كەلەلى كەڭەسكە تۇركيا, قىرعىزستان, ازەربايجان جانە تاتارستان ەلدەرىنىڭ اقپاراتتىق اگەنتتىكتەرى مەن بەلدى باسىلىمدارىنىڭ جەتەكشىلەرى, وتاندىق باق باسشىلارى مەن وكىلدەرى, عالىمدار جانە جۋرناليستيكا ءبولىمىنىڭ ستۋدەنتتەرى قاتىستى.
جيىندا تۇركىستان وبلىسىنىڭ باستى برەندىن قالىپتاستىرۋ, وبلىستىڭ وڭ ءيميدجىن كوتەرۋ, سونداي-اق تۇركىستان قالاسىن تۇركى الەمىنىڭ رۋحاني ورتالىعىنا اينالدىرۋ ءسوز بولدى.
فورۋمنىڭ اشىلۋىندا وبلىس اكىمى جانسەيىت تۇيمەباەۆ اتالعان جيىننىڭ ماڭىزدىلىعىنا توقتالىپ, مەديا كەڭىستىكتى دامىتۋ, كيەلى شاhاردى تۇركى الەمىنىڭ رۋحاني ورتالىعىنا اينالدىرۋ جولىندا وسىنداي كەلەلى كەڭەستەردىڭ وڭ ىقپال ەتەتىندىگىن ايتتى.
«ەلباسى تۇركىستان قالاسىن تۇركى الەمىنىڭ رۋحاني ورتالىعىنا جانە الەم تۋريستەرى كەلۋگە اسىعاتىن قالاعا اينالدىرۋ جونىندە تاپسىرما بەرگەن بولاتىن. قازاقستان حالقىنا ارناعان «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋىندا دا تۋريزم ماسەلەسىنە ەرەكشە توقتالدى. ءتۋريزمدى دامىتۋدا اقپاراتتىق جۇمىستىڭ ماڭىزى زور. بۇگىن شەتەلدىك اقپارات قۇرالدارى وكىلدەرىن, ەلىمىزدىڭ جەتەكشى تەلەارنالارى مەن باسىلىمدارىنىڭ باسشىلارىن, وڭىردەگى رەداكتورلار مەن جۋرناليستەردىڭ باسىن قوسۋداعى ماقساتىمىز – بارشاڭىزدى بىرلەسىپ جۇمىس ىستەۋگە جۇمىلدىرۋ. قالانى كوركەيتۋگە جانە وتاندىق جۋرناليستيكانى دامىتۋعا ارنالعان ۇسىنىستاردى تىڭداۋعا ءازىرمىز. بۇگىندە وبلىس ورتالىعىنا مەملەكەتتىك قىزمەتكەرلەرمەن قاتار بىرقاتار جۋرناليستەر كوشىپ كەلدى. ولار تۇركىستاننىڭ جاڭا جىلناماسىن جازىپ جاتىر. سىزدەردى دە تۇركى الەمىنىڭ رۋحاني ورتالىعىنا جۇمىس ىستەۋگە شاقىرامىن, – دەدى ج.تۇيمەباەۆ.
وڭىردەگى يگىلىكتى ىستەردى تۇركى تىلدەس ەلدەر باق-تارىندا تاراتۋ جانە وزگە مەملەكەتتەرمەن اقپاراتتىق سالادا ىنتىماقتاستىقتى ارتتىرۋدى ماقسات تۇتقان جيىندا سالا بىلگىرلەرى وتاندىق جۋرناليستيكانى دامىتۋ باعىتىنداعى تىڭ يدەيالار مەن باستامالارىن ورتاعا سالدى.
