انار جايىلعانوۆا,
پارلامەنت ءماجىلىسىنىڭ دەپۋتاتى
ەلباسى جولداۋدا ىشكى ىستەر ورگاندارىنىڭ قىزمەتكەرلەرى قىلمىسپەن كۇرەستە «الدىڭعى شەپتە» جۇرەدى, كوبىنە ءوز باسىن قاتەرگە تىگىپ, ازاماتتاردى قورعايدى دەپ اتاپ كورسەتتى. راسىندا, ىشكى ىستەر مينيسترلىگىنىڭ اقپاراتىنا سۇيەنسەك, تاۋەلسىزدىك جىلدارىندا پوليتسيا جانە ۇلتتىق ۇلان قىزمەتكەرلەرىن قوسا العاندا, مەملەكەتتىك ماراپاتتاۋعا 130 ادام ءوز قىزمەتىن اتقارۋ كەزىندە قازا بولعاننان كەيىن ۇسىنىلعان ەكەن. وسى جىلدىڭ وزىندە عانا قىزمەت اتقارۋ كەزىندە 4 پوليتسيا قىزمەتكەرى قازا بولىپ, 84 قىزمەتكەر جاراقات العان.
دەگەنمەن, بۇل سالادا كەمشىلىكتەر دە از ەمەس. بيىلدىڭ وزىندە عانا 600 قىزمەتكەر زاڭسىز ءىس-ارەكەتتەرى ءۇشىن جۇمىستان بوساتىلعان. دەمەك, شتاتتى وڭتايلاندىرىپ, پوليتسيانى وزىنە تيەسىلى ەمەس فۋنكتسيالاردان ارىلتۋ جانە ۇنەمدەلگەن قاراجاتتى جالاقىنى كوبەيتۋگە, تۇرعىن ءۇي جانە وزگە دە الەۋمەتتىك ماسەلەلەردى شەشۋگە باعىتتاعان دۇرىس. شتاتتى وڭتايلاندىرۋدى اسا بايىپتىلىقپەن جاساعان ءجون, بىلگىر مامانداردى قالدىرىپ, ولاردىڭ الەۋمەتتىك ماسەلەلەرىن دە شەشۋ قاجەت. پوليتسيا قىزمەتكەرىنىڭ كاسىبي بىلىكتىلىگىن ارتتىرۋ ماسەلەسىن جانە ونىڭ جۇمىس ىستەۋ فورماتىن زاماناۋي ۇلگىگە لايىقتاۋ كەرەك. بۇگىنگى كۇنى كەيبىر قىلمىس تۇرلەرى ۆيرتۋالدى تۇردە ورىن الىپ جاتقاندىقتان, قۇقىق قورعاۋ قىزمەتكەرلەرىنىڭ كاسىبي بىلىكتىلىگى جوعارى جانە ولاردىڭ قىزمەتى تەحنيكالىق جاعىنان قاجەتتى دەڭگەيدە قامتاماسىز ەتىلۋى ءتيىس. وسى ماسەلەلەردىڭ بارلىعى جۇيەلى تۇردە شەشىلگەن كەزدە عانا پوليتسيا قىزمەتى حالىقتىڭ سەنىمىنە يە بولاتىنى ءسوزسىز.
جاسۇلان يسا,
زاڭگەر
مەنىڭشە, پوليتسيا جۇمىسىن جاڭعىرتۋ ءۇشىن ەڭ الدىمەن تالىمگەرلىكتى قولعا الىپ, وسى باعىتتى تۇزەتىپ الۋ كەرەك. قازىرگى تاڭدا بۇرىنعى تالىمگەرلىك تاجىريبەسى نازاردان تىس قالدى. جۇمىسقا جاڭا كەلگەن جاس مامانعا باعىت-باعدار سىلتەيتىن ادام جوق. وتكەن جىلى «يسپولنەنيە ناكازاني» («جازانىڭ ورىندالۋى») جۋرنالىندا وسى جايلى «ناستاۆنيك س بولشوي بۋكۆى» اتتى ماقالا جازعان بولاتىنمىن. كوپ ماسەلە تالىمگەرگە بايلانىستى. ۇيرەتىپ, ءجون سىلتەپ وتىراتىن ادامنىڭ جوقتىعىنان جاستار جاڭىلىس باسىپ جاتادى. وسىدان كەلىپ پوليتسيانىڭ اتىنا سىن كەلەدى, قوعامدا ولارعا دەگەن تەرىس كوزقاراس قالىپتاسادى. ەكىنشىدەن, كادر الماستىرۋ تاجىريبەسىنە باسا كوڭىل ءبولىنۋى قاجەت. ءبىر اۋداننىڭ ء(ىىد) جەدەل قىزمەتكەرلەرىن ەكىنشى اۋدانعا اۋىستىرىپ وتىرۋ كەرەك. نەگە دەسەڭىز, ءبىر جەردە تالاي جىل ىستەگەن قىزمەتكەردىڭ كوزى ۇيرەنىپ, كەلەڭسىز كورىنىستەردى بايقاماي قالۋى مۇمكىن.
مارات ءباشىموۆ,
قۇقىقتانۋشى, زاڭگەر
قاۋىپسىزدىكتىڭ سالتانات قۇرۋى قۇقىق قورعاۋ ورگاندارىنىڭ قىزمەتىنە تىكەلەي بايلانىستى. سوندىقتان پرەزيدەنت قۇقىق قورعاۋ ورگاندارى جۇمىسىندا تۇبەگەيلى جانە ساپالى وزگەرىستەر قاجەت ەكەندىگىن ايتتى. ۇكىمەتكە ىشكى ىستەر ورگاندارى جۇمىسىن جاقسارتۋ جونىندەگى جول كارتاسىن ازىرلەۋدى تاپسىردى. سەبەبى, سوڭعى كەزدەرى قۇقىق قورعاۋ ورگاندارى جۇمىسىندا قوعام نارازىلىعىن تۋعىزعان كوپتەگەن كەلەڭسىز قۇقىق بۇزۋشىلىقتاردىڭ ورىن العانى بەلگىلى. جول-پاترۋلدىك قىزمەتىنىڭ جۇمىسى تىپتەن سىن كوتەرمەيدى. كوپتەگەن پوليتسيا قىزمەتكەرلەرى زاڭ نورمالارىن جەتىك بىلمەيدى.
كوبىنە پوليتسيا كورسەتكىشكە عانا سۇيەنەدى. كوبىرەك ۇستاسا, جاقسى جۇمىس ىستەيدى دەگەن ءسوز. بىراق ولاي ەمەس ەكەنىن ءبارىمىز دە بىلەمىز. ال مۇنداي جۇمىس امالى جۇرتشىلىقتىڭ اشۋ-ىزاسىن تۋعىزادى. وركەنيەتتى ەلدەردە ءجون-جوسىقسىز ادامداردى توقتاتىپ, اكىمشىلىك حاتتاما تولتىرۋ دەگەن جوق. ەندەشە پرەزيدەنت ايتقانداي, ادام ساناسىندا پوليتسيا جازالاۋشى ەمەس, كەرىسىنشە قيىن-قىستاۋ كۇن تۋعاندا كومەك قولىن سوزاتىن جاناشىر رەتىندە قالىپتاسۋى كەرەك.
