وسى ورايدا جامبىل وبلىسى اكىمدىگىندە وڭىردەگى قۇرىلىس ساپاسىنا جانە تۇرعىن ۇيلەردىڭ ساۋلەتتىك كەلبەتىنە قاتىستى جيىن ءوتتى. جيىن بارىسىندا وبلىس اكىمى اسقار مىرزاحمەتوۆ قۇرىلىسى جۇرگىزىلىپ جاتقان 15-ءشى جاڭا مولتەكاۋدانىنىڭ ساۋلەتتىك كەلبەتى, ونداعى كوپقاباتتى تۇرعىن ۇيلەردىڭ سىرتقى بەينەسى زاماناۋي ءارى كورىكتى بولۋى شارت ەكەنىن ايتتى.
باسقوسۋدا مولتەكاۋداندا جاڭادان سالىناتىن كوپقاباتتى ۇيلەردىڭ ءبىرىنشى قاباتىندا الەۋمەتتىك جانە كوممەرتسيالىق ماقساتتاعى نىساندار ورنالاستىرۋ ماسەلەلەرى تالقىلاندى. جيىندا تاراز قالاسى اكىمىنىڭ ورىنباسارى سايلاۋعالى باينازاروۆ ماقساتتى جۇمىستاردىڭ ىسكە اسۋ جۇيەسى تۋرالى باياندادى. ونىڭ ايتۋىنشا, قازىرگى تاڭدا 25 ءۇيدىڭ جوباسى دايىندالۋدا ەكەن. 2020-2021 جىلدارى قۇرىلىسى جۇرگىزىلەتىن ول كوپقاباتتى تۇرعىن ۇيلەردىڭ 12-ءسىنىڭ ءبىرىنشى قاباتتتارىنا وزگەرىستەر ەنگىزىلەدى. ياعني مەملەكەتتىك ورگان (تاپسىرۋشى) جوبالاۋ تاپسىرمادا ءبىرىنشى قاباتتا الەۋمەتتىك, كوممەرتسيالىق جانە تاعى باسقا نىساندار بولۋ قاجەتتىگىن كورسەتەدى, سوعان وراي جوبا-سمەتالىق قۇجاتتاما تاپسىرماعا سايكەس دايىندالىپ, قۇرىلىس جەر تەلىمىنىڭ, فۋندامەنت, جەرتولەنىڭ قۇندىق ۇلەستەرى تەڭ پروپورتسيادا بولىنەدى. مەملەكەتتىك ساتىپ الۋ تەك تۇرعىن پاتەرلەر جانە ۇلەسىنە قاراي جەرتولە كولەمىنە جۇرگىزىلەدى, مەملەكەتتىك ساتىپ الۋعا قاتىسۋشى مەردىگەر وسىنداي شارتقا كەلىسىپ قاتىسادى.
اسقار مىرزاحمەتوۆ تەك بەس قاباتتى تۇرعىن ۇيلەرمەن شەكتەلمەي جەتى, توعىز قاباتتى ۇيلەردى دە سالۋ قاجەتتىلىگىن ەسكەرتتى. سول ارقىلى ينفراقۇرىلىم تارتۋ جۇمىستارىن, جەر اۋماعىن ۇنەمدەي وتىرىپ, پاتەر قۇنىن تومەندەتۋگە بولاتىنىن جەتكىزدى. وبلىس اكىمى ەڭ باستىسى شاعىن اۋداندارداعى كوپپاتەرلى تۇرعىن ۇيلەردىڭ ءبىرىنشى قاباتتارىن الەۋمەتتىك جانە كوممەرتسيالىق ماقساتتاعى نىساندارعا بەرە وتىرىپ, عيماراتتاردىڭ سىرتقى كورىنىسىن, ساۋلەتتىك كەلبەتىن ارتتىرۋدى تالاپ ەتۋ كەرەكتىگىن باسا ايتتى.
حاميت ەسامان,
«ەگەمەن قازاقستان»
جامبىل وبلىسى
