قوس ەل اراسىنداعى ستراتەگيالىق ارىپتەستىك بايلانىستاردى نىعايتۋ جونىندەگى العاشقى فورۋم 2003 جىلى ومبى قالاسىندا ءوتىپ, سودان بەرى مۇنداي ىسكەرلىك كەزدەسۋلەر شەكارالاس ايماقتاردا جۇيەلى تۇردە جالعاسىپ كەلەدى. بۇل جولى كۇن تارتىبىنە «قازاقستان مەن رەسەيدەگى ءتۋريزمدى دامىتۋدىڭ جاڭا تاسىلدەرى مەن ۇردىستەرى» اتتى وزەكتى تاقىرىپ شىعارىلدى. ال ءتۋريزمدى ۇدەمەلى دامىتۋ ءۇشىن بارلىق قاجەتتى مادەني, تاريحي, گەوگرافيالىق, كليماتتىق جاعدايلار بار. فورۋمدا ونىڭ تارتىمدىلىعىن, تانىمدىلىعىن ارتتىرۋ, باسەكەگە قابىلەتتىلىگىن نىعايتۋ ارقىلى جاڭا جۇمىس ورىندارىن قۇرۋ, شاعىن جانە ورتا بيزنەستىڭ دامۋىنا قولايلى جاعداي جاساۋ, ەكونوميكانىڭ كىرىس بولىگىن كوبەيتۋ, ساياحاتشىلار مەن دەمالۋشىلاردىڭ ەرەن قىزىعۋشىلىعىن تۋعىزۋ سەكىلدى وزەكتى ماسەلەلەر جان-جاقتى تالقىلانىپ, كوپتەگەن تىڭ يدەيالار مەن وزىق جوبالاردىڭ قولداۋ تاپقانىن ايتا كەتكەن ءجون. العاشقى كۇنى امبەباپ تەننيس ورتالىعىندا قازاقستان – رەسەي تۋريستىك كورمەسى ۇيىمداستىرىلىپ, سالتاناتتى شارانىڭ اشىلۋىنا مادەنيەت جانە سپورت ءمينيسترى ارىستانبەك مۇحامەدي ۇلى, رەسەيدىڭ تۋريزم جونىندەگى فەدەرالدىق اگەنتتىگىنىڭ باسشىسى ولەگ سافونوۆ, وبلىس اكىمى قۇمار اقساقالوۆ, ۇلتتىق كومپانيالاردىڭ جەتەكشىلەرى, ىسكەر توپتار, مينيسترلىكتەر مەن ۆەدومستۆولاردىڭ جاۋاپتى وكىلدەرى, كاسىپكەرلەر, تۋروپەراتورلار قاتىستى.
ا.مۇحامەدي ۇلى ءوز سوزىندە قازاقستان مەن رەسەي اراسىندا ءوزارا سەنىمگە, دوس-
تىققا نەگىزدەلگەن ىقپالداستىق ستراتەگياسىنىڭ نىعايا تۇسكەنىن, ۇلگى ەتۋگە تۇرارلىق تاجىريبەلەر قالىپتاسقانىن, ونىڭ ىشىندە تۋريزم كەڭ اۋقىمدىلىعىمەن سيپاتتالاتىنىن, بۇگىندە ەلدىڭ باسەكەلەستىك قابىلەتتىلىگىن ايقىندايتىن شەشۋشى فاكتورعا اينالعانىن اتاپ ءوتتى. رەسەيلىك مەيمان ەكى ەل اراسىندا دوستىققا, تۇسىنىستىككە قۇرىلعان قارىم-قاتىناستىڭ ستراتەگيالىق ماڭىزىنا توقتالدى. بۇگىندە تۋريزم حالىق شارۋاشىلىعىنىڭ 53 سالاسىن دامىتۋعا ىقپال ەتەدى جانە سينەنەرگەتيكالىق اسەرى وراسان. رەسەيگە جىلىنا 3,5 ميلليون قازاقستاندىق ساياحات جاساۋعا, دەمالۋعا كەلسە, 3 ميلليونعا جۋىق رەسەيلىك قازاقستانعا ساياحاتتايدى. بۇل تسيفرلار ۇنەمى ءوسىپ وتىرۋعا ءتيىس. بىزدە ءتۋريزمدى دامىتۋدىڭ مۇمكىندىكتەرى زور. سوندىقتان ىشكى ءتۋريزمدى زامان اعىمىنا بەيىمدەۋ, جاڭا تۇرلەرىن كوبەيتۋ قاشاندا ىرگەلى قادام بولىپ قالا بەرەدى», دەدى ول. ق.