«2001 جىلى قازاقستانعا كەلگەن سوڭ جاڭاوزەندە جاتتىعىپ ءجۇردىم. جەڭىس جارىلعاپوۆ بوكسقا دەگەن تالابىمدى ودان ءارى ۇشتاي ءتۇستى. ارادا جارتى جىل وتكەندە مارات جاقيەۆتىڭ قول استىنا اپارىپ تابىستادى. 2012 جىلى وليمپيادا جۇلدەگەرى اتانعانىمدا ج.جارىلعاپوۆقا قازاقستانعا ەڭبەك سىڭىرگەن جاتتىقتىرۋشىسى اتاعى بەرىلدى», دەدى ءا.نيازىمبەتوۆ.
سپورتشىنىڭ ايتۋىنشا, بالا كۇنىندە ول جاسوسپىرىمدەر مەن جاستار اراسىندا ايتارلىقتار ناتيجە كورسەتە الماعان.
«ۇنەمى بارعان جارىسىمدا ۇتىلاتىنمىن. اكەم كۇندە تاڭعى بەس جارىمدا جۇگىرۋگە وياتادى. ءۇيدىڭ توعىزىنشى قاباتىنا باسپالداقپەن بىرنەشە رەت جۇگىرىپ شىعامىن. اكەمنىڭ ماعان ايتقان ءبىر ايتقان ءسوزى: «بوكستىڭ سوڭىنا دەيىن بارۋىڭ كەرەك», دەگەن ءسوز بولدى. مەن ءۇشىن 2001 جىلى اكەم اقتاۋداعى 23 مەكتەپتە 12 مىڭ تەڭگە ايلىققا جۇمىس ىستەدى», دەدى ول.
تۇرمىستىڭ قيىندىعىنا قاراماستان, ادىلبەك سپورت جاتتىعۋىنان قول ۇزبەگەن.
«بوكستىڭ نانىن جەۋ ءۇشىن ءبىز وتباسىمىزبەن كەلەر كۇننەن ءۇمىت ۇزبەدىك. 20 جاسىما دەيىن دالاعا شىقپادىم. تارتىپكە قاتال قارايتىن اكەم ءتىپتى ساباققا دا بارماي-اق قوي دەپ رۇقسات بەردى. اقتاۋ مەن اقشۇقىر اۋلىنىڭ اراسىندا بىرنەشە شاقىرىمدى توقتاماستان جۇگىرەمىن. دالادا سوققى جۇمساپ دايىندالامىن. اراسىندا اعاممەن فۋتبول وينايمىن. جاتتىعۋ كەزىندە قاسىمدا اكەم, شەشەم, اعام, ءتىپتى قارىنداسىم ەرىپ ءجۇردى. بارلىعى مەنىڭ تىلەۋىمدى تىلەپ, بوكسشى بولىپ قالىپتاسۋىما كوپ ەڭبەك ءسىڭىردى», دەدى ءا.نيازىمبەتوۆ.
