بۇعان دەيىن شارۋالار اسىل تۇقىمدى مالدى باعاسى وزگە جەرلەردەن ارزانىراق ءارى كليماتتىق جاعىنان قولايلى رەسەي فەدەراتسياسىنىڭ اقتوبە وبلىسىنا جاقىن وبلىستارىنان ساتىپ الىپ كەلگەن. وسى «سىباعا»باعدارلاماسى بويىنشا بيىل «اۋىل شارۋاشىلىعىن قارجىلاي قولداۋ قورى» اق-نىڭ اقتوبە فيليالىنا جالپى سوماسى 1,279,6 ملن تەڭگە تۇراتىن 2421 ءىرى قارا مال ساتىپ الۋعا 50 شارۋا قوجالىعىنان ءوتىنىش تۇسكەن. بۇگىنگى تاڭدا 44 قوجالىقتىڭ ءوتىنىمى ماقۇلداندى جانە 41-نە 1828 باس يمپورتتالعان ءىرى قارا مال ساتىپ الۋعا نەسيە بەرىلدى (898,3 ملن تەڭگە).
الايدا نەسيەنى بەكىتىلگەن مەرزىم ىشىندە يگەرۋ بۇگىنگى تاڭدا مۇمكىن بولماي وتىر. ويتكەنى بيىلعى شىلدە ايىنان باستاپ, قازاقستان رەسپۋبليكاسى اۋىل شارۋاشىلىعى مينيسترلىگىنىڭ ۆەتەريناريالىق باقىلاۋ جانە قاداعالاۋ كوميتەتى رەسەي فەدەراتسياسىنىڭ بىرقاتار وبلىستارىنان (ورىنبور, ساراتوۆ, سامارا, قورعان, چەليابى قالالارىنان) اكەلىنەتىن ءىرى قارا جانە باسقا جانۋارلاردى نودۋليارلى دەرماتيت جانە اۋسىل اۋرۋلارىنا بەيىمدىگى بايقالعاندىقتان ۋاقىتشا شەكتەۋلەر ەنگىزگەن بولاتىن (رەسەي فەدەراتسياسىنىڭ كارانتينگە جابىلعان وبلىستار ءتىزىمى ۇلعايۋدا). بىرقاتار فەرمالار قازىردىڭ وزىندە رەسەي فەدەراتسياسىنىڭ مال شارۋاشىلىقتارىمەن الدىن-الا كەلىسىم جاساسقان, الايدا شەكتەۋلەرگە بايلانىستى ولار مالدارىن ءالى دە اكەلە الماي وتىر. سونىمەن بىرگە, قور نەسيەلەر بويىنشا سىياقىلار ءبولىپ ۇلگەرگەن جانە بەرىلگەن قارىز قاراجاتىنىڭ ۋاقىتىندا يگەرىلۋى قاداعالانادى. وسىعان وراي كاسىپكەرلەر نەسيە قاراجاتىن يگەرۋ مەرزىمىن ۇزارتۋدى نەمەسە رف كارانتينگە جابىلعان اۋدانداردان بولەك جەرلەرىنەن مال اكەلۋگە رۇقسات بەرىلۋىن سۇرايدى. بۇل ماسەلە اقتوبە وبلىسى كاسىپكەرلەر پالاتاسى كاسىپكەرلەردىڭ قۇقىقتارىن قورعاۋ جانە سىبايلاس جەمقورلىققا قارسى ءىس-قيمىل جونىندەگى كەڭەسىنىڭ كەزەكتى وتىرىسىندا تالقىلاندى.
كەلەسى قارالعان ماسەلە كاسىپكەر ك.ا.التاياكوۆانىڭ ساۋدا پوۆيلوندارىن ورنالاستىرۋ ءۇشىن قالا اكىمدىگىنەن جالعا العان جەرىنە قاتىستى بولدى. ابىلقايىر حان داڭعىلى بويىندا ورنالاسقان ساۋدا نۇكتەسىنە ارنالعان ورىنعا ۋاقىتشا مەنشىك ەتۋ تۋرالى ءوتىنىشىن العاشىندا قاناعاتتاندىرعان «جەر قاتىناستارى» ءبولىمىنىڭ ماماندارى كەيىن ودان ءارتۇرلى سەبەپتەرمەن باس تارتادى. ايتۋلارىنشا وعان سول جەرگە بالالارعا ويىن الاڭىن سالۋ تۋرالى كوندومينيمۋمنان ءوتىنىش تۇسكەن ەكەن. كاسىپكەر ءوز قاراجاتىنا اتالعان جەرگە ويىن الاڭىن سالۋعا ءازىر. كەڭەس مۇشەلەرى بۇل جەردە كاسىپكەردىڭ قۇقىنا نۇقسان كەلتىرەتىن دەرەكتەردىڭ بايقالاتىنىن ايتىپ, اتالعان ورىنعا جەكە بارىپ, تەكسەرەتىندىكتەرىن مالىمدەدى.
كاسىپكەرلەر پالاتاسى كاسىپكەرلەردىڭ قۇقىقتارىن قورعاۋ جانە سىبايلاس جەمقورلىققا قارسى ءىس-قيمىل جونىندەگى كەڭەسىنىڭ شەشىمىمەن كورسەتىلگەن ماسەلەلەر بويىنشا قازاقستان رەسپۋبليكاسىنىڭ جانە رف اۋىل شارۋاشىلىعى مينيسترلىكتەرىمەن ءتيىستى كەلىسسوزدەرگە قول جەتكىزۋ ماقساتىندا «اتامەكەن» ۇلتتىق كاسىپكەرلەر پالاتاسىنا ءوتىنىش جىبەرىلەدى, سونداي-اق, ك.ا.التاياكوۆاعا "اقتوبە وبلىسىنىڭ جەر قاتىناستارى ءبولىمى» مم اتالعان قاۋلىسىنىڭ كۇشىن جويۋ بويىنشا قۇقىقتىق كومەك كورسەتىلمەك.
تەمىر قۇسايىن,
«ەگەمەن قازاقستان»