وسى فورۋمعا تۇركى تىلدەس ەلدەردەن ارنايى شاقىرىلعان اقپارات قۇرالدارىنىڭ جەتەكشىلەرى مەن وكىلدەرى الداعى ۋاقىتتا وبلىستى حالىقارالىق دەڭگەيدە ناسيحاتتاۋعا ۇلەس قوسۋعا دايىن ەكەندىكتەرىن جەتكىزدى. سونداي-اق شىنايى ءارى ساپالى اقپارات ارقىلى تۇركى الەمىنىڭ رۋحاني ورتالىعى – تۇركىستاننىڭ تۋريزم سالاسىن دامىتىپ, ينۆەستيتسيا تارتۋعا كوپ كوڭىل ءبولىپ وتىرعانىن تىلگە تيەك ەتتى.
جيىندا بايانداما جاساعان باق باسشىلارى تۇركىستان شاھارىندا تۇركى تىلدەس مەملەكەتتەرگە ورتاق اقپارات تاراتاتىن ينتەرنەت رەسۋرس قۇرۋ ۇسىنىسىن ايتتى. سپيكەرلەردىڭ پىكىرىنشە, اقپاراتتىق سايت جۇيەلى جۇمىس ىستەگەن جاعدايدا تۇركى دۇنيەسى ەلدەرى اراسىنداعى تىلدىك كەدەرگىلەردى جويۋعا سەپتىگىن تيگىزبەك.
فورۋم اياسىندا تۇركىستان وبلىسى ىشكى ساياسات باسقارماسى مەن شەتەل باسىلىمدارى اراسىندا كەلىسىمدەرگە قول قويىلدى. تارقاتىپ ايتار بولساق, تۇركيانىڭ «TRT» تەلەكومپانياسىنىڭ استاناداعى وكىلدىگىنىڭ ديرەكتورى ابدۋلحاميت اۆشار مەن تۇركىستان وبلىستىق ىشكى ساياسات باسقارماسىنىڭ باسشىسى بەيسەنباي تاجىباەۆ باق سالاسىنداعى ارىپتەستىك جانە ىسكەرلىك بايلانىس ورناتۋ جونىندەگى مەموراندۋمعا قول قويدى. سونىمەن قاتار قىرعىزستاننىڭ «كابار» ۇلتتىق اقپارات اگەنتتىگىنىڭ ءىت دەپارتامەنتىنىڭ ديرەكتورى كالنۋر جانىباەۆپەن, تاتارستاننىڭ «تاتار-ينفورم» اقپارات اگەنتتىگى باس ديرەكتورىنىڭ ورىنباسارى راميس لاتيپوۆپەن جانە ازەربايجاننىڭ ITV تەلەراديوكومپانياسىنىڭ قازاقستانداعى وكىلى ماجيدي فۋزۋليمەن دە ءوزارا مەموراندۋم جاسالدى.
وسى ايتۋلى كۇنگە وراي وبلىس اكىمىنىڭ قاتىسۋىمەن «تۇركىستان مەديا» حالىقارالىق ورتالىعى اشىلىپ, وبلىس تۋرالى اقپاراتتار تۇركى تىلدەس ەلدەردىڭ اقپارات قۇرالدارىندا 5 تىلدە (ازەربايجان, تۇرىك, وزبەك, قىرعىز, ورىس) تاراتۋ جونىندە شەتەلدىك اقپارات قۇرالدارىمەن كەلىسىم جاسالدى.
قازىرگى تاڭدا «تۇركىستان مەديا» حالىقارالىق ورتالىعى تۇركىگە ورتاق اقپاراتتىق كەڭىستىك قۇرۋدىڭ العاشقى كەزەڭىن باستاپ كەتتى. بۇگىندە ورتالىقتا ق.ا.ياساۋي اتىنداعى قازاق-تۇرىك ۋنيۆەرسيتەتىندە ءبىلىمىن شىڭداعان تۇركى دۇنيەسىنىڭ ستۋدەنتتەرى ءوز انا تىلدەرىندە اقپار تاراتۋعا كىرىستى.
نۇرشات توكەن,
جۋرناليست
تۇركىستان
