قازاقتىڭ ءمۇسىن ونەرىندە وزىندىك قولتاڭباسىن قالدىرعان ءارى ەرەكشە تۋىندىلارىمەن ەلىمىز عانا ەمەس, شەتەلدەرگە دە ءمالىم بولعان باقىتجان ابىشەۆ ەسىمى كوپتەگەن ەسكەرتكىش-مۇسىندەرمەن بايلانىستى.
جاسىباي باتىر, مۇحتار اۋەزوۆ, ءال-فارابي, شىعاناق بەرسيەۆ بەينەلەرىمەن قاتار الماتىداعى توقاش بوكين, ماحامبەت, كۇلاش بايسەيىتوۆاعا قويىلعان مۇسىندەر, جاڭاقورعانداعى « ۇلى وتان سوعىسىنىڭ قۇرباندارى», اتىراۋ قالاسىنداعى يساتاي-ماحامبەت ءمۇسىنى تىكەلەي اۆتور ەسىمىمەن تىعىز بايلانىستى. ال «وليمپيەتس» تۋىندىسى شۆەيتسارياداعى لوزاننا قالاسىنداعى وليمپيادالىق كوميتەتتىڭ شتاب-پاتەرىندە ورنالاستىرىلسا, «كۇيشى» ءمۇسىنى گەرمانيادا, ء«توميريسى» ماسكەۋدە سالتانات قۇرىپ تۇر.
ەستەلىك كەشتى بەلگىلى سىنشى ءاليا بوپەجانوۆا جۇرگىزدى. ءمۇسىنشىنىڭ جۇبايى, قازاقستاننىڭ ەڭبەك سىڭىرگەن ءارتىسى شامشاگۇل مەندياروۆا ەستەلىگىمەن ءبولىسىپ, جەكە شىعارماشىلىق جۇمىستارى, اتقارىلماي قالعان جوبالارى توپتاستىرىلعان «ابىشەۆ الەمى» كىتابىن تانىستىردى. قازاقستاننىڭ حالىق ءارتىسى نۇكەتاي مىشباەۆا ول تۋا بىتكەن تالانت, ارداقتى ازامات ەدى, دەپ «شىنايى شىعارماشىلىق تالانتتى وقىتپايدى, ول ادامعا تۋا بىتەدى. مىنە, وسى ءبىر ەرەكشە تالانات باقىتجاننىڭ بويىنا ءبىتتى. ىسىنە مىعىم, اسا كوڭىلدى جۇرەتىن ازامات ەدى» دەگەن جۇرەكجاردى پىكىرىن ءبىلدىردى. ال بولات ابىشەۆ باۋىرىنا دەگەن ساعىنىشى شەكسىز ەكەنىن ءبىلدىرىپ, شاڭىراقتىڭ شامشىراعى شامشاگۇل جەڭگەسىنە العىسىن ءبىلدىردى. ء مۇسىنشى تىلەۋبەردى بيناشەۆ باقىتجان ابىشەۆ ءمۇسىن ونەرىنىڭ شىڭىندا تۇرعان قۇلاگەرى دەگەن پىكىرىمەن ءبولىستى.
شىعارماشىلىعى تىلەكەي قۇلاگەرمەن سيپاتالاتىن عاجايىپ تالانت يەسى ومىردەن وزعانىمەن ارتىندا قۇندى مۇراسىن قالدىردى. ەرەن ەڭبەگىنىڭ ارقاسىندا جامبىل جاباەۆ اتىنداعى حالىقارالىق سىيلىقتىڭ لاۋرەاتى, «ەرەن ەڭبەگى ءۇشىن» مەدالىنىڭ يەگەرى اتاندى.
ەسكە الۋ ءىس-شاراسىنا بەلگىلى قوعام جانە مادەنيەت قايراتكەرلەرى, باق وكىلدەرى مەن ستۋدەنتتەر قاتىستى.
ەلۆيرا سەرىكقىزى,
«ەگەمەن قازاقستان»
الماتى
