استانا قالاسى اكىمدىگىنىڭ ۇيىتقى بولۋىمەن وتكىزىلگەن فەستيۆالدىڭ ماقساتى − جاستار اراسىنداعى ەتنوسارالىق ىنتىماقتاستىقتى دامىتۋ مەن ولاردىڭ شىعارماشىلىق قابىلەتتەرىن ارتتىرۋ.
جىل بويى قالا اكىمدىگىنىڭ ۇيىمداستىرۋىمەن جاستارعا باعىتتالعان كوپتەگەن ءىس-شارا ۇيىمداستىرىلادى. قالامىزداعى 20-دان استام ەتنومادەني بىرلەستىكتىڭ جاستارى بارلىق شارادا بەلسەندىلىك تانىتادى. وسى باعىتتاعى شارالار – ەلىمىزدەگى بارلىق ۇلت وكىلدەرىنىڭ ىرىس-ىنتىماعى مەن بەرىك دوستىعىنىڭ بەلگىسى, – دەدى قوعامدىق دامۋ ىستەرى باسقارماسىنىڭ جاستارمەن جۇمىس ءبولىمىنىڭ باسشىسى باقىتجان جۇنىسبەكوۆ.
فەستيۆالدىڭ شىمىلدىعىن «باستاۋ» دومبىراشىلار دۋەتى ءتۇردى. قالانىڭ ستۋدەنت جاستارى مەن ەتنومادەني بىرلەستىكتەرىنىڭ كوشباسشىلارى قاتىسقان فەستيۆال اياسىندا جىلدىق جۇمىس قورىتىندىسى شىعارىلىپ, ۇزدىك ەتنومادەني بىرلەستىكتەر ەستەلىك سىيلىقتارمەن ماراپاتتالدى.
جىل سايىن ۇيىمداستىرىلاتىن «جاستار جالىنى», «ەلوردا دارىنى» سياقتى فەستيۆالدار جاستاردىڭ جىگەرلەنىپ, جاسامپازدىققا ۇمتىلۋىنا بىردەن-ءبىر سەبەپ. قوعامدىق دامۋ ىستەرى باسقارماسىنىڭ جاستارمەن جۇمىس ءبولىمىنىڭ باسشىسى باقىتجان جۇنىسبەكوۆتىڭ ايتۋىنشا, «جاستار جىلىندا» جاعىمدى جاڭالىقتار كوپ بولماق. «كۇنى كەشە استانا جاستارىنىڭ «Jastar jalyny» فورۋمى ءوتتى. اتالعان شاراعا 1000-عا جۋىق ورەن قاتىستى. فورۋمنىڭ ناتيجەسىندە بىزگە كوپتەگەن ۇسىنىستار مەن جوبالار كەلىپ ءتۇستى. ەندى سول باستامالاردى جيناقتاپ, كەلەسى «جاستار جىلىنا» وراي اۋقىمدى باعدارلامالار مەن شارالار كەشەنىن دايىندايتىن بولامىز», دەدى.
30 قازان كۇنى استانا جاستارىن بيزنەس باعىتىندا ىنتالاندىرۋ جانە قولداۋ ماقساتىندا «Jastar jalyny» فورۋمى ءوتتى. 8-ءشى رەت ۇيىمداستىرىلعان شاراعا 20 سپيكەر جاستارمەن وي ءبولىستى.
اقمارال اعزامقىزى,
«ەگەمەن قازاقستان»
