پارا بي بويىنشا استانانىڭ اشىق چەمپيوناتىنا ەلىمىزدىڭ 6 ايماعىنىڭ (استانا, شىمكەنت قالالارى, تۇركىستان, باتىس قازاقستان, قاراعاندى, الماتى وبلىستارى) وكىلدەرى قاتىسۋدا. ولاردىڭ اراسىندا بي سپورتىنان الەم جانە ازيا چەمپيوندارى مەن لاۋرەاتتارى بار. اشىلۋ سالتاناتىنا قازاقستان مەن رەسەيدىڭ بي ۇجىمدارى قاتىسىپ جاتىر. سونداي-اق, چەمپيونات اياسىندا حورەوگرافيا جانە ساحنا بيىنەن بالاباقشا تاربيەلەنۋشىلەرىنىڭ دە فەستيۆالى وتۋدە.
ودان بولەك, ەرتەڭ ءۇش بىردەي شارانىڭ اشىلۋى بولادى. ولار - قر اشىق چەمپيوناتى, «Kazakhstan Open 2018» چەرليدەرلەر سپورتىنان حالىقارالىق تۋرنير جانە زاماناۋي, ەسترادالىق, حالىقتىق جانە ارتىستىك بي بويىنشا حالىقارالىق تۋرنير.
اتالعان سايىستارعا قازاقستاننىڭ بارلىق وڭىرىنەن, ودان بولەك قىرعىزستان, وزبەكستان جانە رەسەي ونەرپازدارى قاتىسادى. بيشىلەر باسەكەسى «سەن جۇلدىزسىڭ» ۇرانىمەن وتەدى.
«پارا بي سپورتى ەلىمىزدە كاسىبي تۇردە 2009 جىلدان باستاپ قولعا الىندى. 2010 جىلى بارلىق وڭىرلەردەگى مادەنيەت جانە سپورت باسقارماسىنىڭ جانىنان پارا بي سپورتى ءبولىمى جۇمىس ىستەي باستادى. سودان بەرى قازاقستان چەمپيوناتى تۇراقتى تۇردە وتكىزىلىپ كەلەدى. بۇگىندە 34 ادامنان تۇراتىن ۇلتتىق قۇراما بار. قازاقستان قۇراما كومانداسى جىل سايىن حالىقارالىق جارىستارعا قاتىسىپ جۇلدەمەن ورالادى. سوزىمە دالەل كەلتىرەيىن, ۇستىمىزدەگى جىلى ءبىزدىڭ سپورتشىلار پولشا, تايۆان, گەرمانيا ەلدەرىندە وتكەن حالىقارالىق بايقاۋ مەن الەم كۋبوگىنا قاتىسىپ, جۇلدەلى ورىندار يەلەندى. جانە بۇنى تەك سپورت ءتۇرى عانا ەمەس, تاعدىرى ەرەكشە جانداردىڭ باسىن قوساتىن مەرەكە دەپ ايتۋعا بولادى», - دەدى قر زاماناۋي جانە سپورتتىق بي فەدەراتسياسىنىڭ پرەزيدەنتى ءاليا تۇسىپبەكوۆا.
ۇيىمداستىرۋشىلاردىڭ ايتۋىنشا, اتالعان بايقاۋ قاتىسۋشىلارعا بيىل وتەتىن الەم جانە ازيا چەمپيوناتىنا ليتسەنزيا الۋعا, سونداي-اق سپورتتىق دارەجە يەلەنىپ, ۇلتتىق قۇراماعا كىرۋگە مۇمكىندىك بەرەدى. ياعني ۇزدىك دەپ تانىلعاندار ەلىمىزدىڭ اتىنان الەمدىك جارىستارعا قاتىسادى.
وسىمەن جەتىنشى رەت ۇيىمداستىرىلىپ وتىرعان تۋرنير قاتىسۋشىلار ءۇشىن جىلدىڭ باستى وقيعاسى سانالادى. ولاردىڭ ايتۋىنشا, بۇل شارالار ونەر كورسەتۋمەن قاتار, ءبىر-بىرىمەن ارالاسىپ, ءوزارا تاجىريبە الماسۋ ءۇشىن دە ماڭىزدى. 2011 جىلى باستاۋ العان ونەر سايىسى 7 جىلدىڭ ىشىندە 15 مىڭنان استام ءبيشىنىڭ باسىن قوسقان.
شارانى ۇيىمداستىرۋشىلار - زاماناۋي جانە سپورتتىق بي فەدەراتسياسى مەن استانا قالاسىنىڭ سپورتتىق بي فەدەراتسياسى. چەمپيونات قر مادەنيەت جانە سپورت مينيسترلىگى, استانا قالاسىنىڭ اكىمدىگى جانە استانا قالاسى مادەنيەت جانە سپورت باسقارماسىنىڭ قولداۋىمەن ءوتىپ جاتىر.
