جاڭا عيماراتتىڭ ىشىندە پوليتسيا قىزمەتكەرلەرى مەن كەلۋشىلەرگە بارىنشا ىڭعايلى جاعداي جاسالىپتى. عيمارات ىشىندەگى بولمەلەردىڭ بارلىعىنا بەينەكامەرالار ورناتىلعان. تۇرعىندار ءۇشىن بۇل جەردە ءتۇرلى كەڭەستەر الۋعا, ارىز-شاعىمدارىن تەز ارادا تاپسىرۋعا مۇمكىندىك تۋدى.
شىنى عيماراتتىڭ ىشىندە نە بولىپ جاتقانىن سىرتتان باقىلاپ كورۋگە بولادى. مۇنىڭ ءوزى اشىقتىق, شىنايىلىق پرينتسيپتەرىن پاش ەتەدى. بىلايشا ايتقاندا, پوليتسيا جۇمىسى تۇرعىنداردىڭ تىكەلەي كوز الدىندا بولادى. ءوز كەزەگىندە ءتارتىپ ساقشىلارى دا اينەك قابىرعادان اينالادا نە بولىپ جاتقانىن ىشتە وتىرىپ-اق باقىلاۋعا مۇمكىندىك الدى.
– وتكەن جىلى ءبىز وسىنداي نىساندى سالۋ تۋرالى وبلىس باسشىلىعىنا ۇسىنىسپەن شىققان بولاتىنبىز. ءوڭىر باسشىسى ونى قولدادى. بيۋدجەتتەن قاراجات ءبولىندى – شامامەن 60 ملن تەڭگە. وسى جىلدىڭ ناۋرىزىندا قۇرىلىس باستالدى دا قىركۇيەكتە اياقتالدى, – دەدى وبلىستىق ءىىد باستىعى مەرگەنباي جاپپاروۆ. – ەڭ باستىسى, ءبارى سىرت كوزگە كورىنىپ تۇرادى جانە ەسىك بارشاعا ءاردايىم اشىق.
بۇل جەردە تاۋلىك بويى جول-پاترۋلدىك پوليتسيا قىزمەتكەرلەرى كەزەكشىلىك ەتەتىن بولادى. ال بەكەتتىڭ ىشىندە ۋچاسكەلىك پوليتسەيلەر, كامەلەتكە تولماعاندار ءىسى جونىندەگى جانە پروباتسيا قىزمەتىنىڭ ينسپەكتورلارى جۇمىس ىستەيدى.
ۋچاسكەلىك پوليتسيا ءبولىمى تولىقتاي كومپيۋتەرلەندىرىلگەن. بارلىق قۇقىق قورعاۋ ورگاندارىنىڭ مالىمەتتەر بازاسىنا كىرۋ مۇمكىندىگى بار. ول جۇيە مۇندا جەتكىزىلگەن ازاماتتاردى ەسەپتەۋلەر بويىنشا تەكسەرىستەن وتكىزۋگە – ىزدەۋدە بولعان-بولماعانى, ايىپپۇلدار بويىنشا قارىزدارى بار ما, جوق پا, بۇرىن-سوڭدى سوتتالعان با جانە ت.ب. ساۋالدارعا جاۋاپ الۋعا مۇمكىندىك بەرەدى.
جاڭا پوليتسيا بەكەتىنىڭ جۇمىسىمەن وبلىس اكىمى ەرلان قوشانوۆ ارنايى بارىپ, تانىسىپ قايتتى. ءوڭىر باسشىسى وبلىستا مۇنداي پوليتسيا بەكەتتەرىن سالۋ جۇمىستارىن جالعاستىرۋدى تاپسىردى. قاراعاندى وبلىستىق ءىىد باستىعى م.جاپپاروۆ كەلەسى جىلى قاراعاندى, تەمىرتاۋ جانە جەزقازعان قالالارىندا ءدال وسىنداي 10 پوليتسيا بەكەتىن اشۋ جوسپارلانعانىن ءمالىم ەتتى.
قايرات ءابىلدا,
«ەگەمەن قازاقستان»
قاراعاندى
