«سپانديار كوبەەۆتىڭ اتىنا ءدارىسحانا بەرۋ كوپتەن ويلاستىرىپ جۇرگەن شارۋا بولاتىن. بۇل كەرەك ءىس. وكىنىشكە قاراي ءبىلىم سالاسىنىڭ قايراتكەرلەرىن, بەلگىلى ۇستازداردى جاستار بىلە بەرمەيدى. ءدارىسحانا اتىن بەرۋ ءبىزدىڭ حالقىمىزدىڭ ۇلىلارىن ۇمىتتىرماي, جاستارعا ناسيحاتتاۋدىڭ ءبىر ءتۇرى دەپ بىلەمىز. ءبىزدىڭ ۋنيۆەرسيتەتتە مۇنداي ءىس جالعاسىن تاباتىن بولادى», دەدى ەركىن امانجول ۇلى.
« ىبىراي التىنساريننەن ءبىلىم العان, ءىزىن جالعاعان ۇستازدار قوستاناي جەرىندە از بولماعان. ولاردىڭ كوشىن ۇلتتىڭ ۇيتقىسى بولعان احمەت بايتۇرسىنوۆ, مىرجاقىپ دۋلاتوۆ, ەلدەس وماروۆ باستادى, ولاردى سپانديار كوبەەۆ, بەكەت وتەتىلەۋوۆتەر جالعادى. سپانديار كوبەەۆتىڭ العاشقى كىتابىنا كوڭىل بولسەك, ول «ۇلگىلى بالا, ۇلگىلى ءتارجىما» دەپ اتالادى. ول كىسى بىلىممەن بىرگە بالانىڭ تاربيەسىنە كوپ كوڭىل بولگەن. بۇل ءال-فارابي بابامىزدىڭ «تاربيەسىز بەرگەن ءبىلىم قاۋىپتى» دەگەن ويىمەن ۇندەس», دەدى اقىن اقىلبەك شاياحمەت.
ءدارىسحانانىڭ اشىلۋ سالتاناتىندا سپانديار كوبەەۆتىڭ ءىنىسى وسپاننان تاراعان ماعىش عارىپقىزى, اقىن سەرىكباي وسپانوۆ, تاريح عىلىمدارىنىڭ دوكتورى, پروفەسسور امانجول كۇزەمباي ۇلى, تاعى باسقالار سويلەپ, اعارتۋشى ۇستازدىڭ پەداگوگيكالىق جانە ادەبي مۇرالارىنىڭ ماڭىزى تۋرالى ايتتى. ستۋدەنتتەر سپانديار كوبەەۆكە ارنالعان ولەڭدەرىن وقىدى, كەلۋشىلەر ۇستازدىڭ شىعارماشىلىعىنا ارنالعان كورمەنى تاماشالادى.
ءدارىسحانانىڭ اشىلۋ سالتاناتىنان كەيىن كەمەڭگەر ۇستازدىڭ ۇرپاقتارى اتاسىنا ارناپ اس بەرىپ, ونىڭ رۋحىنا قۇران باعىشتادى.
ءنازيرا جارىمبەت,
«ەگەمەن قازاقستان»,
قوستاناي
