»
قوستاناي
