جيىن «كىتاپتارىمنان باسقا بايلىعىم جوق» دەپ باستالىپ, ەستەلىكتەرگە جالعاسقان مىرزاتاي جولداسبەكوۆتىڭ تاعىلىمدى اڭگىمەسىنەن باستالدى.
شاراعا حالىقارالىق تۇركى اكادەمياسىنىڭ پرەزيدەنتى دارحان قىدىرالى, ۇلتتىق اكادەميالىق كىتاپحانانىڭ ديرەكتورى ءۇمىتحان مۇڭالباەۆا, قازاقستاننىڭ ەڭبەك سىڭىرگەن قايراتكەرى بولات بوداۋباي, مىرزاتاي جولداسبەكوۆتىڭ نەمەرەسى – اقبوتا جولداسبەكوۆا جانە يراننان كەلگەن قوناقتار مەن ەلىمىزدىڭ زيالى قاۋىم وكىلدەرى قاتىستى.
باسقوسۋ بارىسىندا پروفەسسور كىتاپحانا قورىنا «قازاق سوۆەت ەنتسيكلوپەدياسىنىڭ» 12 تومدىعىن جانە «بولشايا سوۆەتسكايا ەنتسيكلوپەديا» كىتابىنىڭ 31 تومدىعىن تارتۋ ەتتى. بۇل كىتاپتار ەندىگىدە «مىرزاتاي جولداسبەكوۆتىڭ مەموريالدىق كىتاپ كوللەكتسياسى» زالىنىڭ سورەلەرىنەن ورىن الىپ, ەل يگىلىگىنە قىزمەت ەتەتىن بولادى.
بۇل كىتاپتاردىڭ جەكە كىتاپحانا قورىنا قالاي تۇسكەنىن ەسكە العان ول:
ء«بىزدىڭ كەزىمىزدە ءبىر جارىس بولاتىن, رۋحاني جارىس. ەل قورىنا كەلگەن كىتاپتى قولىمىزعا ۇستاي الماساق دۇنيەنىڭ ەڭ قىزىعىنان قۇر قالعانداي بولاتىنبىز. مەن ءتىپتى ورتالىق پارتيا كوميتەتىنىڭ يدەولوگيا ءبولىمىن باسقارىپ تۇرعان كەزىمدە ءبارى مەنىڭ قولىمدا بولسا دا, بۇل كىتاپتى قولعا تۇسىرە المادىم. سەبەبى, مىنا «بولشايا سوۆەتسكايا ەنتسيكلوپەدياعا» جازىلۋ مەنەن بۇرىن ءجۇرىپ كەتكەن. ءبىر كۇنى نەمەرەم – اقبوتا دۇكەن ارالاعاندا وسىنى كورىپتى. وسىلايشا, 31 تومدىق كىتاپتى تۇگەل ساتىپ الدى», دەدى.
كەزدەسۋ ورتاسىندا ءسوز العان دارحان قىدىرالى دە «قۇر قول» كەلمەپتى, كىتاپحانا قورىنا حالىقارالىق تۇركى اكادەمياسى باسىپ شىعارعان «جاميعات-ات تاۋاريح» كىتابىن سىيعا تارتتى:
«كىتاپ – سىرلاسىڭ دا, مۇڭداسىڭ دا, ول – توزبايتىن بايلىق, سارقىلمايتىن قازىنا. مەن مىرزاتاي جولداسبەكوۆتىڭ جەكە كىتاپحاناسىنا راشيد اد-ءديننىڭ «جاميعات-ات تاۋاريح» كىتابىن تارتۋ ەتەمىن, ناعىز تاريح وسىنىڭ ىشىندە. كىتاپ كىتاپحانا ارقىلى عانا ەل يگىلىنە اينالادى», دەدى حالىقارالىق تۇركى اكادەمياسىنىڭ پرەزيدەنتى.
جيىن بارىسىندا حالقىمىزدىڭ اسىل قازىناسىنا اينالعان –كىتاپحانا ساپاسىن كوتەرۋگە باعىتتالعان ۇسىنىستار دا تالقىلاندى.
قارلىعاش قۇرامىس,
«ەگەمەن قازاقستان»
