بۇل باستامانى ەكونوميكالىق ىنتىماقتاستىق جانە دامۋ ۇيىمى مەن ازيا دامۋ بانكى 2001 جىلى سىبايلاس جەمقورلىقپەن كۇرەس سالاسىندا تاجىريبە الماسۋ ءۇشىن ۇسىنعان بولاتىن. قازاقستان وعان 2002 جىلى قوسىلدى.
جيىنعا مەملەكەتتىك قىزمەت جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى ا.شپەكباەۆ, قارجى ءمينيسترى ءا.سمايىلوۆ, ازيا دامۋ بانكىنىڭ سىبايلاس جەمقورلىققا قارسى ءىس-ارەكەت جانە پاراساتتىلىق جونىندەگى ءوفيسىنىڭ كەڭەسشىسى ل.ۆونگ, ازيا جانە تىنىق مۇحيت ايماعىنىڭ 20-دان استام ەلىنىڭ مەملەكەتتىك ساتىپ الۋلار سالاسىنداعى كوررۋپتسياعا قارسى قىزمەتتەرى مەن مەملەكەتتىك ورگاندارىنىڭ وكىلدەرى, سونداي-اق ەكونوميكالىق ىنتىماقتاستىق جانە دامۋ ۇيىمىنىڭ, ازيا دامۋ بانكىنىڭ جانە بۇۇ دامۋ باعدارلاماسىنىڭ حالىقارالىق ساراپشىلارى قاتىستى.
مەملەكەتتىك حاتشى قۇتتىقتاۋ سوزىندە قازاقستان پرەزيدەنتى نۇرسۇلتان نازارباەۆتىڭ «سىبايلاس جەمقورلىقپەن كۇرەس جۇرگىزۋ ىسىندە الدىن الۋ شارالارىن جۇيەلى تۇردە قابىلداۋ باستى مىندەت بولۋعا ءتيىس» دەگەن سوزىنە توقتالدى.
گ.ابدىقالىقوۆا ۇلت جوسپارى, سىبايلاس جەمقورلىققا قارسى 2015-2025 جىلدارعا ارنالعان ستراتەگيا اياسىندا قازاقستان سىبايلاس جەمقورلىققا قارسى تۇرۋدىڭ زاماناۋي مودەلىن قالىپتاستىرىپ جاتقانىن ايتتى. ەلدە سىبايلاس جەمقورلىقتان ادا قوعام قۇرۋعا باعىتتالعان كوررۋپتسياعا قارسى ساياسات ىسكە اسىرىلۋدا. ماقساتى – ونىڭ سالدارىمەن كۇرەسۋ ەمەس, العىشارتتارىن جويۋ.
شەنەۋنىكتەرمەن تىكەلەي بايلانىستى بولدىرماۋ ءۇشىن مەملەكەتتىك قىزمەتتەردىڭ 78 پايىزى ەلەكتروندى تۇردە كورسەتىلەدى. بۇل وسى سالاداعى تۇرمىستىق سيپاتتاعى جەمقورلىق دەڭگەيىن ۇشتەن ەكىگە تومەندەتۋگە مۇمكىندىك بەردى. «مەملەكەتتىك ساتىپ الۋلار پورتالى» اشىلىپ, ونىڭ اياسىندا بارلىق مەملەكەتتىك ساتىپ الۋلار مەن ونىڭ راسىمدەرى 100 پايىز ەلەكتروندىق فورماتقا كوشىرىلدى.
قازاقستاندا تسيفرلى ۇكىمەت پەن ەلەكتروندى مەملەكەتتىك قىزمەتتەردى دامىتۋ سالاسى بويىنشا قابىلدانىپ جاتقان شارالار سىبايلاس جەمقورلىقتى مەيلىنشە ازايتۋعا باعىتتالعان.
سوڭىندا مەملەكەتتىك حاتشى گۇلشارا ابدىقالىقوۆا وتىرىسقا قاتىسۋشىلارعا مەملەكەتتىك ساتىپ الۋ سالاسىنداعى سىبايلاس جەمقورلىقتىڭ الدىن الۋ جولىندا ءتيىمدى ديالوگ ورناتۋعا تىلەكتەستىك ءبىلدىردى, دەپ حابارلادى پرەزيدەنتتىڭ ءباسپاسوز قىزمەتى.
