تسيفرلاندىرۋدىڭ ارقاسىندا «اتامەكەن-اگرو» اكتسيونەرلىك قوعامىنىڭ اۋقىمدى ءىسى تابىستى ارنادا توعىسىپ جاتقاندىعىن بۇگىندە كوز كورىپ وتىر. اۋىلشارۋاشىلىعى ونىمدەرىن مولىنان ءوندىرۋ مەن وڭدەۋ بىرنەشە ەسەگە كوبەيگەن. استىقتى اقمولا وبلىسىندا تسيفرلاندىرۋدى ءوز ىستەرىنە نەگىزگى سەرپىن رەتىندە الىپ, تۇبەگەيلى قولدانىسقا ەنگىزىپ وتىرعان, ءسويتىپ اۋىلشارۋاشىلىعى ونىمدەرىن مولىنان وندىرۋگە باعىت الىپ وتىرعان ۇجىمنىڭ ءبىرى – «اتامەكەن-اگرو» اكتسيونەرلىك قوعامى. تابىس سىرى − ەڭ الدىمەن تسيفرلاندىرۋ, نەگىزىنەن ىلكىدەگى تاجىريبە مەن جاڭا زامانعى جاڭالىقتاردى ۇشتاستىرا بىلۋىندە. ەلباسى نۇرسۇلتان نازارباەۆ ەڭبەك ونىمدىلىگىن ۇلعايتىپ, اۋىلشارۋاشىلىعىنىڭ وڭدەلگەن ءونىمىن بەس جىل ىشىندە 2,5 ەسە ۇلعايتۋ تۋرالى مىندەت جۇكتەگەنى بەلگىلى. بۇگىنگى تاڭدا وبلىس قانا ەمەس, ەلىمىز بويىنشا اۋىلشارۋاشىلىعى سالاسىندا تسيفرلاندىرۋ بويىنشا كوش باستاپ كەلە جاتقان كاسىپورىننىڭ ەلباسى تاپسىرماسىن بۇلجىتپاي ورىنداۋعا تولىق مۇمكىندىگى بار.
اعىمداعى جىلى «اتامەكەن-اگرو» كومپانياسى ەلىمىز بويىنشا وتكىزىلگەن اگروونەركاسىپ كەشەنىن تسيفرلاندىرۋ بايقاۋىندا جەڭىمپاز رەتىندە تانىلدى. قازىرگى تاڭدا استىق ەگىلەتىن القاپتارعا عارىشتان مونيتورينگ جۇرگىزۋ مۇمكىندىگىنە يە. وسىلايشا بارلىق اگروتەحنيكالىق شارالارعا ءتيىستى ساراپتاما جاساي الادى. ونىڭ ۇستىنە القاپتار كەستەسىن بەلگىلەۋ, قاي تاناپقا قانداي تۇقىم سىڭىرىلگەندىگىن, ونىڭ ونىمدىلىگىن, توپىراقتىڭ قۇنارىن ەلەكتەن وتكىزىپ, ەڭ سوڭىندا وندىرىلگەن ءونىمدى ساقتاۋ مەن وڭدەۋ ۇردىستەرىن دە وسى تسيفرلاندىرۋدىڭ ارقاسىندا باقىلاي الادى. بۇگىنگى تاڭدا ىلكىمدى جاڭالىقتىڭ ارقاسىندا ەڭبەك ونىمدىلىگى ەكى ەسە كوبەيگەن.
كومپانيانىڭ جەر كولەمى كوپ. ناقتىراق ايتساق, 260 مىڭ گەكتار جەردى قۇرايدى. وسىنشاما القاپقا ەگىلەتىن داقىل ءتۇرى دە از ەمەس. ماسەلەن, كەيبىر شارۋاشىلىقتار تەك بيداي, ارپا ەگۋگە ماماندانسا, بۇل كاسىپورىن جيىرمادان استام داقىل ءتۇرىن وسىرۋدە. كومپانيا ماماندارىنىڭ ايتۋىنا قاراعاندا, جىل سايىن القاپتاردىڭ قۇنارىن, ەگىلگەن تۇقىمنىڭ قانشالىقتى ءتيىمدى ەكەندىگىن اقىل تارازىسىنا سالىپ ەكشەپ وتىرۋ كەرەك. بۇل ۇلان-عايىر جۇمىستى تسيفرلاندىرۋسىز اتقارۋ مۇمكىن ەمەس. ونىڭ ۇستىنە قولدا بار تەحنيكالاردى ۇتىمدى پايدالانعان ءجون.
جەردى يگەرۋ, اگروتەحنيكالىق شارالاردى ۋاقتىلى اتقارۋ ەڭ الدىمەن ماتەريالدىق-تەحنيكالىق مۇمكىندىككە بايلانىستى ەكەندىگى الميساقتان بەلگىلى. سوندىقتان مۇندا ماشينا-تراكتور پاركىن جاڭالاۋعا جەتە ءمان بەرىلىپ وتىر. سوڭعى جىلدارى كومپانيا 270 اۋىلشارۋاشىلىعى تەحنيكاسىن ساتىپ الدى. ونىڭ ىشىندە قۋاتى جوعارى استىق كومبايندارى, ەگىس كەشەندەرى, توپىراق وڭدەيتىن اگرەگاتتار مەن ەڭبەك ونىمدىلىگى جوعارى تراكتورلار بار.
ءونىم مولايعان سوڭ ونى ساقتاۋ ماسەلەسىنە دە جەتكىلىكتى نازار اۋدارىلعان. سوڭعى جىلدارى استىق ساقتايتىن قامبالاردىڭ دا مۇمكىندىگى مولايىپ كەلەدى. بۇگىندە 500 مىڭ توننا داقىل ساقتاۋعا قاۋمەتتەرى تولىق جەتەدى. ەسەپتى كەزەڭ ىشىندە 7 ميلليارد تەڭگەدەن استام ينۆەستيتسيا قۇيىلدى. وسى ينۆەستيتسيانىڭ ارقاسىندا داقىل ءوندىرۋ مادەنيەتى كوپ-كورىم جاقسارىپ قالدى. ءونىم كولەمى دە وسە ءتۇستى. ماسەلەن, وتكەن جىلدارداعى قول جەتكىزگەن تابىس دەڭگەيىنەن 25 پايىز ارتىق ءونىم جيناۋ مۇمكىندىگى تۋىپ وتىر. 2017 جىلى تاۋارلى ءونىم كولەمى ودان ارعى جىلمەن سالىستىرعاندا 136,5 مىڭ تونناعا نەمەسە 41 پايىزعا كوبەيدى. ءسويتىپ ۇزىن-ىرعاسى 463 مىڭ توننانى قۇرادى.
تابىستىڭ تايقازانىن تاسىتقان كومپانيانىڭ جۇمىس ىرعاعىندا كوپ قۇپيا دا جوق. بارى زامان تالابىنا ساي تسيفرلاندىرۋ ءۇردىسىن قۋاتتاۋى. ەندىگى ارادا ءبىر كەزدە ىلكىمدى سانالعانىمەن, كونەرگەن ادىستەردى قويا تۇرىپ, تيىمدىلىگى كوزگە ۇرىپ تۇرعان جاڭانىڭ جالىنا جارماسقان ءلازىم. بۇل اۋىلشارۋاشىلىعىن تۇبەگەيلى ءتيىمدى ارناعا بۇراتىن تسيفرلاندىرۋ تەحنولوگياسى.
بايقال ءبايادىل,
«ەگەمەن قازاقستان»
اقمولا وبلىسى