اقساقالوۆ فورۋمعا قاتىسۋشىلاردى ايتۋلى وقيعامەن قۇتتىقتاپ, سەنىم ارتىلعان ۇلكەن مارتەبە ەكەنىن تىلگە تيەك ەتتى. فورۋمنىڭ تاقىرىبى ۇلكەن ينتەگراتسيالىق مۇمكىندىكتەرگە يە. ءار وڭىردە تۋريستەردى تاڭعالدىراتىن ورىندار بار. ءبىزدىڭ وبلىستاعى ەرەكشە ايماق – يمانتاۋ-شالقار كۋرورتى. وسىنداي كورىكتى جەرلەرگە تۋريستەردىڭ كوپتەپ كەلۋىنە كۇش سالۋىمىز كەرەك. بىزدە ەمدىك قاسيەتكە يە كولدەر بار. ەكى كۇن بويى تۋريستىك اعىننىڭ ارتۋى ءۇشىن الداعى جوسپارلاردى تالقىلايتىن بولامىز», دەي كەلىپ, شەكارالىق وڭىرلەردەگى ينتەگراتسيالىق بايلانىستاردى كەڭەيتۋدىڭ ىلكىمدى تۇستارىنا توقتالدى. قىزىلجار ءوڭىرى كورىكتى جەرلەرىمەن, قاسيەتتى ورىندارىمەن تانىمال. بىرلەسكەن ىستەر مەن ناقتى شەشىمدەر قابىلداۋدىڭ ىسكەرلىك الاڭىنا اينالىپ وتىر. ەرەكشە سۇرانىسقا يە كۋرورتتىق-دەمالىس ورىندارىنىڭ سەرۆيستىك قىزمەتىن, ينفراقۇرىلىمىن جاقسارتۋعا جىلدا قوماقتى قاراجات جۇمسالادى. ەكولوگيالىق, مەديتسينالىق, ەمدىك-ساۋىقتىرۋ تۇرلەرى قارقىن الىپ كەلەدى. يمانتاۋ-شالقار ايماعى ورنالاسقان ايىرتاۋ اۋدانى 40-قا جۋىق تۋريستىك مارشرۋت ۇسىنىپ وتىر.
فورۋم شەڭبەرىندە ء«تۋريزمدى دامىتۋداعى كاسىپكەرلىكتىڭ بەلسەندى ءرولى», «تۋريزم سالاسىن تسيفرلاندىرۋداعى قازىرگى ترەندتەر», تاعى باسقا تاقىرىپتار بويىنشا پانەلدىك سەسسيالار ۇيىمداستىرىلىپ, حالىقارالىق كومپانيا وكىلدەرى, ساراپشىلار مەملەكەتتىك-جەكەمەنشىك ارىپتەستىك الەۋەتىن ارتتىرۋ, تاريحي-مادەني مۇرالاردى, ۇلتتىق قۇندىلىقتاردى ناسيحاتتاۋ, مەملەكەتتىك قۇرىلىمدارمەن بايلانىستى تەرەڭدەتۋ, قاجەتتى ينفراقۇرىلىمداردى جاساۋ, وزىق باعدارلامالاردى قولداۋ, حالىقتىڭ تۇرمىسىن, ءال-اۋقاتىن, ءومىر ءسۇرۋ ساپاسىن جاقسارتۋعا ىقپال ەتۋ ماسەلەلەرى بويىنشا وي-پىكىرلەر الماستى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
