قازاقستانداعى وزبەكستان جىلى اياسىندا وزبەكستان رەسپۋبليكاسىنىڭ جيزاق وبلىسىنان كەلگەن قۇرمەتتى قوناقتاردىڭ قاتىسۋىمەن تاراز قالاسىنداعى ورتالىق كورمە زالىندا «شەبەرلەر قالاشىعى» اتتى قولونەر شەبەرلەرىنىڭ كورمەسى ءوتتى. اتالعان كورمەگە اعاش, مەتالل, قىش بۇيىمدارىنان جاسالعان وزبەك قولونەر شەبەرلەرىنىڭ تۋىندىلارى قويىلدى.
كورمەنىڭ سالتاناتتى اشىلۋى بارىسىندا جامبىل وبلىستىق مادەنيەت, ارحيۆتەر جانە قۇجاتتاما باسقارماسى باسشىسىنىڭ ورىنباسارى ءزۇبايرا سەمبينا الىستان ات تەرلەتىپ كەلگەن ونەر يەلەرىنە دەگەن العىسىن ءبىلدىردى. سونىمەن قاتار, ارنايى ازىرلەنگەن العىس حاتتار مەن جىر الىبى جامبىل جاباەۆتىڭ بولمىسى بەينەلەنگەن كىلەمشەنى الا شاپاندى اعايىندارعا سىيعا تارتتى. سونداي-اق, جامبىل وبلىسى بويىنشا «وزبەك» ەتنومادەني ورتالىعىنىڭ پرەزيدەنتى باحروم مۋمينوۆ بۇگىنگى شارا ەكى ەل تاتۋلىعىنىڭ كورىنىسى ەكەنىن ايتىپ ءوتتى. ال «شەبەرلەر قالاشىعى» اتتى قولونەر شەبەرلەرىنىڭ كورمەسىنە وزبەك ەلىنەن ارنايى كەلگەن مينياتيۋرا, كەسكىندەمە ونەرىنىڭ شەبەرى شاحلو راحماتوۆا, اعاش شەبەرى بۋنەدجون زويرجونوۆ, زەرگەر ۋتكير قۋدراتوۆ سىندى تانىمال ازاماتتار مەن جامبىل ءوڭىرىنىڭ قولونەر شەبەرلەرى اراسىندا تاجىريبە الماسۋ ماقساتىندا شەبەرلىك ساعاتتارى ۇيىمداستىرىلدى.
كورمەگە قويىلعان اشەكەيلى باعالى جۇزىكتەر, اعاش بۇيىمدارىنان جاسالعان قۇندى جادىگەرلەر, كۇندەلىكتى تۇرمىستا پايدالاناتىن ىدىستار, تاريحي كەزەڭدەردى, تابيعات كورىنىستەرىن بەينەلەگەن اسەم كارتينالار كوپشىلىكتىڭ قىزىعۋشىلىعىن تۋدىردى. كەلۋشىلەر وزبەك حالقىنىڭ ونەرىمەن جاقىن تانىسىپ, پىكىر الماستى. سونىمەن قاتار, اتالعان شارا بارىسىندا الداعى ۋاقىتتا ەكى ەلدىڭ قولونەرشىلەرىنىڭ مادەني قارىم-قاتىناسىن نىعايتۋ ماقساتىندا جامبىل وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى دۇيسەنالى بىقىباەۆ پەن جيزاق وبلىستىق ونەرپازدار باسقارماسىنىڭ باسشىسى ماراتجون ماماتقۇلوۆ ەكىجاقتى مەموراندۋمعا قول قويدى.
حاميت ەسامان,
«ەگەمەن قازاقستان»
جامبىل وبلىسى
