ۆەدومستۆو تاراپى بيزنەس پەن مەملەكەتتىك ورگانداردىڭ جۇمىسىن جەڭىلدەتۋدىڭ بىرنەشە جولىن قاراستىرىپ وتىر. بۇعان دەيىن ادام رەسۋرستارى مەن ۋاقىتتى تالاپ ەتكەن جۇمىستاردى ەندى تسيفرلىق تەحنولوگيالار اتقارماق. «تسيفرلىق قازاقستان» مەملەكەتتىك باعدارلاماسىنىڭ نەگىزگى باعىتتارىن ىسكە اسىرۋ بويىنشا قارجى مينيسترلىگى بىرقاتار باعىتقا باسىمدىق بەرىپ وتىر.
ەڭ الدىمەن, بيۋدجەتتى جوسپارلاۋ ساپاسىن ارتتىرۋ جوسپارلانعان. بۇعان دەيىن وسى جۇمىستى ورىنداۋعا كەم دەگەندە ەكى اي ۋاقىت كەتەتىن. قازىر بۇل مەرزىمدى 20 جۇمىس كۇنىنە دەيىن قىسقارتۋدى قولعا الىنعان. ترانسفورماتسيالاۋ ەسەبىنەن مەملەكەتتىك ورگانداردىڭ شىعىندارى دا ازايادى.
سونداي-اق مەملەكەتتىك ساتىپ الۋلار جۇيەسىنىڭ وزگە دە قۇزىرلى ورگاندارمەن بىرلەسە ارەكەت ەتۋى ەسەبىنەن راستاۋ قۇجاتتارى جۇيەلى جۇرگىزىلەدى. قاناتقاقتى جوبا قارجى مينيسترلىگىندە جىل سوڭىنا دەيىن جۇزەگە اسادى. كەلەسى جىلدان باستاپ وزگە مەكەمەلەردە ىسكە قوسىلماق. بۇل ەلەكتروندى مەملەكەتتىك ساتىپ الۋ كەزىندە فورماتتى-لوگيكالىق باقىلاۋ تۇرعىسىندا قولدانۋشىلار جىبەرەتىن قاتەلىكتەردى 10 ەسەگە دەيىن, كامەرالىق باقىلاۋ ەسەبىنەن پروتسەدۋرالىق بۇزۋشىلىقتاردى 3 ەسەگە ازايتادى. ەلەكتروندى كەلىسىمدەر مەن اكتىلەر ءبىر كەلىسىمنەن 10 مىڭ تەڭگە ۇنەمدەۋگە مۇمكىندىك بەرەدى. ناتيجەسىندە بيزنەس وكىلدەرى ۇنەمدەيتىن قارجى 10 ميلليارد تەڭگەنى قۇراماق.
تسيفرلىق ترانسفورماتسيا دەربەس شوتتار سالاسىن دا قامتىدى. بۇعان دەيىن ازاماتتار بەرەشەكتەرى بار-جوعىن راستايتىن انىقتامانى 3 كۇن كۇتەتىن ەدى. 2015 جىلى قىزمەتتەردى ورتالىقتاندىرۋ جۇمىستارى جۇرگىزىلىپ, مۇنداي انىقتامالار ءبىر-ەكى سەكۋندتا بەرىلەدى.
قارجى مينيسترلىگى تاۋار قوزعالىسىن باقىلاۋ ىسىنە دە ەرەكشە دەن قويىپ كەلەدى. ونلاين كاسسالىق باقىلاۋ ماشينالارىنىڭ ماڭىزى زور. قازىرگى كەزدە ساۋدامەن اينالىساتىن سالىق تولەۋشىلەردىڭ تەك 9 پايىزىنىڭ عانا POS-تەرمينالدارى بار. 2020 جىلعا دەيىن بۇل كورسەتكىشتى 100 پايىزعا دەيىن جەتكىزۋ كوزدەلگەن. ول ءۇشىن كاسىپكەرلەردىڭ بارلىعى ونلاين-رەجيمدە مالىمەت تاراتاتىن كاسسالىق باقىلاۋ ماشينالارىن ورناتۋلارى ءتيىس.
