كەشتە الدىمەن قايسار ءالىم تۋرالى ارنايى جاسالعان دەرەكتى فيلم كورسەتىلدى. ودان كەيىن قوستاناي وبلىسى مادەنيەت باسقارماسىنىڭ باسشىسى ەرلان قالماقوۆ قالامگەردى قۇتتىقتاپ, وعان شاپان جاپتى. سونىمەن قاتار ارقالىق قالاسى, امانگەلدى, جانكەلدين اۋداندارى اكىمشىلىكتەرىنىڭ وكىلدەرى تۋعان جەردىڭ سالەمىن جەتكىزدى.
وسى كەشكە ارنايى كەلگەن بەلگىلى اقىن قورعانبەك امانجول قايسار ءالىمنىڭ شىعارمالارىنا ارنايى توقتالدى.
«مىرجاقىپتىڭ سۇيەگىن الىپ كەلۋى, كەيكى باتىردىڭ باس سۇيەگىن اكەلۋگە قاتىسۋى سياقتى قوعامدىق-ازاماتتىق ىستەردى اتقارا ءجۇرىپ, ونى مولدىرەتە جازىپ, وقىرمانعا كوركەم تىلمەن جەتكىزۋىن, باسقا پۋبليتسيستيكالىق شىعارمالارىن بىلاي قويعاندا, ءازىلحان نۇرشايىقوۆپەن 34 جىل ۇدايى حات جازىسۋى ۇلكەن ەڭبەك, قازاق ادەبيەتىندە ەپيستوليارلىق جانردى قايسەكەڭ اكەلدى دەۋگە نەگىز سالادى» دەدى قورعانبەك امانجول.
مۇنان كەيىن ءسوز العان قايسار ءالىمنىڭ قوستانايلىق ارىپتەستەرى, جەرلەستەرى اقىن جولبارىس بايازيد, جازۋشى عۇمار احمەتچين جانە تاعى باسقالار ونىڭ پۋبليتسيستيكاسى مەن جۋرناليستيكانىڭ ەڭبەكتورىسى جازعان ماڭىزى جوعالمايتىن شىعارمالارعا باعا بەردى. كەشتى وبلىستىق فيلارمونيانىڭ انشىلەرى ماناپبەك قادىروۆ پەن تالعات مولداعاليەۆ انمەن ورنەكتەپ وتىردى. ءى.وماروۆ اتىنداعى قازاق دراما تەاترىنىڭ ارتىستەرى قايسار ءالىم شىعارمالارىنان ۇزىندىلەر ورىندادى.
كەش سوڭىندا قالامگەردىڭ ءوزى تۋعان جەردىڭ اۋاسىن جۇتىپ, جەرلەستەرىمەن قاۋىشقانىنا, ءوزىن قالامگەر رەتىندە قاناتتاندىرعان قوستانايعا كەلىپ, مەرەيتويىنا وراي وقىرماندارىمەن كەزدەسكەنىنە ريزاشىلىعىن ءبىلدىردى. قازاققا ءىرى اقىندار مەن عالىمداردى بەرگەن قۇتتى جەر – قىزبەلى تۋرالى تەبىرەنە سويلەدى.
«ازدى-كوپتى ەڭبەگىڭ, ءوزىڭدى قادىرلەۋ, ادامداردى سىيلاۋ سياقتى جاقسىلىقتىڭ بارلىعى دا الدىڭنان شىعادى ەكەن. رۋحاني جاڭعىرۋ اياسىندا ءوتىپ جاتقان بۇل ەسەپ بەرۋىمە, جەرلەستەرىمدى كورگەنىمە قۋانامىن. تۋعان جەر دەگەندە الدىمەن قىزبەلدى ايتامىن. قوستانايدا قانشا اۋىل بار, سونىڭ بىرىندەي عانا كىشكەنە مەنىڭ قىزبەلىمنەن الاشتىڭ قانشاما ارىستارى تۇلەپ ۇشقان. مىرجاقىپ دۋلاتوۆ, سەيدازىم قادىرباەۆ, الماعامبەت قاسىموۆ, اسقار زاكارين, الەمگە بەلگىلى اكادەميكتەر فازىلحان بايىمبەتوۆ, سايلاۋ, ءسابيت بايزاقوۆتار – مەنىڭ اۋىلىمنىڭ ماڭگى ماقتانىشتارى! مەن قوستاناي وڭىرىندە بولىپ جاتقان جاڭارۋ, رۋحاني جاڭعىرۋلارعا, وبلىس اكىمى ارحيمەد مۇحامبەتوۆتىڭ باسشىلىعىمەن سوڭعى جىلدارى جۇزەگە اسىپ جاتقان ەكونوميكالىق تابىستارعا قۋانامىن. سىزدەرمەن قاۋىشۋ قالامگەر ءۇشىن باقىت, سونى مەن دە سەزىنىپ تۇرمىن» دەدى قايسار ءالىم جەرلەستەرىنە.
كەشتە وبلىستىق امبەباپ كىتاپحانا جۋرناليست-جازۋشى شىعارمالارىنا ارنالعان كورمە ۇيىمداستىردى, قايسار ءالىم شىعارمالارىنىڭ كورسەتكىشىن قالامگەرگە تابىس ەتتى. قايسار ءالىم دە كىتاپحاناعا ءوز كىتاپتارىن سىيلادى.
ءنازيرا جارىمبەت,
«ەگەمەن قازاقستان»
قوستاناي
