قازاقستان • 09 قاراشا، 2018

قوستاناي جولدارىندا  جولاۋشىعا ۋايىم جوق

64 رەتكورسەتىلدى

قوستاناي وبلىسىنداعى باستى كۇرەتامىر جولدارمەن جۇرەتىن جولاۋشىلار قيىندىقتى اسا ۋايىمدامايدى. ويتكەنى، ولار وزىنە كەلەتىن كومەكتى بىلەتىن بولعان. اۋداندارعا زات تاسيتىن جۇرگىزۋشى ۆلاديمير راششۋپكين ونى ءوز تاجىريبەسىنەن كورىپ ءجۇر. جاقىندا تال تۇستە قوستاناي-اۋليەكول تاس جولىمەن اۋدانعا جۇك اپارا جاتقان «فولكسۆاگەن» ماشيناسىنىڭ دوڭعالاعى جارتى جولدا ىستەن شىقتى. ءوزىنىڭ ماشينا قورابىندا جاتقان قۇرالى سايكەس كەلمەي، اڭتارىلىپ تۇرىپ قالدى.

«جولاۋشى ماشينالاردىڭ ەشقايسىسى «نە بولدى؟» دەپ كىدىرۋدى بىلمەيدى، زۋىلداپ ءوتىپ جاتىر. مۇمكىن مەن اۋىرىپ تۇرعان شىعارمىن؟ مەن وسى جولدا جۇرگەنىمە تالاي جىل بولدى. جۇرگىزۋشىلەر وتىنسە، ىلعي توقتاپ، كومەكتەسەمىن. ەشكىمنىڭ توقتاماعانىنا رەنجىپ تۇرعانمىن. وسى جولدا كەزەكشىلىك اتقارىپ جۇرگەن پوليتسەيلەر كەلە قالدى. ولار ەكى سوزگە كەلگەن جوق، دوڭعالاقتى اۋىستىرىپ بەردى» دەيدى ۆلاديمير راششۋپكين.

پوليتسيا دەپارتامەنتىنىڭ جول-پاترۋلدىك پوليتسياسى باتالونىنىڭ قىزمەتكەرلەرى جانات قۇلمانوۆ پەن اسلان سەيداحمەتوۆتىڭ تەحنيكالىق ءبىلىمى كوپ پايداعا اسىپ ءجۇر. ولارعا ماشينانى تەكسەرىپ، دوڭعالاعىن اۋىستىرىپ بەرۋ قيىنعا سوقپايتىن ءىس. پوليتسەيلەردىڭ ماشيناسىندا «دومكرات» قۇرالى جاتادى. «كەرەك تاستىڭ اۋىرلىعى جوق» دەگەن، ول وسىلاي پايداعا اسىپ كەتەدى. بۇل ۇساق-تۇيەك ەمەس، ساۋدا ۇيىمى وكىلىنىڭ ماشيناسىندا تەز بۇزىلاتىن، اۋىلداعىلار كۇتىپ وتىرعان قانشا زات بار ەدى.  جۇرگىزۋشى العىسىن ايتا-ايتا اۋدانعا ءجۇرىپ كەتتى.

ءنازيرا جارىمبەت،

«ەگەمەن قازاقستان»

قوستاناي

سوڭعى جاڭالىقتار

ۇقساس جاڭالىقتار